KENGKE AGING TAI: ARTICLE NO. 23

✍️ Pu. Khakhai @Stoney BaiteKuki

Date: 01/03/25 (Saturday)

               Amasan kanam mite hojouse kangailu na leh kajana sangtah kahin pe masan, chuleh tuni chan a galjeh a gemun toumun genthei tah a hinkho mang ho jouse jong lungthim a kitilkhou a tha thah lung thah keng pum a malam a Pathen kom a nampi dinmun lainat pi a taojing pum a malam noding in ikitilkhou uvin, achesa a itaonao jal in gelphah Louvin Nisim 9th February 2025 nichun Manipur a Presiden Rule tichu (Suspended Animation) koi ahitan Pathen in pha asah a lungkhat thakhat a mipi kaihoi ho apan pouleh KIPANA KOLNI* hungsoh nante ti amasa pen in itah lahnom uvin ahi. Tunia *KENG KE AGINGTAI* ti Article ahung kijih lona pen hi KENGKE  akiti tengleh Malaiya pule paten lou/bulei ho a chang le mim honna a ana nei u manchah khat ana hin ahi. Hiche KENGKE chu loubuh a kem chung a kikhaiya sunthip jaanthip tengleh lou a chang le min ho sahon aneh nalou ding a kivoging ji a lou hon na ding a kimangji manchah khat chu ahi. Iseidoh nom uchu tunia *KENGKE* kiti pen hi akhen/avo ging a ipan deuham? A KENGKE a chu ipan deuham? Ahilouleh Gamsa bang a ajam ding chu ihi diuham? Ti hi kilhen phat chu ahitai. Panmun dihtah laha a pankhom a thum kicheh a umphat chu ahi mong tai. May 3rd 2023 akon a Kukiten ina thum jing u CM Biren atoh mun a kon in haihen, Manipur a PR umhen tia Rally (Kijuina) cheng a numei chapang in SLOGAN ana kisam chu tunin aguilhung tai iti diuham? Ahilouleh kol hon PICTURE ABHI BAKI HE tivang hi hiteiding ahi. Kengke gin dungjuiya lamding ham ti hi lunggil tah a thajit khom ding hi akul pen tah chu ahtai. Apat a pat a achai na chan ngaileh simding in tiem na kahin nei masa in ahi.

1.JUKO A MEIKHU KILHUT KHUM HUNG BANG DING

               Thinglhang lou lho teng leh chang le mim aki khop tup nung a ginung lai leh loulaiya jucha ahat in phol lah jucha ana cheng in chuleh ako a jong ana cheng jiuvin ahi. Hiche phatlai lehhin,Juko a mei khu ana kilhut jin Juko chu aphi lang pate chan a kising jin, chutengleh Juko sung a um Jucha hihenlang Gul le tang hijongleh ajam doh nading mun aphi kising ahijeh in anop le ada bang theitei tei ding ahi tai. Tupet Kuki idin mun ding hi hitobang hunghin te tia nangaito kha hem? Ajehchu Manjpur a achesa 9th February 2025 nikho a pat in Presisident Rule (PR)/ Suspended Animation mode a ahung kiko hi Pule Paten *SUHLHEI JONG LE CHU KA LOULAI TOULHAI JONG LEH CHUN KALOU LAI"* tia kisei na ding hung hiding hitam? May 3rd 2023 nikho a Kuki chate iki bolna sumil ihi vang leh kimaito pi ding *"AMAI TONG SOM"* tobang a igel a iloungneo nao nailam chan aum in ahi. Lou ngah ahilou leh lou hongpan *KENGKE* ahin vohgin a  lou a chang ne SA ajam khun *KENGKE* vogin pa mihempa akichat ahipon *KENGKE* gin joh akichat jeh joh a jam ahiti hi hetdoh thei chu ahin ahi. Hitobang ma a hi tua jong Centre Government in gong *KENGKE* ahin vohging ahin, Kuki nam mite jong athu mei meiya ahilouleh agin mei meiya nung chon ngam ihivang uleh *KENGKE* kipah ding ahipon avogingpa joh in akhut abeh a einuiset deu galjoulou nam mite chu ihidiu ahitai. Gal kipat til laichun *'GALKAP HON TAHCHAPA KAPACHAPA THISAN VAT KHAT AUM LAISIA KAGAM KANAM A DIA PANG DING KAHI'* tia Namsei ho ahin, VV hon anasap uva meipum ana choi uva thisan le long anaphal u ahitan, chuleh Duty post mun a genthei na jouse athoh kang taovin, tuhin aphet lhah phat chu ahung lhungtan ahileh nupi ho touna hihen Dutypost mun ho akiphet tan, chuleh gam le go jong khin khen in aum tan ahi. Tuhin  *'TAHCHAPA KAPACHAPA THISAN VAT KHAT AUM LAISIA KAGAM KANAM A DIA PANG DING KAHI'* tia sam ding hi Political Leaders,CSO chuleh Mipi lamkai ho hiding ahitai tihi itah lah nom pen uchu ahi.

2.GALKAP SANG A MIPI LHEM LHA THEI DING HUNG KI HOL DING AHI

              Malai Pule pate paocham tuh in *'ACHOL NEH SANG IN AMANG NEH ATUI JOI'* anatiu hi tunia jong Kot khabul ahung geitan ahi. Ijehem itileh Govertment in thal choi sang a mipi akichat a agin joh ahin tuhin Kukite vang mipi thanei na sang in hemle thal joh hi thanei dan a igelnao aumjing pa hi pailhah phat chu ahitai. Achesan hemle thal in gam le go ho ahithei na chan in inahuh uvin, tuhin mipin kiloungtoh tah a huh phat chu ahitai. Cente hin Lamkai mipi tahsan um tah tah ho ahin holpan diu ahitai hitobang ho chu ahin thujo teng uleh mipi ahin lhep chatvei sahdiu mipin jong Lamkai hangsan Lamkai thudih ahitia iki lheplhah sah diu nikho angaitan ahi. Tehse hon *PHAICHE DING AKI MAH POI* anatijiu vin tunia jong midang ten Kuki te hi tobang a hi ihin seinao um khading ham? Tihi kikhol phat ahitai. Masanglai chun pacha ni hin vanleng hungleng chu achapan Hepa vanleng khu aneo sam me sihmi tibep ahi e atin, nikhat hi apan  achapa chu Airport a apuijin ahileh apa chun achapa kom mah Nikhat a vanleng na mu ho chu hiche khu ahi tia ako pih leh achapa chun vo hepa vanleng chu alen sam me Saipi sang in alenjo e atin ahi. Ilahdoh nom uchu boi kipat tillai chun Kuki te I Political Demand uhi Saipi tobang a muphah chu Anahi in ahinlah tuhin alim agong jong mutheiya umlou ding hitam ti hi mijouse lungthim a thu doh lenpen a ikidoh nom uchu ahitai. Mipi lheplhah a inchen semthei na ding phat lem chng tamtah hung umding hitobang holah a ding jou ding chuleh ding ngam Mipi kaihoi ho ium pou pou uleh SA(UT) vang imu tei tei diu ahi. Ahinlah bailam cha SA(UT) hi mikhat insah na kichai thein a phat hung lhung ding ahitai.

3.LAST STAGE AHI TAI

               Mihem khat Cancer natna anei teng leh aphat cha Doctor akivet sah a aphat cha Cancer chu akimat doh a ahileh jendamthei ahi. Ahilah Last stage ana hikhah teng leh vang jen dam thei ana hiji talou ahi. Hitobang chun Kukite dinmun chu ahitai. Achesa may 3rd 2023 nikho a kipat SA(UT) neipeu vin tia numei chang jeng in jong ihinsap uva bolthei chan ihin bol uva tuni chan hungkilhung ahitahjeh in,tunikho hi Last Stage lhung ihitah jeh un tehse hon *THIKON KAM CHENG* atiu bang a nungle theilou thilthum chu ahiti hi mipi pui ho hihenlang mipi hijong leh thipi ding ngapcha a thajit ding hi ikitep nao sangpen chu ahi, tuhin President Rule ahijeh a SA(UT) thum toh akimah na umlou ahijeh in mipi puiho Hansan ding hi apoimo pen leh akhoh pen chu ahin, Mihem khat in atheni na jouse akichai jou nung hijongleh Apu Apa  min a kihanlah teng leh tha thah kipeh be ahibang a Last Stage mun lhung ihitah jeh un kihanlah pum a malam ino diu hi angaikhoh pen chu ahitai. Mihem in *LAMKIM* akiphah tengleh nung che jongleng akim ahitan akitin malam joh akijon thei jin ahi. Ahinlah *KHO LHUN KON DONGKOT* akiphah teng leh koima cha ahung kipat na mun nung jot aum ngaipon ahi. Isei doh nom uchu tunia *DONGKOT* iphah nung uva malam nopei sang a kinugle ding lungvul mip Lamkai hihen Political Leaders CSO lamkai ium khah uva hileh napan mun nadalhah phat chu ahitai. Ajeh chu Kukite ding a hitobang phat a poltical Seperation neidoh lo uva angai ngei a bang a inung um kit pou pou uleh, tu maban a Kuki min a hung peng ho hi Kuki ahijeh uva akisih nao nikho hung lhung ding ahitai.

4.THUKHUM KHANA

               Masang in mit cho thum in SAIPI ahet dan ana kiseiyin khat hin Saipi chu atham in ahileh A BILKOL atham khan ahileh ama Sai hi GODAL tobang ahi anatin khatpan tham kitin ahileh a AOIPOH atham khan Saipi hi Bang tobang ahi ana tin, athum na pan Sai amol atham khan ahileh Sai hi GULPI tobang ahi ana tin ahi. Hiche a kon a itah doh nom uchu achesa in SA(UT) hi mudan chom cheh leh hetan chom cheh in Demand anakibol jong leh tunikhon KENGKE kivoging ahitah jeh in mitcho hon Saipi chu amit chotjeh uvin thil chom chom bang in gel jong leh mithah ho a ding a Saipi ana hin ahi. Hitobang a chu kanam mite ho mitcho ho bang a thilchom chom sei a SA(UT) muding ahipon mit hadoh sah a kipum khat a Vaikhon phat kile vah ding ahitai.

         Angi le asim jouse Pathen in Kilungkhat a vaikon khom thei ding in phatthei iboh pih tao hen.

Kakipah e.

Aban Article no 24 ana kit tao hite.

~ The Pain Today/Idea of Kuki

Share: