BOINA ITOPET A THUDOH KINEIJI HO ~ Pastor Hegin Misao

Boina le hahsatnaho ihinkho a itoji tengle thudoh thum hi akinei ji e; (1) Ipi dinga hitobang hi kachunga lhung ham? (2) Ipiti kathoh ding ham? (3) Ka khonung hinkho ipiti ding hitam?

Phatecha a ikhol toh chet leh thudoh khatna hi panna bei thudoh ahibouvin, doh jong ngai behseh lou ahi. Boina le hahsatna itonau ajeh chu ichen nau leiset chung hi natna, thina, lung lhahna, gal lelna chule vangsetna umjingna mun ahijeh ahi. Leiset chunga hi thil jatchom chom asoh ji in, hiche ho jouse hi ipi dinga hitia hi umham tia Pathen koma ajeh doh thei jong ahipoi. Pathen heho chu hahsatna le boina a kona hoidoh diu ahi tia Pathenin aseina jong aumdeh poi. Hijeh chun “Ipi dinga?” ti thudoh hi akitoh behseh pon, doh dinga lom ahipoi.

 
Thudoh nina a “Ipiti kathoh ding ham?” tihi Pathen toh umkhom jing le hingkhom jingte dingin vang itobang boina le hahsatna hijong leh thoh lelding imacha aumpoi. Henge, boina le hahsatna ito hou chun lung lhahna lentah eipe nauvinte. Ahinla, thoh hahsatna ito laitah uvin jong Pathenin eilhamon uve. Pa Pathen thahatna chun, alhasam le thalhomte jong chu thahatna apen, thoh jouna le thoh theina ding thahat chu apejin ahi. Christa a ahinna kiphudet miteho chun hesoh gentheina sangtah um henlang, kilingle jeng jonguleh lhu loudiu, kijamden loudiu ahi. Boina le hahsatna jeh a ithudoh uchun donbutna hoitah hinpe thei deh ponte. Hijeh a chu aphachom loudinga lunglhahna le lhahsam nathei thudoh inei sanguva, Pathena ikingai uva ahileh Aman ipohgih u eisuh jaang peh uvin tin, hoidamna le kithopina eipeh diu ahi.
 
Thudoh thumna a ikhonung diu hinkho thudoh ineiyu hi gelthei leh seithei ahinai. Ahivangin, Pathen’in ihinkho uva nikho thah khat eipeh ule nikho lhumkeiya ichejom nadiu alungsetna jong eipeh loudiu ham? Hahsat gentheina toh jeng jong lechun Pathenin nakaithou intin, muthim a kona khovah namusah ding ahi. Hijeh chun boina hahsatna ito jeh uva thudoh jatchom chom ineiyu chu lungneo pou hite, ajeh chu Pathenin ama tahsan ho chu kinepna, thahatna, lungmonna pe intin, boina hahsatna ho chu muthim bang jeng jong le, Christa jal’a tahsanna a kal sondohna inei tengu leh khovah chu imudiu ahitai.
 
Solchah Paul in hitihin anaseiye; “keihon Pathena kona lungmonna kaneiyu, hiche lungmonna chu hesoh gentheiya umteho kalungmonsah theina dingun, hesoh gentheina lah a jong aman eilungmonsah jing jiuve” (2 Cor. 1:4). Leng David in genthei hesoh pettah in hitihin anataove; “O Pakai, kataona ngaiyin, kaka ka hi naheng hung lhung hen! Kegenthei nin nei nungsun loujenin, kahenga hung kiheiyin katao nin neihou loiyin! (Ps. 102:1-2).
 
Khaiye, achesa boina le hahsatna ito hou haimil uhitin, hiche a kona ipi ikijil doh uvem tijoh geldoh uhite.

~ Pastor Hegin Misao
Thangkanphai, Saikul,                         
Kangpokpi District.

Share: