JAMTHANG CHUNGCHANG THUA DONBUTNA

MR. JAMTHANG CHUNGCHANG THUA DONBUTNA LE MIPITE HENGA HETSAH NA

Date: 10 Feb, 2025

Amasan muntin’a um nam mipite ho nabon’un kajanau salam kahinpe uve.

Mr. Jamthang hinkho beina thudol’a achapa Mr. Malsom in ama YouTube Social media "Kuki Channel" mangcha a video clip thuso ahinbol akimun ahi. Ama ahingpa tah in hinkholem na anei ahijeh in lainat nale pohnat na anei ding chu kahet them peh uvin ahi. Ahin, apa natoh thilbol ho hin ichan'a nampi natoh asuhboi theiya chule mipite bol genthei na ato ham ti hechen louva organization le lamkai ho themmo channa thu ahinsei hi nopmo akisan ahi. Ajehchu ama thusei hin organization limso jong atohkhah ahin, Mipite lungsung'a mukhelna lentah jong ahin sodoh sahthei ahi. Hijeh chun noiya bang in donbut na ahung kineiyin ahi. 

Mr. Jamthang NSCN(IM) GPRN Assistant Political Organizer (APO) hi galjam civil mi ho chunga akimanchah dan ho ahoilou jeh chun Organization in a Phungpi (VPC) Tengnoupal lamkai ho leh Kuki Inpi Tengnoupal lamkai ho kom’a jong kamchang tah’a ahilthem dia thu ana kipehsah ahitai.

Mr. Jamthang hi Kukiten Kol le Phai a gal isat laitah uva gal-mite hotoh kithokhom’a Nu-nao chapang ho chunga khanset na nei chule ama chang phatchom nadinga gamgi (border) a Kai le don boljing khat ahin, tuni chan’a Kangmangphai a cheng ho Lhilon na gal-mi khat ahi.

Mr. Jamthang hi NSCN(IM) member khat ahijeh chun galmi Meilhei PLA/ SNA/ Junta Kol sepai holeh noidou Pyusawhti kitiho toh kikhutjop jing ahin, lainet umtah khat chu May 21, 2024 nikho a Tongkyaw le Teijang kikah’a Nam sepai KNA(B) lamkai len (1) le anung jui mi (2) chule Drone tol them mi (1) agom’a Nam sepai mi(4) hon thina-ato na jong panla khat chu ahi.

Kolgam sung boina jeh’a aLu hin jampi galjam Tongkyaw khomite hi India-Burma gamgi Namly kho a khopem (galjam) ahiuvin, Mr. Lentinmang le Mr Jamthang ama ni jeh’in jan khangkhang leh galjam ho umna Camp sung’ah alut-ji uvin galjam ho lung mong-mo in abol genthei jing uvin, hijeh chun Kihinso nadinga ajot nau Namly kho apan in 2024 May last week le June first week lang chun Phailen le Mantou lang’ah hesoh genthei tah’in ahung nung jamlut kit tauvin lung nop-mo aum lheh in ahi. 

Chuleh Nisim June 15, 2024 nikho chun Mr. Jamthang le aloiho hin galjam civil ho kithopi nadinga hung kithot Sum Ks – 15,000,000/ Motor bike Garineo (5), Phone alui athah (11) chuleh Lou le ai kipo jouse jong ana lahpih uvin, hicheseh hilouvin Nam galsat ho manchah ding thil ho leh Garineo ho jong alahpih uvin, ahinpo hojong aman kit-uvin amaho (NSCN-IM) Camp sung’ah apuilut uvin Nidan (8) sung chun melsetah’in abol genthei uvin ahi.

Chunga hung kisei mabang chun Mr. Jamthang hi gamsung boi laitah’a mipiteho chunga hepina khankho neilou mi ahin chukitleh Nampin gal akisat laitah’a galmiteho langa panga Nam natoh suboi jing mi ahijeh chun Mipi(civil) nei le gou alahpih ho jouse nungsah sahding chuleh tukal Nampi natoh asuhboi lou nadinga thupeh bolding chukitleh phatea houlim neiya Nampi natoh suboi jing NSCN(IM) khutsunga aumden nalai ho jong puidoh sahding lunggel jong kinei ahijeh’a kiman ahi. Hetding: Mr. Malsom houlimna Sum lakh (5) asei hi akithum ahipon, mipi ho sum alahpih jouse ho nungsah sahding bou kiti ahi. Chuleh Voh thasah ding kiti jong jaolou, kiseilou ahi.

Mr. Jamthang hi Dan dungjui chun thudoh akineiyin NSCN(IM) sunga akimanchah naho leh Mipiteho chunga themmo na aneina ho ban neichan akidong’in, amo-na chunga them akichan nading anei tapon ahi. Hiche laitah chun a insungmiteho heng’ah Nisim January 27, 2025 nikho teng athu seichai doh ding in thupeh akineiyin ahi. Ahin, Nisim January 28, 2025 nikho geiyin akingah in ahung pouvin ahi. Khonung chun a insungmite hi Nisim January 29, 2025 ni teng hung ding in akijain, ahivang chun athu tenna um masang January 29, 2025 ni jingkah in ahinkho anabei tan ahileh phamo vang akisah lheh in ahi.

Achaina hetsah nom chu; tulaitah a hi Kolgam Mipite hin Junta Kol sepai thanei na jouse suh lhah ding, Federal Democracy kivaipoh na tundoh nadinga Jat namkim in pan alah’a gal asat laitah ahin Kukiten jong nasatah a pan kila ahi. Hiche galpi sat nasunga hi Nampi sepai Gollhang tampin jong ahinkho anapeh ahitai. Nikho khat nileh Kukite Zalen nadinga tunikho a hesoh genthei tampi kidouva pan kila jing ahi. Hitabanga Zalen galsat laitah’a galmi teho toh pangkhom nalai Mr. Lentinmang le aumden nalai anoidou hon jong phaten kigel phau hitin, aphat hoipet a nahung potdoh loi ding uvin Temna kahin nei uve. Chutilouva galmi teho khut apan ahung kimetdoh khah leh koiman achung thu asei thei louding ahi. Chuleh Mr. Malsom in jong Napa Jamthang, thina thudol hi tunung tuma leh thuso nahin bol kit lou din hetsah na kahin nei uvin ahi. 

Francis Kuki

Info & Publicity

KNO/KNA - Burma

Source: SOCIAL MEDIA

Share: