MIZO ZINGA POPE MALSAWMNA DAWNG HMASA BER

MIZO ZINGA POPE MALSAWMNA DAWNG HMASA BER DARMAWII

Tedika Chawngthu

Pi Darmawii hi kum 1920 khan Muallungthu ah a lo piang a. A pa chu zirtirtu Upa Hranghnuna a ni. Pi Darmawii hian Durtlang Hospital ah ANM( Auxiliary nurising midewife)/ Health worker/ Nurse a zir a. 

Indopui 2 na a lo chhuah khan military  nurse in a kal ve a. Indopui lai, Rome a a awm laiin " military nurse ho zawng in Pope malsawmna dawn vek tur"  tih a ni a, military nurse ho chuan Vatican, Rome ah Pope malsawmna an dawng theuh a, 'Mizo zinga Pope malsawmna dawng hmasa ber' a ni ta a ni. 

Pope Malsawmna a dawn kum hi 1944 a ni. Pope malsawmna dawn tirtu hi Pope Pius the 12 a ni bawk. Pi Darmawii hian Catacomb te pawh a zuk tlawh a ropui a ti hle. Indopui lai khan damlo leh hliam an tam em em a military Nurse ho kha an buai in an hah thin em em a ni.

Indopui laia ram danga awm ta chu hnam hrang an tam si a, a hming ah hming koh awlsam nan VERONICA an vuah. Indopui chhung zawngin hnam dang te chuan "Veronica" tih hlirin an ko thin. 

Vawikhat phei chu damlo zingah khan Mizo hi a lo awm a a lo na hle a. Damdawiin a damlo ward an round laiin damlo zinga mi khan a tawng atangin Mizo a ni tih a hria a, a ko a ram danga Mizo leh Mizo inhmuta chu an hlim dun em em a, mahse Indopui lai hliam leh mitthi buaipui reng ngai a buai ta reng reng an ni a."Damlo  leh hliam chuti zat kan rawn thawn dawn" tih a ni reng mai si a he damlo hi a hre zui ta lo.

Indopui a hnathawk a a awm lai khan sap sipai pakhat in a rukin a lo ngaizawng em em hi a lo ni a, " ka nei ngei ang" a ti a. Indopui a lo reh a a lo haw chhoh pawh khan he sap sipai hian Silchar rel thleng a rawn thlah a ni. Mahse a nei duh si lova eng tin tin emaw sap pa chu a hnar haw thei hram a mittui parawl chungin a hawsan thei hram a ni. 

A lo haw hnu ah Health visitor ah te a tang a, Aizawl khawpui chhung leh Hlimen, Khawchhete thlengin a nau nei turin an ko a a kal vang vang thin. Kum 1953 khan Kulikawn ah in a lei a damdawi te a zuar a, mahse nauchhar turin an ko ngun si a, a chhuah ngun em avangin a dawr pawh a nghak tha hmanlo a, a damdawi thenkhat te chu a lo expire thul!

Nau 2000 chuang a chhar a, a nau chhar apiang a record zel thin a ni. Pi Darmawii hi Mizo zaipawl Pi Puiin Lahore a a zuk hruai pawh khan a kal ve a nghe nghe. Pi Darmawii hian pasal a nei lova fa pawh a nei lo. A unau te zinga kan hriat lar ber tur chu a chhang chiah Burma sipai Capt. Vuta a ni. Pu Vuta hi a nupui chu Pi Hmingi a ni a Zarkawt Pa lar Buchhawna fanu a ni.

 Capt. Vuta te fapa chu Maymo a awm thin musician Zara((L) a ni. Zara hi Mizo rock band Vulmawi album hmasa ber RALDAWNA LEH TUM CHHINGI album ah khan drummer turin Butta ten an album record na Mandalay atangin an chah thla a ni. Hetih lai hian Zothana Vulmawi ah a la tello. 

Zara u chu Zothanmawia a ni. Zothanmawia chu Methodist kohhran Bishop nita a ni. Zothanmawia hi Mizo band hmasa Ainawn band drummer a ni bawk.Pi Darmawii hi Pope Malsawmna dawng ni mahse Presbyterian kohhran a ni daih!.He Nurse chhuanawm tak mai Pi Darmawii hi kum 1988 khan pumpui cancer natna in a boral ta a ni.

~ Mizo News

Share: