NO SOLUTION WITHOUT MOVEMENT AND DIPLOMACY: Dr. Sir H.H. Mate

Kukiten SA/UT kathum uve iti uvin tuni chan in mipiten gamtum'a ki vaihom na Centre sorkar in nei pedoh tauvin tin kiphin na inei pouvin ahi. Nam lamkai honla hi tobang bol hiu te ati khapon ahi. Ehsanten gal eibol khum phat uleh ikiveng doh dot uvin ahi. Pu Tiger in SA/T hi kapdoh tho ding ahi anati hi adih chet asei ahi. Gal bol ding ikichat ule ipi imu diu ham? Thisan, naisan alon ngai ahi. Myanmar a sopite gal bol khu Kuki Army hon jong chepi uvin, iding'a alengchom, alengsao a Ehsante khopi ho lhut ding najah da uham? KVV hohi Kuki Army hon natosot di, natil khou diu, napan khom diu, Ehsante hi vohnou della del ding ahi bouve. Business war ahi pon, Land war ahin, hijeh chun gam neidoh/huh doh na ding'in pan la pan ta leo hen phalheh ding ahi. Taona mang ding hon taona mang naovin te, vaihom ding hon vaihom jing uvin, galkap ding hon galkap uvin, lekha sun ding hon lekha sun jing'u hen, ipan na thei cheh uva pan la pan kit mai taute. Thiding kicha poute, leisetna khat vei thi ding'a peng te ihiuve. Khonung'a chate le tute ho khankho ding gel pih pan taute.

 

            Gal neija diplomacy them loute le movement nasatah neilou te ding'a chu solution umlou ahi. Tua hi gamtum hi mijousen idei mong mong'u ahi leh diplomacy lampang ahat angaije, chule public movement/demand ahat angaije. Idin nao SA/UT hi ikhellou hel diu angaije. MHA palai tenin peace um masa henlang chuteng le Kuki te demand/problem sei hiute ati lhon chu KZC hon pha nasah khah uleh akichai ding ihi mai uve. NSCN(IM) te kijou lhep na tobang bep hung hi ding ahi. Ajeh chu igam uva gal pan doh hi abul Supreme Court lawyer minthang khat pan aseidoh soh kei ahitai. Centre a aguh a toson RSS, Papong le Sumbu pipa ho ahibou vin ahije. Houin jong dem louva kihal lha a imacha kiseilou, Manipur thuboi na kisei nomlou, Manipur kivil nomlou kiti chu mingol pen in jong ajeh ahet doh ngai ahi. Manipur a gal umdoh hi Detolpa le Sumbu pipan gamtin ngoh lhon henlang, seilhon jong leh amaho asung lang ahet ahi bouvin ahi. Ahet jeh uva gal um jong leh khoh asah louvu ahi. Eiho/Kukite hi tha gam ding atiu ahin, Van Pathen, eiho Pathen pa nomlou ahi bouve. Tuchung'a toh gamtum SA/UT/State hi imu joulou uleh temma kimu talou ding ahi. Chance hoitah inei laitah uva galkap ding idon lou jeh uva boi ihiuve.

 

            Nam kitoh loute, kilung khat loute, pangkhom theilou te, kiki chato te ina hikhah jeh uva KVV hole PP le MS regiment hon alengchom, alengsao ho ahi ding bang'a analha doh theilou ahi. Lamka lang'a hi nah chang salla hi thum bou Sugnu, Tronglaobi le Moirang a kilha lut nah nah ana hi bouve. Lamka langten alengchom, alengsao isem theiju, ineiju hi Kanggui langhon nei uleh Sekmai, Thoubal chule Imphal khopi jong alhut diu ahitai. India sepai ho ginding ahipoi, amaho toh kidou ihi pouvin, Ehsante thingnoi miho le AT le ML ho toh kidou ihiuve. Gal hang te ihiuvin, gal hi ahiding dolla ibol louvu ahi bouve. Ipute, ipaten British te chu PP a alhut u hilou ham? Iding'a eihon imelma Ehsante PP le MS a lhut ding ijahda uham? Hichu ilosap nao ahitai. Tua hi itih leh Ehsante hungkon diu ham? phate cha nam sepai hole nam volunteer ho kigingsa dem'a na um diu ahi. Chule, nam lamkai KIM, KIC, ITLF, ZC, MPC, CoTU, HTC, KISH, KIT, HI, chule KCA, ZCA chule adang dang hon KZC hi full support nabol diu ngai ahitai. Akitosot themte machal uva, anatoh naova khangtou, gal jona anei ju ahi. Akitosot nom loute vang chu man thahna  lhalut ahiuve. Imajousen phat anei ahin, phat kilem khat ilha so tah jeh uvin parliament session 3vei um sungin movement inei lou jeh uvin akisei ging tapon ahi. Masang ti chu, 2023 le 2024 kum bul lang chun SA/UT a ding in movement/demand ana hat leh tua hi akichih khat kimu ding ahitai.

 

             Gal kineija gal kaplou/gal sat louva gamtum mu ding kiti chu ahi thei lou beh ahi bouve. Kum 2023 gal kipat tilla patna thal tamtah cho hiute, amu ninglhing'in cho hiute, alengchom, alengsao (PP le MS) tamtah sembe hiute ana kitichu ajeh um ahin, ajeh umpa chu sodoh ding aki tileh ajahda nam sung'a umkit jeh a tua hi SA/UT jong hi ging doh behseh talou ahi. Ivang'u asetna ahileh Kolnah sangten by force a peace ahin sem diu, SA/UT kichai ding ahi bouve. Hiche hi imasang'uva um ahi. Thih hi asat pen na akiden leh pha ahin, adap phat leh iden den vang'a apanna umtalou ahi. Hiche dinmun lhung pan ihi tauve sopite. Kana thu mopna ho jouse ana bolleo hen SA/UT jong kimu tei nante. Tunvang kaging chabeh ta pon ahi. Kolnah sangten asei mah thah tei ding in aumbou vin ahi. Amavang, tua hi diplomacy ithep uva, movement toh ahatna ahileh lampi umthei nalai ahi. Amavang, SA/UT hi tem ma vang imulou diu ahi. Jing le thaija SA/UT muding'in kinep da mai uvin, It is going to be a long process. Wait till you die and till you get SA/UT.

*****

Share: