Mr MIZORAM H.LALTLANTHANGA ~ Tedika Chawngthu

LEILUNG pian hnu ah kum 1985 kum khan a hmasa ber ni turin Mr. Mizoram atan H. Laltlanthanga Bawngkawn tlangval chu thlan a ni. He Mr. Mizoram thlanna ah hian mi 75 velin hming an pe.

Nimahsela a tak a inlan erawh mi 70 an ni thung. Mr.Mizoram an thlanna hmun hi Vanapa Hall ah a ni. Heng hunlai hian Aizawl ah Gym a la awmlo hrim hrim. Hemi hunah hian zankhatna ah mi 30 te an inlan a zan hnihna awm leh in zan thum na ah Mr. Mizoram chu thlan chhuah a nita a ni.

Hemi tum hian inchai chak Lalkulha, Tlangsiama, Vanlalduata leh khang hunlaia tlangval pianthiam Kawnpui tuiliak Ramliana te an in phelh sek mai bakah zaithiam Ngurthangvela pawh hming pe zingah zuk tel a!!.Ai ka laih saih!!. Lalkulha leh Tlangsiama te hi lar tawh sa an nih angin sport lama mipui hip tu/tiphur tu atan a bika sawm an ni a,chuvanga mipui hma a inphelh sek an ni.In elna ah erawh an tel tak tak lo.

Chubak ah thil thleng nuihzatthlak leh chu mi ang mang lo bawl deuh chi nuichunga veng ten an sponsor te pawh an tel nawk mai!!. Judge te an nuih zankhua zak zan te pawh zu awm a!!. 

Runner up hi Laldawngliana a ni a. Aizawl Millenium ah khawl(machine) dawr a siam. 2nd runner up hi Francis Darzika of Nisapui a ni.

Hemi dawta hnung zui leh tu te chu Thangchuanga a ni a Miss Mizoram contestant lar tak Rudy- i pa a ni. A dawt leh ah inchai chak Sanglura a ni. 

He Mr. Mizoram buatsaih tute hi Ramhlun (infin vek lai) Sporting Club an ni. A puipa te chu- Director Er.Dunglena, Chief Engineer P.H.E.Chief judge Lawmsangzuala, IRS, CEO KVI Board organizing secy P.C.Sangkuma llS, PIB te an ni.

A kum leh 1986 ah a organised tu te tho hian Mr.Mizoram an buatsaih leh a Biakthanmawia of Mission Veng chu Mr. Mizoram ah an thlang leh. 

Biakthanmawia hi Tourisim Director a ni thin a pension in a chhuak tawh. A nupui chu Lalrinawmi(Nupuii) D/O Pu Robuanga(L) E.E Serchhip khua a matric pass hmasa ber(1958) a ni nghe nghe.

Nupuii hi a nutapa chu guitarist turu Tornado, Forever Young band ah te pawh lo tel tawh thin Chhuanawma( L) a ni.

Biakthanmawia hi 1985 kuma Mr. Mizoram a thlan tlin Laltlanthanga'n final zanah champion kawnghren a hren tir nghe nghe. 

1985 kuma H.Laltlanthanga Mr.Mizoram a nih tum hian  kawnghren leh no mawi a dawng a. Hemi tum hian pawisa cheng singkhat inchuh a ni.Heng hunlaia cheng sing khat hi chu a tam viau ang.Mahse Laltlanthanga hian cheng 3000/- chauh pawisa a dawng thung.

A chhan ber ni a lang chu contestant an tam lutuka khawdang atanga lokal te an ni a. Khang ho kha an bus fair ilo fahran atan an sem then ve niawm tak a ni. 

Laltlanthanga hi Body Builder a nilo hrim hrim a. Martial Art/ Taekwondo lam mi hrat khaw kheng a ni. Shillong lamah te thiam na zu paw chhuak in Martial Art zirna te pawh a hawng hial. 

Martial Art lama a chetla hi an hmuh in Mr. Mizorama tel turin mit a la em a an sawm a, a tum lem loh in a tel ta a ni.H. Laltlanthanga hian Mr. Mizoram a nih hnu lawk( 1986) ah ATC ah B.Th a zir daih.

B.Th a pass hnu ah a hmasa ber atan Probationary Pastor ni turin Vairengte bial ah dah a ni. Chumi hnu ah Pastor hna a chelh laiin Serampore ah B.D a zu zir leh a 1990 ah B.D a pass a Pastor puitling a nih hnu ah Tripura lam bial a vawng thung.

H.Laltlanthanga hi Hauhnar hnam a ni a. Bawngkawn mihlun mah nise a hna avanga hmun hrang2 ah a awm kual hnu in tun( Oct.2021) ah Armed Veng bialtu Pastor a ni mek. 

THLALAK A KAN HMUH:

-1985 Mr. Mizoram contestant te inphelh sek lai zankhat na.

-1985 Mr. Mizoram final zan.

-1985 Mr. Mizoram a tel- Tlangsiama, Raltawnvela,Lalkulha.

- Ramhlun Sporting club organising puipa te.

- 1986 Mr. Mizoram Biakthanmawia.

- 1985 Mr. Mizoram Laltlanthanga.

THU BELH- Mizorama pianthiam thlanna neih hmasak ber chu kum 1952 ah neih a ni a, Chhuanvawra Biate khua chu thlan a ni.

~ The Zoram Voice

Share: