15/03/2025 (Sat): Union Home Minister Amit Shah in tuni sunnung in Aizawl hong pha a, Mizoram Chief Minister Pu Lalduhoma in Thuampui helipad ah ana muak hi. Union Home Minister Amit Shah in Aizawl khopi sung a kipat a Assam Rifles-te Zokhawsang a akisuankhiatna ding uh toh kisai program, Assam Rifles, Sector 23 Khatla, a hunzatna uap hi.
Pu Amit Shah in tuni hunzatna program pen Assam Rifles Camp suankhiatna kia ahikei a, hun hong paizel ding a leng Mizoram’ a dia hun poimohtak ahi, chi’n gen hi. Assam Rifles-te akisuankhiat ding uh India solkar in Mizoram mipite ngaipoimoh ahihdan suklatna leh Mizoram in ma asawnna dia phualpi solkar’ kipiakna ahihthu gen hi. Phualpi solkar in Mizoram leh Mal’sak state-te’ kivakhna thei in, kimawlna lam leh tourism lam ah theihtawp suahpih atupthu gen hi.
Phualpi solkar in Mizoram’ a dia nna asepkhit tuam² te taaklang' in, Mizoram a dia phualpi solkar in tup leh ngim tuam² aneih; cheng vbs 2500/- National Highway bawlna ding hiding ahihthu-te, Aizawl to Kolasib zotna lampi cheng vbs 1740/- senna dingte, Aizawl to Tuipang lampi National Highway bawlna dia cheng vbs 1600/- senna dingte, Mizoram sung mun tuam² a bamboo link road bawlna ding cheng vbs 100/- val senna dingte taaklang hi. Mizoram pen mun galmuang leh gam etlawmtak ahihzel theih adeihsak thu leh huaimah leng PM Narendra Modi’ vision ahihthu gen hi.
Union Home Minister Amit Shah in tuni nitaklam in Raj Bhavan zuan ngal a, zan khat giak in, zingchiang in Lengpui Airport a kipat in Assam zuan nawn ding hi.
©𝐙𝐨𝐠𝐚𝐦 𝐈𝐧𝐒𝐢𝐠𝐡𝐭
.JPG)
.jpeg)
No comments:
Post a Comment
Comments not related to the topic will be removed immediately.