LAMKA: The Capital City of Kuki Land: Dr Sir H H Mate

             Kukite hi koiho ham iti leh district dang’a cheng jouse le Lamka khopia cheng Mizo, Zomi, Chin kitiho jouse ahiuve. Kuki Land sung’a hin Chin kiti a-umpoi, Mizo kiti a-umpoi, Zomi kiti jong a-umpon ahi. Abon chaova Kukite ngen ahiuve. Kukite ahi jeh uva Meitei, Naga, Muslim chule Hindu ten Kukite eitiu ahije. Namdang ten eiho Kukite hi Mizo eiti pove, Chin te eiti pouve, Zomite eiti pouve, Seijong asei ging pouvin ahi. Eiho joh ingol jeh uva iki joh le le uva Chin, Mizo le Zomi isei ging’u ahi. Myanmar Chin State a chu Chinte ihi naove, Sagaing Region avang Kukite ihiuve. Mizoram, India sung’a vang Mizo ihinaove, hinlah Assam, Arunachal, Nagaland chule Tripura State ho’a jong Kukite ihiuve. India state dang jouse a jong Kukite eiki tiu ahin, koima cha in Mizo, Chin, Zomi eiti naisai pouvin ahi. Bangladesh a Chittagong Hill Tracts jeng’a jong Kuki-Chin eiki tiu ahi. Hiti ahi jeh chun ihinao Kuki hi tuhdet hiute, pom chah kheh hiute. Kuki hi Thadou hole Khongsai hon athipi got bang’in Gangte, Mate, Lushai, Paite, Simte, Suhte, Thadou, Vaiphei chule Zou recognise tribe jousen tuh chah kheh leo hen inam sung’u dam tante. 

           Nom leo hen, da leo hen India sorkar in Kukite hi Kuki Land eihin semdoh pih phat uleh Lamka hi Capital City hithou thou ding ahin, hiche Lamka sung’a cheng Chin, Mizo, hole Zomi ho jong nom leo chun da leo chun Kukite nahi thou thou diu ahi. Zomi hon Kuki napom lou uhi nahung vangset nao hiding, chanvou nahin neilou diu ahi. Chin le Mizo hovang chun Kukite ahiu akihet themsel uvin, aboi pouvin ahi. Chin le Mizo jong abul Kuki ahin, Zomi jong hi Kuki a kon ahi bouvin, kichuom sah hi manthah na lentah ahibouvin ahi. Kuki kihi a Zomi kahi kiti hi namsung’a kibung khenna sem kahi tina ahin, Kasopite kathet ne tina ahi bouve. Gam kithum’a Ehsante le Songkoh te toh kisa theija, inampi douna thu kisei, na kitong hi hin sotna ding ahipon ahi. Pap kihol bep ahije. Nam kilungtoh te, pangkhomte, gal sat khomte chu namdang amel maten agin uva, atham theilou ahi. Gal jona ding, ponlap khaidoh na ding hi kipumkhat na a-um teng le bou soh doh thei ahi. Eimite hi tuni channa inam sung’uva uilut um nalai ahije. Hiche uilut anaikol hi mehdoh a dam sah ngai ahi. Namsung adam leh Pathen jong lunglhai ding, gamtum’a kivaihom na jong eipeh diu ahije. Nam sung hi adam louva ahileh tao tao jongleo hen phachom ponte. 

            Lamka: The capital city of Kuki Land sung’a hin phung le chaang namkim icheng uvin ahi. Chule nam dangte hetkhah lou kiminsahna (nomenclature) jong district dang’a umlou tamtah a-um in, boina bep in inei uvin ahi. Kol le vai chengho jong hin ihinao, ichon nao, ikilung tolou dan’u hi ve uleh alung dong diu ahije. Lamka khopi  hi Kukite khopi ahin, Chinte, Mizote le Zomite khopi akitipon ahi. Gam kithum jong hi Kuki Land a bou kithum, Kuki minna kithum ahije. Chin min, Mizo min chule Zomi minna Kuki Land akithum kha pha pon ahi. Kuki dihtah hon Kuki nadeimo uhi lungkham umtah vang ahi. Khonung leh ahung kisih ding hi British ten Old Kuki tia ana seiju Aimol, Anal, Chiru, Chothe, Koiren, Kom, Khoibu, Lamkang, Maring, Mayon, Monsang, Trao kitiho ahiuvin ahi. Tua Kacha-Naga ho abel vang’uva hi Kukiten gamtum ahin mu phat uleh anop ada uva Kuki ahinao dihtah ahin pom thou thou diu hetsa ahibouve. Lamka khopi hi nomhen, khangtou hen iti uleh nomenclature Kuki tailou hohi sei tah lou ding ahi. Lamka khopia Chin i-um sah u, Mizo i-umsah u, Zomi i-um sah jeh uva boi ihiuve. Kuki bouvin umsoh keileo hen boina um ponte, sopite. Chin state a Chin ihiuve, Mizoram ah Mizo ihive, state dang ho a vang Kuki ihiuve. Hiti thudol hi sumil poute, sopite. 

            Kuki Land sung’a minority tribe ho thusei kilah loujong hi lhahsam natah ahi. Majority tribe hon lungpi aken lou uleh inam sung’u hi dam theilou hel ding ahi. City of Kuki Land sung’a hi Inpi khat, philanthropic organisation khat students’ organisation khat a-um tei tei ngai ahi. Nomenclature jong Kuki bou hi chepi ding, adangse paimang ngai ahi. Achuti lou leh kolnah sangte le Ehsante chule Songkoh ten gamtum jong eipe doh nom pouvin te. Akitoh te, apang khomte, namkhat na umte chu mi tahsan na chang ahiuve. Lamka: City of Hope jong iti uvin, City of Hope ahileh UN in recognised eibol nao political identity Kuki hi ibonchaova ipomcheh diu, kichomsah, kibung khen ibol lou hel diu ahi. Chutileh Lamka chu capital city of Kuki Land le City of Hope hung hithei ding ahi. Ikam uva isei hou hi atah sodohna ding’a lung igelkhom diu, tha ijekhom diu, pan ilah khom diu ahi. Seitho a imacha sohdoh theilou ahi ihetsoh keiju ahi. Toh tho-a bou thilsoh doh ahi. Gal inei uhi jong kapdoh tho ngai ahi bouvin ahi. Movement nasatah mipin nei ngai ahi. Nampi lamkai hon vai phatecha ahop diu ngai ahitai. Lhoh neitah a kilung toh chetna kal isuon diu ngai ahitai.

*The opinions shared are solely personal.

Share: