ZOGAM SUNG A OM TEUTE MUAL MINTHANG

(SECOND GREAT WALL)

Zogam sung aom mual minthang te lakah kihel khat ahi, Tungzang khua nitumna saklam ah mualsang dawnpan suangkenzeu lianpi khat om a tua pen "Teute Vum"  kici-in Tedim Times in "Second Great Wall" minvawh uh hi.

Teute vum aki muhzawh kum 130 valta in tuipi/sea level pan a sanna pi 6,716 sang in, India Mizoram, Aizawl khuapi dong ki gal et thei hi. Nitum nalam apang langkhat ah Ngalbual, Suangsang le Philnaak khuate om in, a naakah Tuitangzang le Keltal khuate om hi. Nisuahna lamah, Tungzang khua "Teute Vum" a gamneite gam om hi. Tedim pan in, Tungzang khua tai 18 gamla in, Tungzang khuapan Teute vum tai 5 le falong 7 ki gamla hi.

Teute vum i lamdanna ah aludawn pan ataw dong suang a lamdang tuamtuam le suang-aii paak sitset te akil hiiam mahmah in tangtak in kiciang sinsen in ki thuap diudeu a innlam siamte'n a leplep suangcian tawh kibang in falong 4 bang sausuk hi. Tua suangte i akiil ah khuaiva nam tuamtuam nam 30 val le khamkhuai te kaai zihziah in, mihingte' koih zawh ding hilo hi.

Tunhun ciang in, cycle tawh noptak paitheih na dingin lampi ki sial a, a zaina pi 5 pha hi. Cycle lampi ahih le Teute vum dong tung loin aphual tun madeuh falong 4 ciang cycle tawh nuamtak ki pai thei ta hi.

Teute tangthu atomno in a theih huai

Nidang i pulepa te dawibiak hunlai-in, mi thupi khat a sihding ciang in Teute ah daakging, zamging cihte kiza thei ci hi. Tuhun Tapidaw hun ciang in, tuate kiza nawnlo hi. Tanglai lawkii hun lai-in, Tungzang gam sungah Thahdo te na tengngei uh hi. Tua Thahdo te galnatai uh in Lamka khuapi India gam a tunuh ciang in, Tungzang gam amun min lawhna, Hiangzang, Hiangtam, Siallup cih te khua minin natap uh hi. Thahdo te'n, a tuntun na panin Teute phawk mahmah bektham loin a sihtak uh ciang in a kha te un Teute mualtawn hi cih gen uh hi. Thahdo te Zola phuahna-ah, "A pham masa i omleh Teute mual ah haibang ki ngak ni" na ci uh hi. Teute kammal mahmah zong Thahdo te' kammal pan hong piang hi a, Tedim kam in "Suangkenzeu" cih na ahi hi.

Nidang lai-in mihingte ki pai ngamlo hihmah leh tuhun ciang mihing te' zalen nading leh muhnop, nalamdang ettheihna (excursion) paina ding munhoih mahmah khat hongsuak ta a, mankizaih ukte ading bangin munhoih khat zong ahi hi.

Teute vum napai tak ciang in, akim apam aom singkung lopa, ngeisok le paak namkim tuamtuam om ahih manin limtak kemcing ciat ding hi hang.

©𝐙𝐨𝐠𝐚𝐦 𝐈𝐧𝐒𝐢𝐠𝐡𝐭 

Share: