VANNOIJA BOINA KICHAITHEILOU DING AHI ✍️ Pu S. Mangkholen Haokip

VANNOI LEISET hi boina toh kikhen loudinga chung-Pathen laitansa ahi. Vannoi boina hi thil thah ahipoi. Leiset kisemtil apatna hung umsa ahitai. Tutun jong achejomjinge. Leiset chung titahlouva, van gam a galkisat thu jong Bible in aseije. "Van a gal akisatnin, Lucifer leh anungjuiho ahinsonlha tauve" akitin ahi. Mihem hinkho jong hi kana a kipan, kana a kichaiji ahi. Naosen apen tengleh akapjin, mihem hinkho alhinna, athi tengjongleh, kana toh kivuitha kit ahi. Hiche banga chu leiset chung jong hi, galkisatna kipan ahin, achaina jong galkisatna kichai ding ahi.

Gallen khatna (1st World War) chu anagimnei lheh jenge. Mihem te keo hilouvin, ganhing juleva, chuleh world environment jong nasatah in atongkhai.

Gallen nina (2nd World War) jong agimneilheh jenge. Gallen khatna sangin gamchengin agimnei joi. 

Hijehchun, Gallen Thumna (3rd World War) umlouna dingin, 1945 kum chun, United Nations Organisation (UNO) kiti kiloikhomna lenpen chu akiphutdoh tan ahi. Hiche UNO jalla tunichanna vannoi galpi umdohtheilou ahi. Ahinlah, UNO in thaneina lhingset aneijom jou ding hinam? Chuleh,

Kisonpi thei mong hinam, tihi gellouthei ahipoi.

Ajehchu, Country tampin asemkhom Organisation  hijongleh, anatong avaihom atamjo hi USA ho ahi. Amaho control na noija um tobang ahijeh chun, UNO chu 100% kisonpi thei ahidehpoi.

Tutun Israel doudingin Palestine based Hamas thingnoimi ho akipandoh  uve. Ahinlah, ahtui leh songtat kitat-to abangtai. Hamas ho kithopi dingin Lebanon based Hazbolla thingnoimi ho ahungkipandoh kit uve. Amaho jong ginchat toh banglouvin, dolche abangkit tauvin ahi. Houthi thingnoi group khat jong Israel doudingin ahungkijeplut kitne. Hiche banjomchun, athou-akin jaolou Iran te ahungkikumlut kit tan ahi. Hijehchun, alang-alanga ban-gol kijet tetna achelha jing tan ahi. Hiche hin phatlam ahin mano ding tahsan aumpoi.

Alangkhatna, Ukraine leh Russia kikah boina-meipi jong tunichannin achejom jinge. NATO gam hon Ukraine apanpiuvin, Russia panpi jong umkit thou ahi. Alang alanga apanpi ahung umtengleh, gaal kitichu kimohchai ngailou ahi. Ukraine leh Israel in galjona anei lhon ding kinep aume.

Burma gamsung igaldotkit leh, lungthim kicholdona aumkitpoi. Mipi leh Government kidouna asanglheh jenge. Burma Millitary Junta hi guhthim a China in apanpi ahi. Chuleh, PDF leh akiloipi ethnic group ho chu guhthimma apanpi umkit ahi. Democracy jong moh umvahlouding ahi. Chuleh, democratic icon Aung San Suu Kyi jong songkul sunga hungthiden maithei ahitai. Galjona vangchu PDF ho hungchangdiu ahi. Hiche kahlah achu, KNA-B jong kijeplut kit ahi. 

Alangkhatna meilhei thingnoimi UNLF, KYKL, PREPAK, PLA holeh Tangkhul thingnoimi NSCN-IM hon jong Burma Millitary Junta apanpi kit u ahi. Ejemtia PDF hon galjona ahinnei khah leh, National Unity Government (NUG) hungkisemdoh ding ahi, KNA-B jong chanlevou hungchang ding, Asian Highway toupha lah a, hungjao diu ahi. Amaho tohga chu tute-chate hon ahinneh diu ahi.

Chittagong Hill Track (Bangladesh) munna isopiu, Kuki-Chin National Front hon jong hem-le-thal atolkoi nai pouve. Amahojong hungmachal jingdiu ahi. Ajehchu USA ten guhthimma Christian Country khat semdohding tohgon anei ahi. Kuki-Chin Army ho chu Christian ahiuvin, apanpiding hungsepdoh thouthou ding ahi. Amahon bon "Kuki" minna thichan geija movement achepithei leh, ibolla Manipur sunga Kuki min dinpi ngamlou kiloikhomna khat le ni pengdohthei nalai ham? Detmo umtah ahi.

Tutua vannoija kidoudinga gotsa umjingho chu

India versus Pakistan

India versus China

China versus Taiwan

China versus USA

USA versus North Korea

USA versus China

USA versus all muslim countries.

Leiset chung hi versus a kipan ahin, versus a kichaiding ahi. Tua jong versus umbebe nalaiding ahi.

Vannoijin ahetphahlou, Manipur sunga Kuki le Meilhei jong kidinte jing ahi. Kukiten galjona ahinneiding ahi. Ahinlah, kumphabeppi vang genthei ithohdiu ahi. Ajehchu, gentheina beijin nopna aumpoi.

Tutua Manipur sung dinmun

Kuki le Meilhei kiboina hi Naga hon chance lahnop nan aneijun, Kangpokpi District kisemdohsa roll back na dingin UNC in pan alajinge. Hiche thuguh hi hunglolhing ponte, tia nuisat thei ahipoi. President's Rule jong hungkisubei ding, N. Biren in Chief Minister panmun ahintuhkit ding jong nailamchan aume. Chutengleh Meilhei le Kuki jong theineitah a, loichal kidel hungbangkit lhon ding ahi. Tutua hi Central Government in alang-alanga chomkhat suty eilha peh u tobang ahibouve. School kailaija summer vacation suty kilha tobang ahibouve. Gaal hi chejom nalaiding ahi. Ekilungkhatmoval uva, Pathen in Union Territory jong eipehnomlou lai u ahi. 

Israel ten jong "The Promised Land" kiti gamtep-gam alhun theina diu chun, gentheina tincheng athoh uve. Amahojong chu separate administration del ahiuve. Pathen in 40-days jouva peh ding ati ahi. Ahinlah, ahindan u avetleh alunglhaipoi. Pathen lunglhaina hinkho ahin man phat uvin, 40-years jouvin, separate administration ahinpe tan ahi. Eihojong hi hitobangbep chu hunghi maithei ahi.

Epichu hitaleh, sapte thuchih "United we stand, divided we fall" kiti proverb hi ichepi tokahseova, Separate administration imuloudiu ahi. Indian Constitution Article chujat khujat dungjuija muthei ahinai, tia kimoh neppi ding ahipoi. Kuki minna dinkhatna idinkhom tenguleh, separate administration chu abaisa aumsa ahi.

Pathen in Mosi adinpi bangin, Kuki chate jong dinpi jing tahen.

~ WAP

Share: