KUKI ZO CHATE SUNGA GAL SAT DINGHO ✍️ D S Haokip

Date 1/9/2024

Tujingkah simding

KUKI ZO CHATE SUNGA GAL SAT DINGHO

(Abstract from KMKHN)

✍️D S Haokip

Mongkot Khopi Songpi-Lamka

Hinkho Lamhil

"Nagal U, na nam sung a nahinsat chai teng ule namdang te chunga gal hi keima khut a koi un, Keiman kahenai- vaihomthem na Pathen u Keiman hinkhin toh nange. ..Nanam sunga nagal u hi gallen jo ahi. Hiche najo thei na ding un hangsan un. Namdangte chu kami Isreal te bang in Keima khut ah koi tauvin." ( 31st Oct. 2023 lhagao thuphon)

Inamsung uva isat diu gal lencheh phabep aum hiche ho chu anoiya hin aban chan veu te:

1. KHAMTHEI GAL | Proverb 20:1

Inam sung u hi ivet uva ahile Khamthei ne a chule akivei itam tauvin Pa Pathen lung lhei louna ichang khatauve. I gal miteuvin eimuset nau le eingoh nau pipen jong chu hiche hi ahiye. Kuki- Chin narco terrorist , poppy cultivators, illegal immigrants, Drug Mafias, minai macha etc.etc. tia jahda thei jouse a eimin vo tauve. Ipidinga kikilep lep dingham ihi mong mong u ahi. Drugs jeh a North East State jousea mi vetda le theida kichang ahitai. Pakai Pathen in nanam u hi kahinsuh chil ding kahin sepchil ding ahi atito lhon in i um najouseu bel kiom tuisou bang in isou chep chup uve. Nisa khamthei ne la pungcheh cheh, ajoh ho la sum atam mu chan uva thanom cheh cheh u, Kani lei lho la ingah dehlou u. Hiti ho hi Pakai Pathen deilou ahi henasa sa a ibol u , inamsung uva Pathen lunghan na akhatna ahi. Hijeh a chu Pa Pathen deilou ahijeh a chu inam dam nading ahipoule hiche ho isuh mang diu hi igal len pen u lah a khat ahitai. Hou lhachahon role lentah aneiyuvin , hitobang ho suhmang nadinga pan ahin lah diu ham kiti ima aseidoh pouvin, Ama ama denomination khantouna ding bou aboipijo uve. Kipa umtah chu nam sepai ho kilol lhah na dung juiyin hitobang thilphalou ho suhmang nadin pan nasatah ahin la tauve. Mijousen i support cheh diu ahi. ( GMFDI mun Oct. 24, 2023 chule 8th April 2024 a lhagao gilou kiphon nin jong Khamthei hi nasatah a amaho manchah lentah ahidan u aseiye)

2. KIKHENTEL NA GAL | Mark 3:25, 1 Cor. 12:25, Jude 1:19, 1 Cor. 11:18.

Inamsung u hi ikikhentel dan u hi kihasei hih jong le ihetsoh keiyu ahi. Inam sepai hou jong khat a ding thei lou ana kikhentel, CSO ho jong chutima, adeh deh a kikhen tel nadinga dei um loutah houthu lang hi ahin, hinlah ikiha khentel napen uchu Houthu lang hi ahi. Hiche jong Pakai Pathen deilou pen inamsung uva practice ibol jing u ahikit e. ( " Hiche chu nangho hou-inn houtum neiya na kikhen u khu keidingin kalhiso napen ahi ,"tin GMFDI mun a June 14,2023 lhagao thuphon chun aseiye). Kipa umtah chu inam sepai hon Pathen thupeh nit in kipum khat a dinkhom ding natoh ahin pan jing tauve. Houlang hi ipi iti ham tuchan hin ima akijadoh naipoi. Kipumkhat a Houkhat a umding thu asei jing uvin agong jing uve ti thu vang chu akija in hinlah tuchan imacha possitive outcome akihetdoh lou jeh in hou natongho oimo na sangtah akipen ahi. Ikipum khat uva khat a idin thei nadiuva kikhen tel na jong hi inamsung uva dinga gal lenpen khat ahi kit e. ( GMFDI mun a Lhagao thuphon in ikipumkhat uva ikingailut diu thu ahasei lheh e).

Inamsung uva hin Pa Pathen deilou lam a dihlou tah tah iche piuve. 

(i) COMPLACENCY: Aphalou jong aphabanga gel a aphat phat na a seiya eima le eima kilung muom chu complacency akiti e. Hiche hi i insung u, ihoubung sung u, inamsung uvah ichepi jing uve.

(ii). UNHEALTHY COMPETITION: Houbung member tamjoh nei nading, hou inn building hoijo le lenjo neina dinga kitetna; som'a khat tamjo lut ding kitetna, confrence/ khoppi nomjo jo le loupi jo ding kitetna, kei organisation joh phajo hen/ ahoijo le athu che jon hihen ti kitet na, hitiho kitet na phaloutah hi inamsung uva ina chepe jing u ahin, tua pat inam dam nadiuva ilelhah diu hi deisah um pen tah ahin.

3: SUM LE NEI LE GOU NGAILUT NAGAL | 1 Timothy 6:9-11, Luke 16:13-15,  Ecclesiastical 5:10.

"Nangho sum le pai ngailutna asangin, nangho mihing kichihsahna jong asange. Hiche sum le pai ngailutna le nakichihsah nahou chun nalhagao hinkhou navuh khumpeh uvin, setna bulpi kipatna ahi. Tunin hiche nangailut u sum le pai ho jeh in nangho kisulungbuoi hih uvin ajeh chu nadei u nangaichat u Keiman Kahenai.

Nangho mihing lunggella sum le pai a minthanna le let ding deina a nakitunna hou chu Keiman Kadei tapuon, nanampiu hi ngailutna a bou Katun ding ahi. Sum le pai le boltheina chule minthanna ho Keiman Kadei puoi.

Hiche nangho tahsa lung ngaichat sum le pai hole nopsahna hochun Keia kuon'in nakhin gamla tauvin, hiche sum le pai tahsa lung ngaichat ho jeh chun Keija kuonin kikhin gamlatna nanei louvin, hiche sum le pai chihna hochu nakisonpi joh tauvin hijeh chun nalah uva ngailutna alhadai tan ahi.

Ngailutna alhahdai jeh in Keima Ngailut Pathenin nalah uva mun Kanei lhom tan, hijeh chun hiche tahsa lung ngaichatna ho sum le pai hochu nakilhen diu ham? Ngailutna a Keima neikilhen diu ham? Hiche ngailutna chu nakilhen lou uva ahile tuni nikho hojong hi pannabei hiding ahi." (Hiche hi Tu latest a Pakai Pathen Kuki nam mite dia lhagao thuphon ahi...athuhing/ Bible a kon a kisei sangan ahibouve)

Seitam ding aum poi kanam mite ho sum le pa nei le gou ngailut na hin ichan'a Pathen toh iki gamlhat sah u ham!? Ichan a inam sung u hamsetna alhut hitam!? Ihet lou u ahipon, ikihetmosah u chule ikimu mo sah u ahi. Hou inn sung a bou va kelngoi tobang kihi a hou inn pamlang ahiteng ngeihang tobang te ihiuve. Hiche sum le pai nei le gou ingai lut napau jong hi igal u lentah khat ahijeh a isat lhuh doh diu ngai ahi. 

Share: