ZORO representative speaks in UN

ZORO Palaiin Zofate Harsatna Tawh Mek United Nations Organisation Ah A Thlen

July 11,2024 - Zofa Journal║⁠ India ram Mizoram State Zofa te hnam suihkhawm tu ZORO chuan UNO ah Zofa te tan dingin kan harsatna te a va thlen thu ZORO hruaitu lam chuan Zofa Journal ah hriattirna nei.

Thu dawn dan in; 

( a ) UN Expert Mechanism on the Rights of Indigenous Peoples 17th Session chu ni 8th - 12th, July 2024 chhung hian Geneva, Switzerland khawpui a neih mek a ni a. ZORO pawh UNO hnuaia tualto hnamte inziahluhna United Nations Permanent Forum for Indigenous Issues (UNFPII)-a affilliated member kan nih angin session-ah hian tel ve a ni a. ZORO Western Zone President Pu Lalnunfela Chawngthu, KH. Vanlalruati Serchhip leh Lalruatpuii Cira ZORO Consultant Switzerland te ZORO aiawhin an tel a ni.

( b ) Ni 10, July 2024 khan ZORO chu thusawina hun pek kan nih angin Pu Lalnunfela Chawngthu ZORO Western Zone President chuan February 2023 atanga Manipur Zofaten buaina an tawh chungchang sawiin, "Zofate chu an pi leh pu atanga an lo luah tawh an in leh lo atang te in um chhuah an ni a, an chenna In mai bakah an Pathian Biak in te halsak niin, an buaina hian ziaawm lam a pan thei lo a, State harsa ve tak Mizoram chuan kan unau, mahni sahimna zawnga mangang taka vakvai mek sang tel teh meuh mai chu an lo dawngsawng mek a ni,"a ti a.

( c ) Bangladesh leh Myanmar lama Zofate harsatna an tawh chungchang pawh sawiin, "Bangladesh-a Chittagong Hill Tracts buaina avangin mi tam tak chuan Mizoramah sahimna an rawn zawng a, hetih lai hian India sipai - Border Security Force (BSF) te chuan Mizoram-a an lo luh hi phal loin an lo hnawtkir leh thin a ni. Tunah hian Zofa tam tak chu ramngaw hnuaiah ei tur mumal nei loin sahimna zawngin an vakvai mek a ni," a ti a.

( d ) Lalnunfela Chawngthu ZORO palai chuan, "Myanmar lamah ni se UNDRIP sign-tute zinga mi a ni chungin India chuan Free Regime Movement (FMR) tih tawp a tum a, India leh Myanmar ramri hung a tum bawk a ni. Zofate hi Bangladesh, India leh Myanmar-a cheng kan ni a, tunah hian zalen taka kan inkalpawh theihna chu India hian min nuai bo sak mek a ni. Ramri hung leh zalen taka ramri hrula mite inkalpawh theihna tih tawp hi a ti hlawhtling a nih chuan British Colonial hun laia dik lo taka kan ram sawp a min thendarh hi India hian uar sauhin a rawn tih belh tihna ang a ni dawn a ni. Kan ram hi kiltin atangin - Bangladesh, Myanmar, India-ah pawh Assam leh Manipur-ah te nek chep in kan awm mek a. Kan dinhmun a chhe tial tial a, ram pawh kan chan mek a ni. Chuvangin ram chungchang leh awmdan tur hi mahnia kan inrel ve hun a thlen ngei kan beisei a, mahni a ro kan inrel ve theih nan UNO thlawpna kan mamawh dawn a, min thlawp turin UNO pawh kan beisei a ni."a ti bawk

( e ) ZORO chu khawvel hmun hrang hranga awm Zofate kan insuihkhawm a, pumkhata kan awm theih nana hmalatu a ni a. Zofate tan chuan UNO thlengin hma a la thin a, Zofate kan insuihkhawm a, pumkhata kan awm theih nan hma a lak chhun zawm zel dawn a ni.

Sd-

(L. RAMDINLIANA RENTHLEI)

General Secretary

ZORO General Headquarters, Aizawl.

------

Share: