ZORO Press Release: CNF-ZRO INBIAKNA NEI

Vawiin ni 27th July 2024(Inrinni) khan Pu Lalmuanpuia Punte, ZORO Vice Presi- dent & Adviser to CM (Political) room-ah ZO Re-Unification Organisation (ZORO) bultumin Chin National Front (CNF) leh Zomi - Re-Unification Organisation (ZRO) te chuan remna kawng zawha inbiakna an nei a. Inbiakna hi Pu R. Sangkawia, President ZORO in a kaihruai a ni. Chin National Front (CNF) leh Zomi-Re-Unification Organisation (ZRO) te hi May 2024 thla tir khan inhmuh thiam lohna neiin Silai hial che lek a ni a, nunna chan enge maw zat an awm a ni. ZORO chuan palai hnathawkin unau inhmelhai hi tha a ti lova, Chin National Front CCNF) leh Zomi-Re-Unification Organisation (ZRO) te inrem taka an awm theih dan a zawng a, inrem a nih theih nan inbiakna hmasa hi neih a ni ta a ni. Inbiaknaah hian thu tam tak sawihona neih a ni a, ngun taka sawiho a nih hnuah a hnuaia mi ang hian thawhhona thuthlung hmasa siam a ni.

THAWHHONA THUTHLUNG

Keini Chin National Front(CNF) leh Zomi Re-Unification Organisation (ZRO) te ni 27, July 2024-a Zo Re-Unification Organisation (ZORO) huaihawta inkawm khawmna neite hian uluk taka kan sawi ho hnuah, a hnuaia tarlante hi thinlung takin kan pawmin kan zawm tlang tih kan puang e.

1. Keini Zofate(Chin-Kuki-Zomi/Mizo) hi thlahtu thuhmun, tawng khat hmang (Same language - different dialect), nunphung thuhmun, serh leh sang inkhawih pawlh, beiseina thuhmun vuana dam leh tlang khatah, thih leh ruam khatah ti thin unau kan ni.

2. Kan ram leh hnam tana hma kan lakna kawngah kan thahnemngaih luat avanga unau kan inhmu thiam lo hi pawi kan ti a, tun hnuah thleng tawh lo se kan duh.

3. Inremna tluantling a awm theih nan atul dan a zira inbiakna neih leh nise kan ti.

Sd-

(L RAMDINLIANA RENTHLEI)

General Secretary

ZORO, General Headquarters, Aizawl.

Share: