Open Letter to Pu PS Haokip, Prez, KNO

By :- 

Thanglam Manlun

independent freelance writer

Amasapen'in Kuki Army president nahina jeh'in kajana✋salam kahin bollin ahi. Tuni'n naheng'ah seinom themkhat kaneiyin, achaina gei neina simchai peh teidin kahung taove.

NAM LAMKAI HINA THU :-  Nangma hi nom'in lang dajong le chun nam lamkai khat nahitan ahi. Nam lamkai khat hina'a Pathen a nakipehna chu kahin kipapi'n ahi. Lamkaiyin pathen ahet ding chu thilpha ahi. Ahin, Pathen thu a kiman chahna jong adihlou leh aval aumtheiyin ahi. Hijeh chun nachih theiding angaiyin ahi. Nam lamkai khat'in aneitei dinga poimo penchu ANAM MITE LUNG-GEL HETHEM'A, ATHOH GIMNA'U HETPEH LAMKAI HIDING AHI. Ahileh ipi dinga tunichan geiya nanam miten gaal le tol jeh'a, genthei hahsat athoh na'u, chuleh  Frontline'a gilkel dangchah thoh pum'a, asun ajan'a duty bolho hephalouva umjing nahiham? aphat leh nikho chuleh thilsoh dungjuiya heitoh themho chu lamkaipha kiti ahi. Henge, japi hetlouva natoh tampi umnante, ahin mulou leh hetlou natoh hochun nam mite hahsat leh thohgimna ho a-olsah ding ahipon ahi. Hijeh'a chu nam mite Lung-gel hethem pum'a muthei natoh'a pohdoh ding ngai ahi. Ole GMFDI mun'a taona gaman khu lhingset'a nagel ham? taona manchu apha ahi, kadempoi ahin, nam laikai khat dinga taona manseh seh chu hitheilou ahi. Suhtoh ding seitoh ding leh gaal Jona dinga bolding tampi um ahi. Chuleh nathusei, boina umna munho hi Pathen hephalou ho umna mun ahi. Ama hochu hung'uva hilaimun (GMFDI) mun'a taona ahung mandiu ahi, nati chu lahthei thu ahilou keu hilouvin, lamkai khat thusei dinga kilom ahipon ahi. Ajeh chu nam lamkai dihtah chun nam mite amun mun'a taona mangjouse apachat dinga lom ahi. Chuti hitalouva GMFDI mun'a taoho bou taona manga simding chu dihtheilou ahi. Ajeh chu OT khanga Israel ten munkhat seh'a Pathen houding thulhun ana neiju khang chu ahitapon ahi. Hiche thulhun chu Pakai Jesun asuhbeiya, mijousen adeina mun mun'a Pathen ahou theina ding kot ahon ahitan ahi. Hijeh'a chu KNT lamkai holeh houbung lamkai hon Phatseh'a taona programe agon'uva nam mite amun mun'a kitaojing ahi. Boina mun'a umho hung'uva, GMFDI mun'a taona ahung mandiuva nasei hin KNT lamkai holeh amun mun'a houbung lamkai ho natoh ima'a nasimlou dan'in akilang tan ahi. Boina sona mun ho Pathen hetlou jeh ahileh nangma chenna Lamka chu gaal hung kipatna leh boina somasatna pen mun ahin, mundanga mi koulouva, Lamka lang hon taona haman a naman diu hilouham? ipi dinga mun danga ho na-oimo'u ham? Mun danga umhon jong eima eima hitheina cheh'a taona kimang soh kei ahi. Lamkai ihi teng thusei lasah chihthei ding ngai ahi. Ajeh chu lamkai thusei chu gih'a ahin, milham thusei toh kibanglou ahi.

 ANINA CHU AHILEH, NAM LAMKAI KITICHU ANAM MITE TILKOUTHEM HIDING AHI :- Lamkai pha kitichu aphat leh athilsoh dungjuiya, anam mite lhamon'a tilkhou them hiding ding ahi. Ahin, tuni chan'in nam mite thohgimna leh frontline a asun ajan'a genthei tah'a duty bolho pachatna leh lhamonna thu nasei akijapon, nam mite dinga vangsetna khat ahi. Frontline a duty poho khun Zalengam lekhabu saa...tah'a najih khu protection abol'u ahi. Frontline Kvv ho umlou hileh sot'a igam'u kichai ding ahitan ahi. Gam kichai nung teng hoiya Zalen-gam semding natiham? Ole  gam umlou Zalenna semding natiham? hitobang ding chu ahileh meilhei toh kidoujong ngailou ahi. Meilhei te toh ikidou'u hi Politics jeh ahi. Politics a lubohpen nangma nahin, aluboh pen nang'in nanam mite thohgim gentheina chunga kam khatcha kehlouva na'um hi naki oi-mong hinam? Lamkai thusei jeh'a mi hangsan ahin, chuleh lamkai thusei dihlou jeh'a mi thasetna leh lung neona pengdoh theikit ahi. Hijeh chun GMFDI mun'a nataona toh kilhon'in nam mite lungmonna ding thu seijin lang, lhamon'in, achuti louva nam mite lung alhah mangkeiya ahileh, natoson dinga Nepali ho nakithalahna phat hung lhung thei ahi. Pu le Pate thuchih'in " Sa'n akhonung athipin, mi-hem in akamsoh athipi'e" ati banga lamkai khat'in thu aseikhel jeh'a nampi abungbu'a kitung thei ahi. Hijeh chun thusei ching theiyin ti'a kahintem ahi.

Achaina a kaseinom chu tukal Jaumtah Pu PS in nu-nao chapang kikhopna ho'ah nam thu seitahih'in, namthu nasei dingleh na cabinate hotoh toukhom'in lang, press conference kouvin lang seiyin, hichu adih ahi. Chuti louva natophah na mun mun'a naseiya ahileh Kuki nam mite politics chu totna a hung umdoh  ding ahi. Hiche kathusei hohi Gadha in Si-al (gam-uicha) ahilna tobang ahi. Si-al chu Gadha sanga alesom aleja a chingjo ahi. Ahin, achingjo Si-al chu angolpen Gadha thusei jeh'a hingdoh thusim um'ah ahi. Chutima chun miching hojong mi-ngol beiyin aphatheipon ahi.

_viral_

Share: