Outer Manipur a cheng Kuki-Zo chaten Separate administration/Union territory with legislature India Government komma ithum/ingeh uhi imu, imulou diu eiho a kingam ahije. Iding'a eiho a kingam ahi tia kasei ham itileh eiho dinmun tatoh a kasei ahi. Namdang ten gam athum uleh peh ding'a lomho chu anam sung'u akito pou uleh centre sorkar in confidence/tahsanna anei uva, kipo jou naovinte, pha na vinte atiho apeh ngam' u ahi. Eimiten 1960 apatna gamtum eihin thum pan' ahitan, i-atileh amu, amal mondoh thei lou ham? Ipi jeh a kum 60 val ta-a peh ding'a lomtah Kukite gam tum'a kivaihom na kipe doh theilou ham? Nam sung'a lamkai ho le miching, mithem ho kikhuol pan tauvin, there is something lacking um hitei ding ahi.
Kuki-Zo chten na khat itoh u, thil khat ithum uleh eimaho sung'a uilut a-um ji in, uilut ho chu anaikuol doh in, hinlah anaikuol chu imeh doh pouve. Inam sung'uva hin natoh khom ding, kipum khat ding, pankhom ding iti teng'u leh asukeh ding, asuboi ding mi apeng doh ji in ahi. Hitiho jeh a ithil ngaitona jouseu va losam jing ihiuve. Tua jong hi SA/UT hi ithum'u ahin, nam sung'a kibung khenna sem um ahi. chule, akhoh tah khat chu sum le paija ikitah louvu hi ahi.
Nam lamkai ding hi mipiten election ibol diu ikilhen diu doltah ahi. Selection a iche jeh uva lamkai kitup lou ipan sah uva, amitmo, alhahsam teng'u le iseiset, idem kit nu ahi. Hitobang nam mite ihi jeh uva tunichanna ipute-ipate gam ichen naova hi atum'a kivai hom thei loute ihiuve. Nampi lamkai ding michu Pathen neimi, Pathen gingmi, tao jing mi, numei ja kitup mi, sum'a kitah mi ahi tei tei ngai ahi. MLA/Minister ina nei houvin sum ana ngailu beh seh uvin, igam'u tamtah ana joh doh jeh le haosa hon jong sum ana ngailut val jeh uva gam ana joh doh jeh a tunia hi reserve forest, protected area, wildlife sanctuary a ding'a sorkar in ahin phondoh ahi. Hiti hohi koima bol ahi pon, sum duval MLA/Minister le haosa ho jeh a hung ging doh ahi bouve.
Tun SA/UT hi 2023 apat in eihin thum pan uvin, hinlah asuh, asah a-um thei polaijin ahi. Kitah hiutin, kilung toh leo hen Pathen in jong lampi eisem pih diu ahin, ikitah louvu, ikipum khat thei louvu hin ima jouse atin ahi. Thadou sung'a lungthimse keng umda hen, Zomi sung'a lungthimse keng umda hen, ibon chaovin Kuki-Zo pom cheh hiutin, phaten kalsuong leo hen lampi hung umdoh thei ding ahi. Akinganse KZC bou hi tahsan ding, tosot ding ahi. SA/UT mu le mulou ding thu hi eiho a kingam det kheh ahi bouve. Idin naova pangdet kheh hiute, sopite.
***
.jpeg)
.JPG)
No comments:
Post a Comment
Comments not related to the topic will be removed immediately.