GAMTUM HI IMU JOU NA DIU VEM? | Dr. Sir H.H. Mate

Kanam mite ho, Ehsante toh ikidou sung'uva hi Article 400 val lang ka sut doh a kahin post jing ahi. Kana thusei  hohi mu kaneijeh a bou Eimite/Kukite khah dohna ding, kipum khat na ding chule gamtum'a kivai homna neitei na ding'a kasei jing ahin, philosopher khat thusei hi mi ngol danna na gel uleh ana kivet uvin, ipi ihung so uvem. Lamka khopi sung'a ana um khalou 1990 jouva Chin, Mizo le Zomi hung umdoh hon jong Kuki nahiu hi phaten pom uvinlang, kilung toh tah in pangkhom hiute kiti ahi. Chule Thadou sung'a Michael Lamjathang le anung jui hon jong Kuki na hiuvin, nanam dem sot datau vin, ajo le pap pojou povin nate. Inam sung'uva lungset umpen hi Zomi ho, Thadou ho chule Hmar Kuki pomlou ho ahiuve. Atamjo vang'in apom naovin, alhomjo apomlou ho hin thil asuh set ji bou ahije.

 

            Kum 1960 apat in Kuki Land ding ina thum pan tauvin, kum 64 ache tan, tuni chan in amu, amal a-um theipon ahi. Hiche hi ipi jeh hintem? Miching hon ahetsoh keiju ahi. Sei sei jong ngailou ahi.  Tua jong Kuki ihiuva gal inei uleh ikito thei louvu, organisation/Council tamtah inei ju, ithu seiju kitoh lou, loikhat in solam akoleh loikhat in lhum lam akiji a mi tahsanna jong kichang joulou, eimaho sung hi chavai den ji ahi. Ahcha aman kon leh agil sung'ah akichu ji uve kiti bang'a eiho jong inam sung'uva hi kiboi ji ihiuve. Iboi nao hi thupi jong hilou beh, ingol jeh u bou ahi. Miching ho thilneo cha cha ho ah aboi pon ahi. Ikichih sah nao hi ingol nao ahi doh ji bouvin ahi. Gal jona nalou ding, gamtum munalou beh ding'a kiminsahna (nomenclature) pou Benglam susip bang'a isep chah kheh uva ahilou leh phungmin pou nam min toh kibang'a isei ji uhi nam sung suchavai bep ahi bouve. Chin te ihinaovin Chin Land/Chin State inei tauve, Mizo te ihinao vin Mizoram/Mizo State inei tauve. Tua hi Kukite ihinao va Kuki Land/Kuki State inei doh diu poimo pen ahi. Zomi hi janhia hung kiseidoh ahin, koiman ahepon, Zomi minna gam imu na diu lampi a-um theipoi. Myanmar ah jong umdoh ponte. India ah jong um doh thei ponte, ihasei uleh foreigner eikiti diu ahin, kichih thei taute.

 

            Chule sopite ho, gamtum hi imu jou na diu vem? SA/UT with Legislature hi isei uvin, ithum uvin, eimaho ikilung toh pouve. Guh thim'a SA/UT mu ding dei le deilou ilah uva um ding ahi. India sung Manipur a cheng Chin ho, Mizo ho, Zomi ho jouse Kukite ahijeh uva namdang Hindute, Ehsante, Songkohte chule Khamul saoten Kukite eiti uva eiho achuom chuom ma ikisei jing kei uhi ipi ineh khah uhitam? Kukite ihi jeh uva eikithat u, in le lou eiki hal lhah pih u, gam le lei ei kichu-u ahin, ipi mong mong hi igel'u ahi dem? Ole, isung'uva hi Pathen ngaisahna, ginna, jana a-umlou jeh a Satan mangpan ilhoh u-hi apai chavai ngap hitam? Taona la imang jing uvin, hoilai mun ijot uham? Gamtum mu dingla iti kit ngal uvin, gamtum muna ding'in la pan nasatah in ila jou pouvin ahi. Ka pohnat na a-um jeh a bou kakin jong hilou lekha kasut ji bou ahi. Koiman sun'in ati pon ahi. Nampi dinmun ahi theilou dan kavet leh ka khohsah bou ahi. Phaten nam mipite le nam lamkai ho kigel phaute.

 

            Veuvin sopite, kum masa 2023 apatna gal inei uva, MLA/Minister inei houvin SA/UT ahin pohdoh uva, SoO group hon aban jom uva, tua Kolnah sangten SoO group not thap ma akoi uva, SA/UT thu hi tuchung'a KZC le MHA kihou ahin, MHA ho thusei hi inop uleh three bill lai tobang bep ihi diu, ineh mama u ithah neh kit diu ahi. Sum deival poute, sum in mi kilhep lhah sah poute, gamtum imu pou pou uleh sum chu jong eh vadung hung bang nante.

Igam'uva sana, thao chule thilman tam ninglhing'a a-um jeh a bou Songkohte le Ehsanten thachimit ding, delmang ding, lah pih ding eitiu ahi bouve. Hiche thuguh hi isuh millou hel diu, thi channa pan ilah diu igam ihuh jou na tei diuva ipan chah kheh diu, midangte iki lhep lhah sah lou hel diu ahi. Tua Governor thah pa hin chamna hi Meitei hole Kuki ho kah a semdoh tei aguot ahi. Gamtum mulouva ikicham diu nadei uham, sopite? Ingol uleh pha isah diu, ineh u hung twi sel ding ahi. Inam sung'uva chamna umdoh ding dei mi um dalou ahi. Adei ho chu seidoh ngai lou hel ahi. Ahinaova ihet jeng'u ahi.

 

            Achaina kaseinom chu ahileh tua hi Kukiten SA/UT hi mutei hiute itiu leh diplomacy ithep diu, ihatsah diu, public movement inei diu, ihatsah diu, gal eibol khum hohi idep tah lou diu, kiven tho sang'a, kap tho/no tho joh ngai ahi. Hiche na ding'a hi nam lamkai hon planning & strategy phate cha naguon diu ngai ahije. Ehsante lamkaipu Detolpa hi tahsan thei mi hitalou ahi. Gal pandoh ama ahin, tun ipi sei jong leh apan na um ponte. Eiho hi Outer Manipur mite ihi tauvin, Ehsante hi Inner Manipur mite ahi tauve. Ikikhen theng nao hi Kum 2 lhing kiguo ahitai. Inner Manipur CM pa Outer Manipur a lut thei talou ahi. Centre a phaten thu lhut jing hiutin, det kheh in pang taute, lon le le ta poute.

*******

 

Share: