Social Media A Viral Mithum Ho Chunga Keima Lung Gel

SOCIAL MEDIA A VIRAL LAMKAI MITHUM HO CHUNGA KEIMA LUNG-GEL

By:- Thanglam Manlun, Independent Freelance Writer

Tumasang chun MLA mini leh social activist khat Guwahati mun'ah CM patoh akimuto'uve tithu ahung viral'in ahi. Hiche thu hungkiso chu kenjong phatechan kanasim'in ahi. Hiche'a chun point-ni kamudoh'in, hiteni chu ahileh:-

1) Tutu'a eimi minister tenin Manipur vaihom luboh CM pa thusei donse'n aneilhon tapon (akikah'u aboitai tina) ahi. ijem tia minister teni khelding ahin tia ahileh akisei MLA teni hin chance lah'a minister post muna dinga CM pa kha-akhot lhon ahi ti ahi.

Kiboina akhohset lai tah'in minister teni chung chang thu'ah hitin kana seiyin ahi. Meilhei ten thagam dinga gaal eibol khum'u ahitahjeh'in, minister tenin minister hina post a kon resign kibolhon henlang MLA in umhon leh phajonte, ajeh chu vaihom lah'a ipan'uva ahileh khonung teng kipalna thei hung'um ding ahi, tin kana seiyin ahileh atamjon pha isahlouna'u, iseijun ahi. Nampin pha isahlou jeh'un amani jong aki resign tapon ahi. Hiche phat laiya whatsapp ho'a milham ho thusei hochu achom in kikoi taleh, Kalungdonna pen chu intellectual tampin minister teni ki-resign ding pha asahlo'u chu kalung donna pen ahi. Minister post i-itjeh'u vin, social organisation khatchan minister teni resign kibolna din pressure apepon PR sojong khatcha aumpon ahi. Hichun keijong kakigel'in kei lung-gel hi midanga toh kitohlou ahitai, tin thipbeh'in kaumtan ahi. 

Ahileh tua minister panmun delho ipi dinga i-oimo diu ham, minister post tuhlouva khoh ahileh, ha....della ideldiu, aluiteni akikhel jong leh eimi mama'n ituhna diuva, CM pa lung holding mong ahi. Ole minister hi mi phabep dinga pha'a adang dinga phalouva ham. Keivang kasei masat bang'in minister panmun ituh diu kadeipon ahi. Ajeh chu vaihom thunei lah'a ipan'u ahijeh'in meilheiho dinga plus point khat'a pang jing ding ahi. Keihi koi thulah jong kahipoi, ahin, thulahlouho thusei jong adih tampi um ahi, ti ihetdiu aphan ahi.

Kaseima bang'in tuchung parliament monsoon season a PM pan oposition ho donbutna'n Manipur ah boina aumpoi, kivaihopna angai bang'in achelhan, natoh jong amachal jinge tin asim lhajeng jung'in ahi. Hiche a chun particular in Kuki nam mite aboi'uve, tiding ana umjong leh PM pan hoiya Kuki te boidiu ham? Govt. vaihom lah'ah apang'un, amin'u hiche hiche ahin, atuhmun'u hiche hiche-hi ahi, tia donbutna apeh thou thou ding ahi. Govt. kivaihopna angaiya banga achelhah jinga ahileh, gaal le tol umhen lang ipi umjong leh aboipoi tina ahi. Hitobang dinmun'a govt. vaihom lah'a pang Kuki te aboiye kiti chu India govt. dinga santhei hilou ahi. Hijeh'a chu minister teni'n minister ahina hon nam interest a adalhah hon ding angaiye tia kana sei ahi. Chuti hitalouva govt. vaipolah'a pan ilahjom jing nauhin avetsah chu Kuki nam mite kaboi pouve tina hijeng ahi. Chuti'a govt. vaihom lah'a panlou khoh mong mong ahileh minister panmun delteni i-oimo loudiu, itosotjoh diu ngai ahi. Ajeh chu aluiteni ahung kikhel khah'a ahileh eimi ma man ilodiu ngai ahi. Ahithei bon leh minister 4 le 5 beh ki-um le pha ahi.

Ahin, kenvang minister lui teni jong ka-oipon, athah'a CM lung holteni jong ka-oipoi. Ajeh chu kei lung-gella minister panmun ituhdiu kadeilou jeh ahi.

2) Point nina chu CM patoh chamna thu asei'uve ti ahi. Hiche hi adiham adihlou ham ti hetchen ahilou jeh'in, aseihah'in ahi. Ahin, keima gellin vang chamna thu seiya che ahilhon ding katahsan pon ahi. Ajeh chu inteligent winga kiseihon report apehna'u khu ivetleh minister post deijeh'a, CM pa khakhot'a che hilhon dan'in akilang'in ahi. Chuleh amani jong mingol ahipon, tulai tah'a chamna thu aseilhon ding chu tahsan aumpon ahi. Seinama hon jong leh chethei chom louding ding, chuleh phachom louding ahidan amanin jong ahettei lhon ding ahi. Hiche lang chu hetchetlou ahijeh'in haseida maijinge, ajeh chu Kuki Inpi'n kholchilna kinei ding ahi, atitoh kilhon'in koiman aban seibe taloudin khamgahna jong aneitan ahi. Ahin, keiman kasei nom chu ahileh minister post thubou ahi. Boilaitah'a jong minister tuhlou khoh ahileh athah'a minister delteni oimona ding aumpoi, ajeh chu MLA kaidoh jouse dinga doi-le-tup lenpen chu minister panmun khatbeh tutei ding tichu politics chena lhongpi  ahijeh'in koima oimo poite ti'a kaseinom joh ahi.

Achaina a kaseinom chu tunjong phat akile pon ahi. Minister teni'n lunglen tah'a, kanam mite hichan geiya sugenthei, Manipur vaihopna sung'ah minister in panglhon ponge atithei hon'a ahileh, nam ngailupen'a mijousen agelhon ding ahi. Ahin, Bible in thil jousen phat aneiye ati bang'in, gaal khoh laitah chun ana ki-resign hon leh phalheh ding ahi. Ahin, sapte thuchih in "better late than never" ati banga, aki-resign hon'a ahileh eiho dinga panmun lentah khat'a hung pang thou thou ding ahi.

_eimi_news_

Share: