NATHINA DING NIKHO LHIN MASANG'IN THIHIH IN

By :- Thanglam Manlun

 independent freelance writer

Thina'n kot-lentah ahong'in, nitin'in lei-mihem te akitollut jing'un ahi. Leiset'a hungpeng lei-mihem ten khatvei thina ato teiding thutep umsa ahi. Ahin, thina ding nikho hung lhun masanga thina hinkho mang tampi aum'in, amaho nungjui ihilou'na diuvin chingtheiju hite.

ATHINA DING PHAT LHIN MASANGA THI KITIHO CHU KOIHO KISEINA HAM :- Leiset hinkho'a Pathen phatgon dungjuiyin, tahsa le lhagao kikhenna ding nikho aum'in ahi. Hiche tahsa leh lhagao kikhen nikho chu thina kiti chu ahi. Leiset tahsa thina ding nikho hung lhun masanga thina ding tampi aum'in ahi. Vetsahna'n nungah khat chu adongma pan akhen jeh'a lung lhadaiya, hinkho'a dongma neitalou ding leh jineilou dinga kigel lhahna nei mi aum'in ahi. Hitobang michu tahsa'a ahin vanga, kilungset hinkho'a thina chang ahitan ahi. Hitobangma chun, leiset hinkho'a hin thi masanga thina ding tampi aum'in ahi.

HINGLAIYA THINA HINKHO MANNA LAMPIHO :- Mihing hiya thina hinkho mang leiset chunga hin tampi aum'in ahi. Hitobang miho chu tahsa'a ahin vanga, thina hinkho po-nam kipoh'a vahle ahitauvin ahi. Hitichun leiset hinkho thina lampi, tampiho lah'a kon point thum igelkhom diu kadeiyin ahi. Hiche hochu ahile, 1) Lhagaova thina hinkho, 2) Education a thina hinkho, 3) Kinepna'a thina hinkho ahi.

LHAGAOVA THINA HINKHO :- Lhagao kiti chu ipi hiya thithei ham? Lhagao kitichu leiset chihna'n lam chom chom'in hilchenna neijongleu, ahinatah chu aseidohjou pouvin ahi. Bible a kimu dungjuiyin lhagao kiti chu Pathen'in apeh hinna, sung-gil a akhumpeh chu lhagao kiti ahi. Hiche hinna lhagao sung-gil'a umchu tahsa toh tipumkhat changkhom ahin, hiche tahsa leh lhagao hinkhomna chu hinkho kiti ahi. Hinkho'n thina ding phattep aneiyin, hiche nikho chu lhagao leh tahsa kikhenna nikho hiding ahi. Lhagao kitichu thilchom beh ahipon, eima sunga um'a, tahsa toh hingkhom ahi. Thanglam keima janteng ka-ihmu jin, ahin, Thanglam khat janmang leiset (dreamland) chung'ah avahlen hinkho agamangyin ahi. Thanglam khat ihmu'a, Thanglam khat avale chun lhagao aum monge ti aphochen'in ahi. Hiche lhagao chu Pathen'a kon atheng leh hingjing ahi. Ahin, lhagao chenna leiset tahsan chonset abol tahjeh'in, tahsa leh lhagao akopto'a din thina asoh tan ahi. Genetic diseas tichu lahson thei natna hohi thisan'a beh'a kilason ahibanga, Eden hon mi-masa Adam chonsetna jong thisan'a beh ahi. Hiche chonsetna thisan'a kon pengdoh tapou chu chonse ahi. Hiche thisan'a beh chonsetna chu thisan'a soptheng angaijeh'in, Pathen chapa changkhat Jesu Christan van-noi mite chonset sopthengna din Calvary Cross chung'ah, athisan aso'n ahi. Koi hileh tahsan'a Christa kisan chan chun lhagao huh hingna amuding ahi. Ahin, koi hileh Adam chonset ken iti kapoh dingham ! ahilou leh lhagao ipi hija, lhagao ding jeh a kadu du ka-ngol khoh dingham, tia hinkho mang ho chu athina ding nikho lhin masanga thiho chu  ahi'uvin ahi. 

EDUCATION'A THINA :- Tu 21st century khang hi Computer age  khang ahitan ahi. Mihem chihna asang tan, ani anin competition jong asang cheh cheh jeng'in ahi. Hiche phat sunga hinkho mang khangthah tampin education thupi geldoh louvin hinkho amang'un ahi. Education thupi ipiham? Education thupi chu "learn and let learn" ti ahin, hichu eipaova, jillin lang chuleh jilsah'in tina ahi. Najildoh thepna chu naa toh'in podoh'in lang, midang jong jilsah'in tina ahi. Education lampi'a thina thang kikam chu fail kiti thucheng hi ahi. Exam lolhin lel jeh ham, ahilou leh lungtup molso joulou jeh ham'a, lung lhadah'a, moh umthim jengho, ahilou leh khamna theiya kipelut'a hinkho lam hilouva mangho chu tahsa a ahin vanga thina hinkho mang ahitauvin ahi. Education doi le tup chu govt. service muna ding seh seh ahipon, insung, houbung, namsung leh van-noi kikhelsah ding chu education doi le tup thupipen ahi. Tuni'a Kuki nam mite nemcha idina'u level'a kon domsang ding leh kikhelsah ding chu khangthah ho mopohna ahi. Hichu hepha louva khamna theiya hinkho mang hochu athina ding nikho lhinglou laiya thina hinkho mang kitiho chu ahi'uvin ahi.

KINEPNA A THINA HINKHO :- Mihem hinkho hi kinepna'n apuile a kon lungmonga hinkho iman'u ahi. Leiset chunga cheng lei mihem alen'a pat aneogei kinepna beiya hing khatcha aumpon ahi. Hiti chu ahin leiset mihem jousen kinepna khat neiya hinkho iman cheh'u ahi. Hiche kinepna chu mihem lim le mel akibahlou bang'in, kinepna jong akibangpon ahi. Mihem koiman kinepna beiyin hinkho amangpoi ti hetna'n Pu le Paten "chaga'n khovei akineppi'e" tin ana seiyun ahi. Kinepna'n hinkho apuiya kon nitin hinkho kiman chahna ineijingu ahi. Ahin, phat khat kom kom teng kinepna pahbang apahdoh joulouna phat aumyin, kinepna akehyitan ahi. Hiti'a chu kinepna ake teng mihem lungthim asunayin ahi. Hiche lungthim natna chun, lung-gel dihlou akondoh sah'a kon hinkho lam dihlouva mang tampi aum'in ahi. Lungthim natna a kon hungsoh doh ga-phalou hochu, lunghan'na leh jachatna, thasetna leh panna beiya kigelna, chuleh  leiset chunga hinom louna chan jong asosahyin ahi. Hijeh chun khangthah tampi khamna thei Ju-le-sa leh adang danga kipelut'a, hinkho mang tampi aum jing'in ahi. Hitobang miho chu athina ding phat lhin masanga thina hinkho-mang kitiho chu ahi'uvin ahi.

KAIGOP THUSIM :- Nungah khat hinkho'a hin, akinepna MBBS (Doctor) khat hiding tupna chu kum nga sung'in jong atahso jou tapon, akinepna akehtan ahi. Aloi agol hon la MA chaigam ta, college athah'a kipat kit ding la hahsa, hiti'a jum-le-jachat pum'a hinkho genthei tah'a aman laiyin, nikhat atable chung'ah lekhabu neocha khat " the Devine peace" ti'a kijih khat ana kikoiyin ahi. Aman jong bolding hetmon asimtan ahileh cilversmith tichu sum-eng lhatheng (sutheng) khatleh nungah chapang khat kihouna thusim ahi. ATHUSIM CHEDAN :- Cilversmith : Sum-eng lhatheng pan sum-eng chu mei-am chung'ah agousan ahi. Chapangnu :- Hepu ipidinga, sum-eng meiya nago ham? Cilversmith:- Tunu sum-eng chunga um anen jouse suhthengna dinga meiya kagosat ahi. Chapangnu : Meiya sum-eng igoleh iti then'a ham? hepu. Cilversmith : Mei-am chunga sum-eng kigou chu ha...sat'a ahung satteng, sum-eng chunga um anenho chu hungsoudoh intin sum-eng toh kikhen ding ahi. Chuteng anen hochu meiyin kavam intin, sum-eng thengsel chu hungsoh ding ahi. Hitobanga chu mihem hinkho jong Pathen'in asuhthengyi ahi. Chapangnu :- Ahileh Pathen'in mihem hinkhojong, mei-am banga sa genthei leh hahsatna ho'a asuhthengyi ham? Cilversmith: Henge tunu, Pathen in asemsa lei mihem ten genthei athoh ding adeipon ahi. Ahin, chonset ne'n popum'a, panna bei hinkho amandiu adeilou jeh'in, angailut mite chu leiset gim-gentheina mangchan suhthengna aneiyin ahi. Chapangnu :- Ahileh anenho meiyin kavam'in, i-ati leh sum-eng kavam louham? Cilversmith: Sum-eng akahvam louna dinga, kamit'in thildang ima velouva sum-eng bou a-vetlhih a kon aphat cha mei-am a kon kalahdohyi ahi. Chutobangma chun Pathen'in angailut miho chu gim-genthei na'n akahvam louna din avelhi jing'in, hitoh kilhon chun gim-gentheina'a kon aphat chan ahuhdohyin ahi. Chukeu chu ahipoi tunu, hiche sum-eng hi kalhahtheng masang chun nenpo pannabei ahi. Ahin, keiman kalhahtheng phat'in sum-eng theng asoh'in, leiset chunga amanlu pen ho lah'ah apangtan ahi. Chutima chun eiho lei-mihem tejong sum-eng banga leiset chonset nenpo ihiuvin ahi. Sum-eng banga manlu ihina diuva hinkho lhahtheng ngai ahi. Sum-eng nenpo panna bei, achunga mihem kinepna jong umtalou chu keiman kalhah thenga manlutah kaso banga, leiset hinkho kinepna abei nunga kinepna thah pethei leh hinkho manlutah sothei chu Pathen amabou ahi. Pathen'in alhahtheng miho hinkho chu manlutah hinkho hiding ahi. Hiche Thusim'a kon imudoh theiju chu ipiham itileh, mihem hinkho'a kinepna ake'a, abeinunga jong kinepna thah pethei Pathen aum'e ti akimudoh theiyin ahi. Hijeh chun kinepna thah pethei Pathen ibel'uva, ama lung lhaina hinkho imanjoh diu angaiyin ahi.

Achaina'n sopite, ipi dinga lung lhadah'a hinkho lam hilouva iman diuham, hinkho'a kinepna thah pethei Pathen aum'e ti geldo'u tin, Pathen lim-dam noiya kinepna thah'a hinkho mang din kipelut leuhen, aman lampi thah eigot teidiu ahi.

NATHINA DING PHAT LHIN MASANG'A THIDIN KIGO HIH'IN.

_eimi_news_

Share: