MIPI TAHSAN THEI DING’IN VAIHOM HIUTE | Dr. Sir H.H. Mate

            Inam sung’u dinmun akivat na ahileh jachat jong a-um in, lainat jong a-um’in, lunghan jong a-um ji in ahi. Nam lamkai hon bolkhel anei khah uleh tilkhou sang’in, mit neilou, ha neilou bol’in akibol ji in ahi. Hiti hohi umda thei leh phalheh ding ahi. Mihem koima acham kim i-um pouvin ahi. Chule, nam lamkai ho hin jong mipi tahsan thei ding’in thu sei uhen lang, natong’u leh kipa um lheh ding ahi. Tuchung le amasa-a KZC hon Delhi a Press conference cancelled abollu le nationwide rally cancelled abollu thu a hin alunghang mi atam in ahi. Ni vei toh guon aneiju a cancelled jeh u ahije. Eima ho political rights le human rights ikihet them lou jeh uva min bolda uvin ati jeh a kinguon ki vohai kha ahi. Hitobang chu nung bol tah lou ding ahi. Pasal in kigel toh chetna thil iguon tah a ahileh toh molso ding dol ahi. Nationwide rally bolda uvin, keiho ka hung diu, ikihou diu ahi ati uleh tun hung uvin, jing leh hung uvin, achu tilou leh ka programme u cancel theipo ving’e ti pih ngai ahi. Eima ho joh in convince ding ahi. BJP te ki chepna hi het them ngai ahi. Papong (PM) le Sumbu pipa (HM) itahsan jeh uva imacha tong doh louva umdoh ihiuve. 

            Kanam mite ho Kuki chaten ipi sei hiutin, ipi bol jong leo hen ilo lhin theilou na diu a-um in ahi. Kuki hinom lou, Kuki-Zo jong pomlou namsung’ah a-um me. Namkhat hina a ipan khom lou uleh ikuong tollu kisuh ponte. Ihinao, ichon nao, ilam lhah dan nu, ithusei dan nu, inatoh u akitoh thei polai jin ahi. Nam dangten eiho sung’a sagu ase hi geldoh hiutin, phaten UN in eihetnao eimaho political identity bouvin um soh kei hiutin, SA/UT with Legislature thum ihiu leh One nation, One voice, One step in chepan taute. Inam sung’uva stumbling block a-um laisen imacha soh doh ponte. Avangse a ipan diu ahi. Meitei te le Naga ten SA/UT imu diu hi tin le ha tho-a adouvu ahi hi ihet soh keiju ahi. Amavang, eiho namkhat hina a ikipum khat uva, ipankhom’uva, Pathen deija nam lamkai hon lam najot uleh Pathen bou ahi gam eipe diu. Ama in petang’e ati leh centre a BJP sorkar le Meitei le Naga ten ting jou deh ponte. Tuni chan na movement ibol dan nu le ikuong tol dannu kisuh lou jeh a hi Kuki media channel in interview eihung bol nia chu SA/UT kithum chung chang eidoh jeh a kot akile lang’ah akihong’e kanati chu tuni chan na hi kot akile lang’a kihong jing nalai ahi. Hinlah, akihon ding dolla akihon na ding’a hi lung kitoh sella ipan khom thei teng’u leh hung kihong ding ahi bou vin ahi, sopite ho. 

            Gam kangailut jeh le nam kangailut jeh a journalist khat hina jalla hi Meitei-Kuki gal inei sung’uva hi Article 445 lang kana sut doh a WhatsApp a kahin post jing ahin, ka thusei hohi Kukite ding ngen ahin, hinlah koiman ijui pouvin, ichepi pouvin, eiho jong machal theilou hel’in i-um jing nalai uvin ahi. Hil ding ho ka hil in, pho ding ho ka phoh in, lampi komu ding ho kakomu in, hinlah hui lah a changvai kithe bep ibang’uve. Gam politics bol ihiu vem? Business politics bol ihiu vem? Kalung kham mong mong ahi tai. Nam lamkai achung lang’a ho hihen anuoi lang’a hohi jong leo hen phaten kikhuol hoi sel uvin. UTV iphut doh vin, tua hoilang gei gam hi tauvem? Burma lang ajot uham, hoilang ajot’u hitam? Gal umpet na gal kap lou ten tua hi hoilang gal ikap diu ham? Mipite tahsan theija thu isei lou jeh ule na itoh lou jeh uva mipiten ichung’uva tahsan na lhingset anei thei tah louvu ahi. Nam lamkai ho jong phaten kigel uvin, kikhuol uvin. Gam ngailu ihiu leh gamtum mu tei na ding’in thi ngam in pang hiute. Sum ngailu ihi khah ule vang nam lamkaija ipan nao dalha hiutin, miching, mithem, mihang san, agam ngailut na a thi ngam, mi neijou, mi kitah ho kilhen mai leo hen gamtum imu joh diu ahi. 

            Slow and steady wins the race chepi ding itiu jong leh chepi ding ahi. Hinlah phat kiti hi alem chang phat umji ahi. Phat lemchang um sung’a ibol diu ho ina bollou jeh uva tuni channa hi ichung thu-u phatea kisei khalou ahi. Nam sung’a lamkai Inpi ho, haosa ho, ITLF, CoTU, HTC hon phaten Kuki-Zo Council ho tosot jing uvin. Namsung’a nam lamkai judon na um khah uleh nga doh uvin, mipi vetton theijin hinkho mang pan taovin. Nampi kuong tol nahiuvin, kuong phate a natol diu ngai ahi. Chule KNO le UPF a nam sepai lamkai hon jong lamdih lam jang jot pan tauvin, mipi tansan thei le vetton thei jin nam sepai nahi nao podoh pan tauvin. Inam sung’u hi adih thei kiguo pon ahi. Kisuh dih pan taute, gal jona ichan thei na diuvin, sopite ho. Pathen lhacha hon jong lhagao mangthai ding ho gelkhoh pan tauvin, houbung mipiten jong nampi lamkai ho ding in taona nei pih jing hiute. Ipan na thei cheh u um ahin, phate chan eima eima panna thei jah gam le nam’a ding in pan la cheh taute. Lamka khopi ah jong gamtum’a ki vaihom na thum ihiu va ahi leh abung abung’in kikhen tel da taute. Chin, Mizo, Zomi thu a boida phot hiute. Kukite ihi naovin mi tahsan theijin pan lakhom hiutin, SA/UT iti ti uhi Centre sorkar kom ham, Pathen kom ham’ah kithum doh loi hiute, kanam mite ho.

****

Share: