ZORO chuan Zofate Inrawnkhawmna a buatsaih

November 23rd, 2024 - Re-Unification organisation(ZORO) chuan Zofate inrawnkhawmna a buatsaiha India ram Mizoram State Aizawl khawpui MZP Conference Hall ah nimin November ni 22 ah neih a nih thu ZORO General Headquarters GS. L. Ramdinliana Renthlei chuan Zofa Journal a hriattir.

Thu dawndan in ;

Zofate inrawnkhawmna hi Zofate inlungrualna chungchang leh United Nations Organisation (UNO) a ZORO thu thlen tur chungchangah neih a ni. Zofate inrawnkhawmna hun hi hunhnih a then a ni a, hun khatna hi Pu Rohmingthanga Kawlni Vice President in a kaihruai a, Pu R. Sangkawia President in thusawina a nei. Hun hnihna hi rorelna hun atan hman a ni a, President Pu R. Sangkawia chuan kaihruaiin Pu L. Ramdinliana Renthlei General Secretary leh Tv. Lalnunfela Chawngthu ZORO Western Zone President ten thupui sawihawnna hun an hmang thu a sawi.

He huna thusawitu Pu R. Sangkawia ZORO President chuan, "Zoram hi kan ram a ni a, Zofate ta a ni. Kan chenna tura Pathian min pek a ni a, a neitu dik tak kan ni. Khawvelah hian ramdang kan nei lova chuvangin kan venhim ngei ngei a ngai a ni. Kum tam tak kan intlawhpawh tawn loh avangin unau kan nih pawh inhriat loh chang kan nei a, chenna a hran avangin unau kan nihna a bo chuang lova, thisen a inzawm tlat kan nihna pawh a bo chuang lo. Min thendarhtu ten India, Burma leh Bangladesh-ah te min thendarh mahse la thlahtu thuhmun, nunphung thuhmun, serh leh sang inkhawihpawlh, thih leh ruam khatah ti thin unau dik tak kan ni." tiin a sawi bawk a ni.

Thusawitu dang Pu L. Ramdinliana Renthlei ZORO General Secretary chuan inlungrual a tulna sawiin, "Zofate hian kan awmna ram theuhah nasa taka beih kan tawk hlawm a, keimahni hi kan tangrual tha lo hle a. Unau leh unau kan inbeih chang pawh a awm a, kan inlungrual a, kan tanrual a kan hneh mai theih kan hmelma te pawh kan hneh lo fo thin a ni. Khawvelin a ngaihsan chu hnam tangrual, hnam inlungrual tak te hi an ni. Hnam zahawm kan nih a, khawvel a kan dinchhuah ve theih nan chuan kan tanrual a, kan inlungrual a ngai a ni." a ti. 

Tv. Lalnunfela Chawngthu ZORO Western zone President chuan UNO a kal chungchang report pe in, "UNO chuan anmahni a affiliation nei ZORO chu an lo ngai pawimawh hle a, ka rin phak bakin an lo ngai pawimawh a ni. ZORO behchhanin UNO kaltlangin kan ram hian dinchhuahna hun a la neih hi ka ring a ni. UNO chuan Zofate chu thukhat vua a, lungrual taka kawngkhat zawh turin min ti a chuvangin UNO-ah hlawm khatin thu kan thlen a ngai a, chumi tur chuan kan inlungrual a ngai a ni."a ti 

Zofate inrawnkhawmnaah hian Myanmar(Burma), Bangladesh, Manipur, Tripura, Assam leh Mizoram atangin palai an kal tha hle a. Zohnam chipeng hrang hrang 27 atangin palai an tel bakah Myanmar Zofa MP leh MLA 7 an tel bawk a ni. Zofate inrawnkhawmna a kalte chuan thurolum(resolution) hetiang hian an pawm.

Ni 22, November 2024-a Zo Re-Unification organisation(ZORO) buatsaih a Zofate inrawnkhawmna MZP Conference Hall, Aizawl-a neiha kalkhawmte chuan heng te hi lungrual takin kan pawm.

i) Keini Zofate (Chin-Kuki-Mizo) hi thlahtu thuhmun, tawngkhat hmang (Same langguage - different dialect), nunphung thuhmun, serh leh sang inkhawih pawlh, beiseina thuhmun vuana dam leh tlang khatah, thih leh ruam khatah ti thin unau kan ni. Unau kan nih angin inthen thei kan ni lova, lungrual tak leh kan insuihkhawmleh theih nan hma kan la zel dawn.

ii) ZORO in Zofate India, Bangladesh leh Burma(Myanmar) a awmte insuihlehna tura hma a lo lak tawhna leh United Nations Organisation(UNO) a lo dawr tawhna zawng Zawng hi lawmawm kan ti a. Kum 2004 khan ZORO chu UNO in Zofa zawng zawng aiawhin a lo pawm tawh a UNO-a thuthlen tur reng reng chu ZORO hminga thlen thin tawh nise. UNO a thuthlen tur nei chuan ZORO General  Headquarters hriattir thin nise.

iii) Zofate India, Bangladesh leh Burma(Myanmar) ram hrang hranga thendarha awm te hian kan insuihkhawm leh theihna turin UNO-ah Memorandum thehluh tha kan ti.

~ Zofa Journal

Share: