CRITIC ANALYSIS OF MANMASHI AND ZO | Thanglam Manlun

Foreword :- Manmashi leh Zo chung chang thu kahin seiding ahin, phate chan anasim cheh'u hite tin kahin tem'in ahi.

Pic: KHALVONTAWI MEDIA

MANMASHI KITIHI IPI KISEINA HAM?

Manmashi kiti chu mihem kiseina ahi. Pu le Paten ling-pi kiho teng Manmashi chate kadam dam naove ti'a asapji'u chu ajeh neiya asap'u ahi. Ajeh chu hiti'a hi thuchin aneiju ahi. Noimi gam'a chemasa (mithisa lhaogao) hon chung-gam, mihing gam'a cheng te dam dam hinauvam ti hetna dinga leiset aloling ji'u ahi, ti thuchin anei jeh'uva, Pu le Paten ling (earthquake) kiho teng Manmashi chate kadam dam naove ti'a asapji'u ahi. Manmashi hi literal a hilchet ding ahiteng mihem kihetna'n akiseiyin ahi. Mihem kihetna ahileh leiset chunga cheng mihem jat namkin hon Manmashi thuchin hi aneiju hinam? Kuki-Chin-Mizo nam thum ho tilou leiset chunga mi-nam jatdang hon Manmashi thuchin hi aneipouvin ahi. Hiche a mudoh thei chu Kuki-Chin-Mizo nam sunga, nam-bah jouse ihung kondoh na'u chu mihem ahin amachu Manmashi ahi, tina ahi. Hiche thuchin hi Kuki-Chin-Mizo ho dinga undeniable legend's ahi. Mihem koima thing-ko, song-ko a peng aumpon, Kuki-Chin- Mizo nam mite jong thing-ko song-ko'a peng kahipouve, kapennau chu Mihem ahin amachu Manmashi ahi, tina ahi. Kuki-Chin-Mizo nam thum sunga nam-bah jousen hiche Pu-le-Pate thuchin hi ipai theiyu hilou ikichin tup diuva pha ahi. Hiche'a ken kasei pu le pate thuchin hin houthu toh kiguijopna aneipon, chuleh B'nei Manaseh kiseina jong ahipon, Pu le Pate thuchin kasei ahi.

MANMASHI IPI DINGA NGAIKHOH HAM ?

Manmashi thuchin hi Kuki-Chin-Mizo te thisan khat ihiuve ti photchetna ahijeh'in nahsahmo'a koithei ahipon ahi. Mi loikhat'in Kuki tailou sovereign country muna ding lamdang aumpoi itiuvin, adihna chan aumnai, ahin hiche'a hetding khat chu British ten India seh seh'a vai ahop'u ahipon, i-u-pateu chenna Chinland a jong vai ana hop'u ahi. Chin nam miten chamlhat gamkhat hina dinga 12th Feb, 1947 a British tetoh agreement aneiju ahi, tijong igeldoh diu apha'n ahi. Kuki seh seh'in history nei ahipon, Chin leh Mizote'n jong history anei cheh ahi. Khonung teng ihatjou'uva sovereign country deltheiya ihung um khah'u leh history ho gopkhom theina dinga kiguijopna khaogui Manmashi hi apanna hung'um ding ahi. Chin ten Panglong agreement a adeiju chu share sovereignty noiya union of Burma semdoh ding ti ahin, khonunga Burma thunei vaihom hon anoppeh louvu ahi. Hijeh'a chu Arm movement ahin bollu ahi. Phat khat teng ihatjou'uva ahileh ithusim hou gopkhom'a pan ilahkhom diu phat hung'um ding ahi. Hiche phat teng chuleh ihung kondohna'u ipu'u Manmashi hi eikan-gom'uva hung pangding ahi. Hijeh chun Larger view point'a Manmashi thuchin hi ikichin tupdiu ngai ahi. 

ZO KITIHI IPI KISEINA HAM? 

Zo kiti hi Kuki-Chin-Mizo nam mite ipenna'u Pa-min ahi. Lapaova Nu-le-Pa, isei ding teng chun le Zo itiuvin ahi. Zo kitichu Pa tina ahi. Kuki-Chin-Mizo tehi phung-gui kisutte ihiuvin ahi. Hijeh chun ihet theina diuvin, kahkhat hinseiyinge. Ihung kondohnau ipu'u Manmashi chun chapa khat aneiyin, a-chapa min chu Zo ahi. Zo chilhah chu Kuki-Chin-Mizo sunga nam-bah jouse ahi. Zo chu ihung pennau ipau min ahijeh'a Zo soun/Zo chilhah te tia iseiji'u ahi. Mi tampin Zo hi akisemthu dan'a igeljeh'un Zo hi sense chombeh'in iseidoh'un ahi. Zo hi akisemthu ahipon ton'a ana umsa ipa'u kihetna min hijo ahi. Hijeh'a chu lamkai hon ageltoh chet'uva, Kuki-Zo a ikiloi khom'uva ikithokhom diu deina jeh'a Kuki-Zo council ahin semdoh'u ahin, pachat umtah ahiuvin ahi. Hijeh chun lamkai hon aphading tia ahin semdoh'u Kuki-Zo kiloikhom na hi phun-noipi louva itosot johdiu ngai ahi. Ahimong'in akichaisa thilho hi seiya, dem'a phachom ding  ahitahlou jeh'in, kilung khat tah'in pangkhom'u tin tosot cheh leuhen aphapen hijo ding ahi. Ajeh chu kipum khatna louva gaal-jona umtheilou ding ahi. Kuki-Zo jong abulhin louna aum'a ahileh akhelna phat hung'um intin hiche phat teng chuleh iseinom chan isei theiju ahi.

Achaina'n Manmashi leh Zo chung changa kei hetdol kahin sei ahin, nang geltoh akitolouva ahileh inbox a neihon houpi thei ahi.

By :- 
Thanglam Manlun 
An Independent freelance writer

(Views expressed are personal)

~ WAP

Share: