UPSC Kitaidemna a Tai Dingdan: M.Thangsuansang Zou, IRS

Thumapui

Amasapen in Khrist ah ka khanglaipite chibai ka hing buh hi. Lamkaite deisahna lianpi tang a, tambang lai giel ding a chiel a ka um kisuonlana leh kipahna in ka dim hi. Kaki suonlana ahileh leigiel siem mi kahisih a, tualeh Khanglai ah duhthusam tah in kana ki hel man sih hi. Ahin kakipah guh na ahileh ka tanchin leh khovel siemjilna a kana jil khiet te ka khanglai pite kung a gen thei ding dinmun a ka um jieh in. Tami lai UPSC focus a hing giel ding kahi man in, exam pattern bang lekhabu sim ding e, lekha bang chi sim ding e, hun bang chi man ding a chite sangnaupang te phattuom pi ding tupna in ka giel hi. Hinanlezong tuate masang in keima tanchin tomkim hing giel vang.

Tanchin Tomkim

Kei kahileh Thangsuansang, ka pa min ahileh M.Haulianthang, kanu min Manngaichiin ahi. Zomun vangkhua a kum 1990 in kana piang hi. Innsung hasa a kipan kana hizieh in school kana kai ha mama a, Zomun Mission School, Gelzang Govt School a class B (1996) tan kana sim hi. 1997 gal buai ziah in Imphal a kana pem ua, school kakai man sih hi. 1998 kum in St. Edmund School, Lamphel a class B ka repeat kia hi. Tua zou in 1999 in class 1 and 2 Agape High School, Sangaikot a Boarding a ka u toh kava kai uhi. 2000 in kumkim in class 3 kazou a ka damtheilou ziahin Agape ka nuasie hi. Tuaban a kum 2001-02 sung, JN Nazareth School, Phaibem a class 4-7, kum 2 sung in ka zou hi. Class 8,9 leh 10 St. Paul's Institute a kana zou hi. (2003-06). Tualeh Class 12 Rayburn College apat in 2008 in Manipur Art Stream top 4 in kana zou hi. Maban bawl in kum 2008 in Delhi kana zuan hi. Tuachiin India a ding a top college St. Stephen's College a BA kum thum kana sim a, 2nd Division in ka zou hi. Tua zou in Delhi University nuai ma ah LLB kum 3 (2011-14) ka sim a, 2nd Division ma in ka zou kia hi. LLB ka zawh in UPSC exam a ding kaki prepare a, ALS GS course ka zom a, ka optional subject� political science mahni in kaki sim tawm hi.

Tuachiin 2015 in UPSC CSE exam kapia a, final result May 2016 a hing pawt a, rank 915 taan tung in IRS (IT) tanvou ka tang hi. Hasatna apat kipahna Miten lekhasiam leh mi hampha in ahing mu ua hinanlezong ka lochinna tuate zieh ahisih a, Mangpa ama-sapen a kakoi zieh, nu-le-pa thuman zieh leh hasat-genthei kana tuohte zieh hi in kathei zaw hi. Nu-le-pa hagau mi tah neisih nanleng Pasian zau leh muongngam nu-le-pa ka nei zieh in ka kipah hi. Ka pa in nitah alup kuan teng ahing thumpieh gige hi. Amah muong lou a Pasian muong ding in ahing thuhil nate uh ka bil ah aging zing hi.

Innsung hamsa ahiman in high school apat mite bang in nei zou sih nanlengzong school fee chite ka bat lam uh kana theisih hi. School hoitah a kakai thei nang in, business tuam tuam kana bawl uhi-dukan, sing met, hol met, DI service chite. Tualeh Delhi kum 7 val ka omsung in sum-leh-pai buoina zieh leh coaching lah na ding in innmun leh loumun kana zua uhi. Ka nu-le-pa in ahing na hamuanna uh ahileh innmun, loumun, sum� le-pai hing om zel, pei zel ahia hinanlezong pilna khu nou a om den ding ahi. Maban a sepna na hing mu uleh, ahoizaw alianzaw lamthei ding ahi chiin ahing hamuan gige uhi. Tu in ka hinkhua kanua et chieng in hasatna-gentheina kana tuoh te ziah in kakipah hi, aziehpen tua bang hasatna kana tuohte'n mi khat hing suohsah ahiman in.

UPSC EXAM

High School kana kai apat in IAS/DC kaza chieng in kana lunglut mama a, ka let chieng a keizong kahi di chi lunggel kana nei hi. Hinanlezong IAS/DC hi nang a bang chi om ding e, bang sim ding e chite bangma kana theisih hi. Kum 2008 a Delhi a graduation bawl ding a ka pei in, ka UMuan (Lalmuanlian, Inspector of Income Tax, Hyderabad) in lampi ahing kawhmu hi. Tuachiin keizong college kai pum pum in UPSC Topper te interview ka sim zel a, tualeh lekhabu a recommend te u ka thei kham kham in kana sim hi. UPSC CSE Exam ahileh kum teng in a om a, Khovel pumpi a ding in exam hasa pen pen a chiemte a om phial ahi. Kumteng in sangnaupang lakh 10 val in application apia ua. August ha chieng in Preliminary Exam a om hi. Tam exam a paper 2 exam akipia hi - jingmawng in General Studies (GS) ahia tualeh sun chieng in CSAT (Aptitude Test) ahi. CSAT 33% score a ngai a, tuazaw chieng GS a mu tamte aban a ding in aki haan zel hi. Result September chieng a suoh a, mi 15000 vel Mains Exam pe ding in aki han hi. Main exam a paper 8 exam kipia hi. Paper - I khu Essay ahi, Paper-II ahilen English (qualifiying ahi). Tualeh General Studies (GS) paper 4 a om hi. Tuaban a subject eima kitel khat paper 2 a om hi. Mains exam niteng phial in akizom in akinei a, ni 5 sung vel in akizou pai hi. Mains exam pia mi 15000 lah a mi 3000 vel interview ding in aki haan hi. Interview khu mipil leh theina saangtah nei mi 5 in minutes 30 vel thu tuam tuam dohna anei uhi. Tamna mi 3000 interview te lah a mi 1000 vel aki tel ching khong khong a tualeh a mi 200 vel in IAS, 150 vel IPS chiin sepna tuam tuam aki hawmgual hi.

Lakhabu Simdia Hoi

Tulai Competitive Exam khat pou pou ahi, GS aki dong gige a, tuaziehin GS hoitah a sim ding a poimaw mama hi. General Studies (GS) ichi chieng in Nursery a ABC.... ina sim apat graduation in zaw taan a huap hi. GS thei nang in lekhabu tampi sim angai khawl sih a hinanleh lekhabu khat sim mun mama ngai hi. Lekhabu sawm khatvei chiet sim sang in lekhabu khat sawmvei sim apoimaw zaw hi. Kei suggestions te ahileh:

1. Indian Polity - Laxmikant, DD Basu

2. Modern India - Spectrum (Rajiv Ahier)

3. Ancient and Medieval India - Old NCERT

4. World Geography - GC Leong, Shankar IAS Module

5. India Geography - NCERT (VIII-X)

6. Indian Economy - Ramesh Singh, Mishra Puri

7. Enviroment - Shankar IAS

8. Art and Culture - Nitin Singhania

9. General Science - NCERT (VI-X)

10. Current Affairs- Read one newpaper daily preferably The Hindu or Indian Express and supplement it by a monthly magazine preferably Pratiyogita Darpan, Chronicle or Frontline.

11. Listen to AIR News or watch Rajya Sabha TV (News+The Big Picture)

12. For Maths or Reasoning, buy one standard book and practice regulary.

Lekha Sim Ding Daan

Kum 2014 a Delhi High Court a law internship ka bawl lai in ka mentor Arun Aggarwal, Supreme Court of India Advocate in hichiin ahing thuhil hi, 'Law nathei ut tahtah leh law section te sun tungtawn jaan tungtawn in ngaituo inla, nikhat in dahkal 1 chouh entertainment - music, tv, social media a kisuh hal zel in' chiin ang thumawp hi. Ahing thumawp na kajui a UPSC exam dia kaki sah khol in ka lekha sim dahkal 8 or dahkal 10 chouh ahisih a, lekha ka sim lou chieng in zong, anne pum in ahisihleh metro a tou lai chivel in ka lekha sim te ka ngaituo ngengngong a tuachiin a 'meaning' te kathei deudeu hi. Tami apat zilkhiat ding ahileh sangnaupang ahileh lekha dahkal 1 or dahkal 2 chou simlou ding, i hun tamzaw lekhasim na a ding a pieh khiat ding. Ei pawl in lekha isim hun nasan cie zong gelthei gelmaw teng ki gel khop moh ahi. Tuami sang a, lekha sim hun chieng a hoitah a sim ding, i sim zo chieng a i lekha simte bang agenna na e, bang dia poimaw e chite ngaituo vengveng lei, kithei siam deudeu ding ahi.

Sangnaupang Leh Social Media

Social media ichi chieng in facebook, whatsapp, twitter, chite ahi. Tulai sangnaupang tamzaw te i hun manpha te uh social media ah i sumang zel uhi. Social media ahileh i tahsa part khat abang ta a, tuaziehin zah siam apoimaw mama hi. Sangnaupang a ding in adieh in exam pe gige te a ding in social media khu information mu baisam na penpen ahia tuaban a education group or website te i zah siam le phattuompi thei ding a tam mama hi. Hinanlehzong abuaihuai na ahileh social media khu thu mansanlou atam seng a tuaban a ahing 'distract' thei ding a tam hi. Ka hing thuhil theisun ahileh ni khat in dahkal 1 or dahkal 2 khel social media a active lou ding hi. Tuaban a exam kuan or exam sung a social media tham khalou ahoi penpen hi.

Lawm Ngai Ding Maw, Ngai Lou Ding?

Tulai sangnaupang tampi buaina ahiman in ka ngaidaan kahing gen ding hi. Personal tah a hing thei ten ka lawmngai lam zong na thei ngei ding ua hinanleh hing jui un kachina hilou ahi. Lekha sim lai a ngaizawng nei ahoi chi zong a om ding a, ahoilou chi zong a om ding ahi.Ahoi le ahoilou khu apoimaw pen ahisih a, a poimaw pen ahileh na lekhasim ahing subuai ei or na lungsim ahing subuai ei chi ahizaw hi. Lawm i ngai leh kichientah a ngai ding in lekha sim nalam a ki hasawn tuo ding, i ngai sihleh lungkimtah a om ding in lekha hoitah a sim ding ahi. Lawmngai a loching zong atam a, angailou a loching zong a tam hi. Apoimaw pen ahileh na dinmun na bang chi zah ei chi khu hizaw ahi.

Thutawp Leh Deisah Vaihah

Sangnaupang te ading a poimawh kasah pen ahileh Pasian masa a koi gige ding ahi. Adieh in lekha sim kuanchieng Bible sim a, thumna nei a, hoitah a kilat siengthou ding a poimaw mama hi. Tualeh ei pawl hi atangpi in lekha sim i thasie thei mama uhi. Lekha na sim kuan ahisihleh lekha sim ding na thasiat chieng in, bang jieh a lekha ka sim ding e chiin mahni ki dong un. Na answer penpen u khu 'motivation' (tha thousah) in zang un. Kei motivation ahile ka nu-leh-pa gentheina dawn zangkhai ding leh mi genthei leh liangvai te panpithei ding ahi. Nang a bang ahiei, sanggam?

~ ZPYF Diamond Jubilee Souvenir

Share: