BMA Ruby Jubilee VANGPUI Kut 2024

Bangalore Mizo Association

RUBY JUBILEE VANGPUI KUT 2024

Nimin October 2, 2024 Nilaini chawhnu dar 2:30pm ah khan Dr. B.R. Ambedkar Bhavan, Vasanth Nagar ah BMA kum 40-na Vangpui Kut chu tluang taka hman a ni. Kuminah hian Kut Nu chu Pi V. Chhawnkimi a ni a, Khuallian chu Pi Lalrinpuii, Mizoram State Health Minister a ni a. A ni hi BMA President lo ni tawh a ni bawk.

Rev. Lalzarliana Khiangte, BCM Pastor in hunserh a hmang a. Pathian thu ṭha tak sawiin a ṭawngṭai a. Kut Nu Pi V. Chhawnkimi'n chibai bukna thu sawiin Kut Hawnna darkhuang a vua a. BMA Secretary hnen aṭangin report tlem leh inhmelhriattirna hun hman a ni. President Pu Laldingliana Tlau Vantawl in thu a sawi a. Chumi hnuah kan Khuallian Pi Lalrinpuii'n thusawina hun a hmang. Kan Khuallian hian BMA Vangpui Kut kan hman ṭanpuina atan Rs.nuai 1 min pe bawk a ni. Kan Khuallian hi BMA President te a lo nih tawh bakah, Mizo Khawtlang tana ṭangkai leh hna nasa taka lo thawk tawh ṭhin a ni a. Helai tualchhung mi ni a, Mizoram State sawrkar Cabinet minister a ni te, Mizo hmeichhe zinga hetiang dinhmun luah hmasa ber a ni te hi Bangalore Mizo chuan kan lawmpuiin kan chhuang em em a. BMA chuan Khawtlang aiawhin Chawimawina thuziak kan hlan a, he thuziak hi kan Assistant Secretary Tv. Lalhriatzuala Hlondo in a hlan a ni. A tawp lamah Chailam neih a ni a. Kalkhawm zawng zawng te mahni awmna hmuna dingin hlim takin kan lam a. BMA Vice President Rev. Dr. Lalfakawma Ralte in lawmthu sawina hun a hmang a. A tawp ṭawngṭaina Rev. PC Nghaklianmawia'n a hmang.

Hun hmasaah hian zaihona te, BMA hla hmanga section Zaipawl inelna te, mimal zai te bakah, sports leh thildanga BMA section inelna lawmman te sem a ni bawk. Inelna pumpuia ti ṭha ber chu Lalsangzuali sailo section te an ni.

Tlai lam dar 6:00pm ah mipui lokal khawm zawng zawngten zanriah kan kilho a. Dar 7:00pm ah Hun Hnihna hman a ni. Hemi hun ṭanna a kamkeuna hun hi BMA Art & Culture Committee Convener Rev. LH Lalremruata'n a hmang a chumi zawhah zaithiam te - Nl. Lalnunhlimi, Nl. Linda T. Zothanmawii, Tv. C. Lalnunchama, Nl. Flora Saizikpuii, Nl. Mylo K. Lallawmzuali te bakah band pathum – KingSlate, Senior Band leh Rebecca Saimawii band te an zai bawk a. Lam mawi tak mai Christ University Mizoten an entir bawk. Hemi hun tawpa ṭawngṭaina hi Rev. Vanlalliana'n a hmang a ni.

He programme hmang tura lokal khawm mipui zawng zawng te, kan hun kaihruaitu Pi Teteii leh Tv. Siamtea te chungah te, zai min hruaitu Tv. Dennis te, Pi Janet leh Nl. Linda te chungah te, Zaipawl zai min endiksaktu Dr. Machhungi te, Rev. Vala te, Pu Chhana leh Tv. Joela te chungah te, ṭawngṭaina hun min hmansaktu Rev. Nghaktea leh Rev. Vla chungah te, Viltu te, Venghimtute, Ei leh In lam Buaipuitute, kan sound hawhna Pu Joe chungah te, sound lam khawihtu te, chanvo chang zawng zawng te bakah, BMA a committee hrang hrang te, thla mawi taka min laksaktu Pu Daniela te nupa te, mimal bungrua kan hmansak leh he programme atana sum leh pai thawhtu zawng zawng te, sponsor tute leh Khuallian leh Kut Nu te, nangmahni vangin Vangpui Kut 2024 tluang takin kan hmang a, in chungah BMA in lawmthu kan sawi tak meuh meuh a ni.

Mipui kalkhawm te an felfai em em hmuhte, buaina leh harsatna awm miah lova hun tluang taka kan hmang thei hi BMA te kan lawm a. Kan thawh hona a ṭha hle tih te, mipui kalkhawm felfai tak hmuh te khan Mizo hmel a timawi hle a ni.

Hetianga hun tluang tak, felfai tak leh hlim taka hmang theia min hruai a, mal min sawmtu kan Pathian hnenah lawmthu kan sawi e.

BMA hi Helai Mizo Khawtlang tana pawl din a nih ang ngeiin member ni ṭheuh turin kan in ngen e.

HMS Dawngliana

Secretary

Bangalore Mizo Association

Share: