OUTER MANIPUR A CHENG HOHI KUKITE AHIUVE ~ Dr. Sir H.H. Mate

MEITEI ho, Kacha-Naga ho, Muslim Pangal ho chule Kol le Vaiten Outer Manpur a cheng Kuki Land a cheng hohi Chin te ati pouve, Mizo te ati pouve, Zomite ati pouve, Chin, Mizo, Zomi ahepha pouvin ahi. Kukite ati soh kei uvin, gal jong hi Meitei-Kuki gal ati uvin ahi. Meitei ten atha jouse chu Thadou hihen, Zou hihen, Vaiphei hihen, Lushai/Mizo hihen, Paite hihen, Sukte hihen, Gangte hihen, Mate hihen Simte hihen, Kom hihen, Hmar hihen, Aimol hijong leh Kuki macha hat le ati uvin ahi. History record a Kuki ngen ihi jeh uva namdang ten adihchet aseiju ahi bouve. Eiho kilep lep jong leo hen Kuki ihi naova eiki that u ahi bouve. Hmar Army a-umpoi, Haokip Army a-umpoi, Gangte Army a-umpoi, Zou Army a-umpoi, Vaiphei Army a-umpoi, Mate Army jong a-umpoi. A-um jouse hi Kuki Army le Kuki Village Volunteer akiti uve.

 

            Jiribam lang'a Hmar Army tia kisei hi athi thina diu aseiju ahi. Kuki ahiu athet uva Kuki Army akiti nomlou uleh hung  vang se diu ahi. Kuki thi a thibe kit diu ahi. Kuki Army inei uve, Kuki Village Volunteer inei uve, adang kiminahna dangho hi seilouva pha ahi. Khonung'a iboi diu, imasang'u bin na hung hithei ahi bouve kanam mite ho, inam sung'u hi sempha hiute iti uleh eimaho amimal a ikisemphat diu ahi. Kilung khat hiute, pangkhom hiute, kipum khat hiute iti mong mong'u leh vannoi jin eihet nao Kuki hi adeimo um jong leo hen ipom soh kei diu ahi. Chin, Mizo, Zomi Lamka sung'a i-umsah uhi ipailhah uva Kuki a i-umsoh kei uva, politics kilung toh chetna eihin bol thei phat uleh gamtum chu eikipe diu ahi. Tudin mun na ikibung khen nao hi ichepi lai seuvin imacha mu neipou te, kanam mite ho Outer Manipur Kuki Land sung'a cheng jouse hi Kukite ngen ihiuve tihi sumil poute. Kuki minna gamtum'a kivaihom na (SA/UT/State) hi kilung toh tah a Kukite ihinaova hi ithum uleh imu diu ahi. Amavang Zo Land, Zogam tia Chin min, Mizo min, Zomi min na ithum uleh imacha imu lou hel diu, gampam mi eikiti diu ahi.

 

            Achaina kahin seinom chu Eimite hi Kuki a iki vaipoh lou uva, Kuki minna gam (SA/UT) ithum lou uleh imacha soh doh ponte. Kitona ding tia Zo kimang jong hi ajah nomlou nam sung'a um nalai ahin, paidoh/lah doh thei ahi bouve. Kuki thengsel in thusei hiutin, gam thum leo hen hungpha pen ding ahi. Gamtin toh Kuki ichopol jeh uva hi anaikuol doh ahi tai. Ahi ding dol hi ihisah theilou jeh uva koima chan inahsah louvu ahi. Hijeh chun Kuki Land Outer Manipur sung'a chengho Kuki pom lou ho phaten na khonung diu gel pum'in kigel phau vin lang, Kuki kipom cheh tauvin.

***

 

           

 

Share: