EHSAN MI 2 KIMAT THUDOL: Sanchong Mangkholen Haokip

Ehsan 3 kiman, khat kilha doh, 2 kihenden nalai thusoh hi imkhuthei ahitapon, vannoi hetnin aumtai. Vannoi hetna um ngal ahitah ngalleh, ipi step lahdingham tijoh chu hungpoimo kit ahitai.

Eiho lungtup chu songkul sunga tangden mipamai hotoh kilhehto ding tichu ahi. Hiche hi thilthah ahipon, khat le khat kilhehto kitihi international law injong aphal ahi. Gamdanghon jong aboljing, achepijing khat chu ahi. Amasa achu, guhthimma bolding tohgon umdan ahi. Tua chu koi guhthim malah, social media pages jousea kithangsoh ahitai.

Tua hi ehsan hon central government komma panpina athumpantauve. Central government chun, eiho chu ehin pressure diu hetsa ahitai. Amaho pressure manna, condition beija lhadoh kit dingchu thil hitheilou ahikitne. Condition chu ipiham? Kilhehto dingchu condition ahi. Hichu hangsantah a, ichepidiu, lhangphongtah a, demand ding ahitai. Nungchop machop kiti umsahlouding, lunggel suhkhel toukhel jong boltahlouding, jangpetna chepi ngai ahi. Muntinna viral ngal ahitahjehchun, step chomdangkhat lah gangchel ngai ahitai.

Songkul sunga tangden ho chu *melmu masat* ngai ahi. Lhep lhah in umkha get uhite. Tua eiho seidingchu ahileh, _"Keihon kahepha pouve, koijin amat ham jong kahepouve, keihonjong hinhol nauvinge. Hijongleh, akiseiho chu hinlha doh masa poupou leo chun, mimanhonjong hinlhadoh tauvinte"_ tia mingol ho banga pongpan jengding ahitai. Ekichihsah leh imacha akiboldohpoi. Ngolthim phelpholla lungtup khatchu jangpetna ichepi tengleh, thil kiboldohjo ahi. Government jong chu moh kichat ding ahipoi. Amahojong mihem eiho tobang ahi.

Tua akisei hi akibolkhel khah leh, songkul sunga umnalai isopiho chun ahinthohlal diu dinmunna umkit ahitai. *Gul jong thi, mol jong bonglou* kiti thuchih khat chu chepi teitei ngai ahi. Ehsan teni umna chu koiman jong doh lele angapoi. Amun amol hetkhohjong angaipoi. Akilhadoh lhon naipoi, tibouseh chu, ihet leh apha ahitai. Eihon ijemtia akitha khah leh, songkul sunga umho jong sohcha loudiu ahi. Hijehchun, hiche thudolla chingtheitah leh lhohbu luttah a gellou khoh ahitai.

Gal le tol khohset laija, SoO Ground Rules thu kiseijing jonghi ngaida aumlheh e. SoO kitihi aumlouva khohtah khat chu ahinai. Ajehchu peace-talk umtheina dinga SoO chu aum masat lou khoh ahi. Hijongleh, Central Government lhepchatvaija umjingkei sanga, ground rules palkeh chu asetna umkit lou ahi. Songkoh thingnoimi honjong, phatjousen ground rules apalkeh uvin, koiman alonaje ahedehpouve.

Akibolding akitong ding thiljouse hi nampi lamkai hon ahin gon diu ahijehchun, asuh-asah helouva, social media a ngol khonkhon jong bollouvin aphai. Aphachomdinga ideisah geldan (ngaidan) khat vang chu seithei ahithounai.

Dicision making body hi lamkaiho hijongleh, violence movement hinbolding hohi mipi ahikitjeh chun, mipiho hetdinga lamkai honjong athu umdan nahintahlang jingdiu angaikitne.

Akibol akitong jouse hi, aphatna hihenlang, asetna hijongleh thakhatchetna pankhomding, kengkhatna dingkhom ding angaije. Kilungkhatna aumtengleh, ahitheilouding khat jong hithei dapveh jeng ahi.

~ Sanchong Mangkholen Haokip

Kuki freelance writer

(Views expressed are personal. KV News does not endorse them.)

Share: