𝗡𝗮𝘁𝗶𝗼𝗻𝗮𝗹 𝗥𝗲𝗴𝗶𝘀𝘁𝗲𝗿 𝗼𝗳 𝗖𝗶𝘁𝗶𝘇𝗲𝗻𝘀 (𝗡𝗥𝗖) 𝗵𝗶 𝗜𝗻𝗱𝗶𝗮 𝘀𝘂𝗻𝗴𝗮 𝗸𝗵𝗼 𝘂𝗺 𝗷𝗮𝘁, 𝗶𝗻𝗻 𝘂𝗺 𝗷𝗮𝘁 𝗹𝗲𝗵 𝗺𝗶𝗵𝗶𝗲𝗺 𝗰𝗵𝗲𝗻𝗴 𝗷𝗮𝘁 𝗷𝗶𝗵𝗹𝘂𝘁𝗻𝗮 𝗿𝗲𝗴𝗶𝘀𝘁𝗲𝗿 𝗮𝗵𝗶. 𝗛𝗶𝗰𝗵𝗲 𝗿𝗲𝗴𝗶𝘀𝘁𝗲𝗿 𝗸𝗶 𝘀𝗶𝗲𝗺𝗻𝗮 𝗺𝗮𝘀𝗮𝘁 𝗽𝗲𝗻 𝗰𝗵𝘂 𝟭𝟵𝟱𝟭 𝗖𝗲𝗻𝘀𝘂𝘀 𝗷𝗼𝘂𝘃𝗮 𝗮𝗻𝗮 𝗸𝗶𝘀𝗶𝗲𝗺 𝗰𝗵𝘂 𝗮𝗵𝗶. 𝗛𝗶𝗰𝗵𝗲 𝗷𝗼𝘂 𝗮𝗽𝗮𝘁 𝗰𝗵𝘂𝗻 𝗡𝗥𝗖 𝗮𝘂𝗺 𝗸𝗵𝗮 𝘁𝗮𝗽𝘂𝗼𝗻 𝗮𝗵𝗶. 𝗡𝗥𝗖 𝟭𝟵𝟱𝟭 𝗷𝗼𝘂𝘃𝗮 𝗜𝗻𝗱𝗶𝗮 𝘀𝘂𝗻𝗴𝗮 𝗡𝗥𝗖 𝘂𝗽𝗱𝗮𝘁𝗲 𝗸𝗶𝗯𝗼𝗹𝗻𝗮 𝗵𝗶 𝗔𝘀𝘀𝗮𝗺 𝘀𝘁𝗮𝘁𝗲 𝗯𝗼𝘂𝘀𝗲𝗵 𝗮𝗵𝗶𝗻𝗮𝗹𝗮𝗶𝘆𝗶𝗻 𝗮𝗵𝗶. 𝟮𝟬𝟭𝟱 𝗸𝘂𝗺'𝗮 𝗽𝗮𝘁 𝗮𝗻𝗮 𝗯𝘂𝗼𝗶𝗽𝗶 𝗽𝗮𝗻 𝘂 𝗮𝗵𝗶𝘁𝗮𝗻; 𝟮𝟰 𝗠𝗮𝗿𝗰𝗵 𝟭𝟵𝟳𝟭 𝗰𝗵𝘂 𝗰𝘂𝘁-𝗼𝗳𝗳 𝗱𝗮𝘁𝗲 𝗮𝗻𝗮 𝗵𝗶𝘀𝗮𝗵 𝘂𝘃𝗶𝗻 𝗮𝗵𝗶. 𝗛𝗶𝗰𝗵𝗲 𝗸𝗶𝗯𝗼𝗹𝗹𝗼𝗻𝗮 𝗷𝗶𝗲𝗵 𝗽𝗲𝗻𝘁𝗮𝗵 𝗰𝗵𝘂 𝗮𝗵𝗶𝗹𝗲𝗵 𝗴𝗮𝗺𝗽𝗮𝗺'𝗮 𝗸𝘂𝗼𝗻'𝗮 𝗱𝗮𝗻 𝗱𝗶𝗵𝗹𝗼𝘂𝘃𝗮 𝗵𝘂𝗻𝗴 𝗰𝗵𝗲𝗻𝗴𝗹𝘂𝘁 𝗵𝗼 (𝗶𝗹𝗹𝗲𝗴𝗮𝗹 𝗶𝗺𝗺𝗶𝗴𝗿𝗮𝗻𝘁𝘀) 𝗵𝗼𝗹𝗱𝗼𝗵'𝗮 𝗮𝗴𝗮𝗺 𝗹𝗮𝗻𝗴 𝘂𝘃𝗮 𝗹𝗲𝘀𝗼𝗹 𝗱𝗶𝗻𝗴 𝗮𝗵𝗶𝗽𝗲𝗻 𝗶𝗻 𝗮𝗵𝗶. 𝗛𝗶𝗰𝗵𝗲 𝘃𝗲𝘀𝘂𝗶 𝗱𝗶𝗻𝗴 𝗰𝗵𝘂𝗻 𝗥𝗲𝗴𝗶𝘀𝘁𝗿𝗮𝗿 𝗚𝗲𝗻𝗲𝗿𝗮𝗹 𝗹𝗲𝗵 𝗖𝗲𝗻𝘀𝘂𝘀 𝗖𝗼𝗺𝗺𝗶𝘀𝘀𝗶𝗼𝗻𝗲𝗿 𝗼𝗳 𝗜𝗻𝗱𝗶𝗮 𝗻𝗴𝗮𝗻𝘀𝗲 𝗮𝗻𝗮𝗵𝗶'𝗻 𝗮𝗵𝗶.
𝗔𝘀𝘀𝗮𝗺 𝗡𝗥𝗖 𝗰𝗵𝘂 𝟯𝟭 𝗔𝘂𝗴𝘂𝘀𝘁 𝟮𝟬𝟭𝟵 𝗻𝗶𝗸𝗵𝗼 𝗰𝗵𝘂𝗻 𝗮𝗻𝗮 𝗸𝗶𝘀𝗼𝗱𝗼𝗵 (𝗽𝘂𝗯𝗹𝗶𝘀𝗵𝗲𝗱) 𝗶𝗻 𝗮𝗵𝗶. 𝗔𝘀𝘀𝗮𝗺 𝗴𝗮𝗺𝘀𝘂𝗻𝗴'𝗮 𝗺𝗶𝗵𝗶𝗲𝗺 𝟯.𝟯 𝗰𝗿𝗼𝗿𝗲 𝗹𝗮𝗵-𝗮 𝗰𝗵𝘂𝗻 𝗡𝗥𝗖 𝗮 𝗷𝗮𝗼 𝗺𝗶 𝟯.𝟭 𝗰𝗿𝗼𝗿𝗲 𝗯𝗼𝘂 𝗮𝗻𝗮𝗵𝗶𝗻 𝗮𝗵𝗶. 𝗠𝗶𝗵𝗶𝗲𝗺 𝟭𝟵 𝗹𝗮𝗸𝗵 𝘁𝗼𝗯𝗮𝗻𝗴 𝗡𝗥𝗖 𝗮𝗵 𝗮𝗺𝗶𝗻 𝗮𝗷𝗮𝗼 𝘁𝗮𝗽𝘂𝗼𝗻 𝗮𝗵𝗶. 𝗛𝗶𝗰𝗵𝗲 𝗵𝗼𝗹𝗮𝗵'𝗮 𝗰𝗵𝘂𝗻 𝗠𝘂𝘀𝗹𝗶𝗺 𝗵𝗼 𝟲 𝗹𝗮𝗸𝗵 𝗮𝗵𝗶𝘂𝘃𝗶𝗻; 𝟭𝟯 𝗹𝗮𝗸𝗵 𝗰𝗵𝘂 𝗺𝗶 𝗱𝗮𝗻𝗴 𝗵𝗼 𝗮𝗵𝗶𝘂𝘃𝗲. 𝗡𝗥𝗖 𝗮 𝗷𝗮𝗼𝗹𝗼𝘂 𝗵𝗼 𝗰𝗵𝘂 𝗴𝗮𝗺 𝗻𝗲𝗶𝗹𝗼𝘂 (𝘀𝘁𝗮𝘁𝗲𝗹𝗲𝘀𝘀) 𝗰𝗵𝘂𝗹𝗲𝗵 𝘀𝘂𝗵𝗻𝗮 𝗱𝗶𝗻𝗴 𝗵𝗲𝗹𝗼𝘂 𝗺𝗶𝗵𝗶𝗲𝗺 𝗮𝘀𝗼𝗵𝗱𝗼𝗵 𝘁𝗮𝘂𝘃𝗶𝗻 𝗮𝗵𝗶.
𝗔𝗵𝗶𝗻 𝗵𝗶𝗰𝗵𝗲 𝗡𝗥𝗖 𝗰𝗵𝘂 𝗔𝘀𝘀𝗮𝗺 𝗕𝗝𝗣 𝗴𝗼𝘃𝗲𝗿𝗻𝗺𝗲𝗻𝘁 𝗴𝗲𝗹 𝗱𝗮𝗻 𝘁𝗼𝗵 𝗮𝗸𝗶𝗯𝗮𝗻𝗴 𝘁𝗮𝗽𝘂𝗼𝗻 𝗮𝗵𝗶. 𝗔𝗷𝗶𝗲𝗵 𝗰𝗵𝘂 𝗮𝗺𝗮𝗵𝗼 𝗰𝗵𝘂𝗻 𝗕𝗮𝗻𝗴𝗹𝗮𝗱𝗲𝘀𝗵 𝗮 𝗸𝘂𝗼𝗻'𝗮 𝗵𝘂𝗻𝗴 𝗰𝗵𝗲𝗻𝗴𝗹𝘂𝘁 𝗠𝘂𝘀𝗹𝗶𝗺 𝗵𝗼 𝗰𝗵𝘂 𝗮𝘁𝘂𝗽 𝘂 𝗮𝗵𝗶. 𝗜𝗻𝗱𝗶𝗮 𝗺𝗶'𝗮 𝗮𝗻𝗴𝗮𝗶𝘁𝗼'𝘂 𝘁𝗮𝗺𝘁𝗮𝗵 𝗮𝗷𝗮𝗼 𝘁𝗮𝗽𝘂𝗼𝗻; 𝗱𝗮𝗻 𝗱𝗶𝗵𝗹𝗼𝘂𝘃𝗮 𝗵𝘂𝗻𝗴 𝗰𝗵𝗲𝗻𝗴𝗹𝘂𝘁 𝗮 𝗮𝗴𝗲𝗹 𝘂 𝗺𝗶 𝘁𝗮𝗺𝘁𝗮𝗵 𝗡𝗥𝗖 𝗮𝗵 𝗮𝗷𝗮𝗼 𝗸𝗶𝘁 𝗶𝗻 𝗮𝗵𝗶.
𝗡𝗼𝘃𝗲𝗺𝗯𝗲𝗿 𝟮𝟬𝟭𝟴 𝗰𝗵𝘂𝗻 𝗦𝘂𝗽𝗿𝗲𝗺𝗲 𝗖𝗼𝘂𝗿𝘁 𝗶𝗻 𝗧𝗿𝗶𝗽𝘂𝗿𝗮 𝗮 𝗡𝗥𝗖 𝗰𝗵𝗲𝗹𝗵𝗮𝗵 𝘀𝗮𝗵𝗻𝗮 𝗱𝗶𝗻𝗴 𝗶𝗻 𝗚𝗼𝘃𝗲𝗿𝗻𝗺𝗲𝗻𝘁 𝗼𝗳 𝗜𝗻𝗱𝗶𝗮 (𝗚𝗼𝗜) 𝗹𝗲𝗵 𝗘𝗹𝗲𝗰𝘁𝗶𝗼𝗻 𝗖𝗼𝗺𝗺𝗶𝘀𝘀𝗶𝗼𝗻 𝗼𝗳 𝗜𝗻𝗱𝗶𝗮 𝘁𝗵𝘂 𝗮𝗻𝗮 𝗽𝗲 𝗶𝗻 𝗮𝗵𝗶. 𝗔𝗵𝗶𝗻 𝘁𝘂𝗰𝗵𝗮𝗻 𝗶𝗻 𝗧𝗿𝗶𝗽𝘂𝗿𝗮 𝗮𝗵 𝗡𝗥𝗖 𝗮𝗰𝗵𝗲𝗹𝗵𝗮 𝗻𝗮𝗶𝗽𝘂𝗼𝗻 𝗮𝗵𝗶. 𝗡𝗮𝗴𝗮𝗹𝗮𝗻𝗱 𝗚𝗼𝘃𝗲𝗿𝗻𝗺𝗲𝗻𝘁 𝗶𝗻 𝗷𝗼𝗻𝗴 𝗝𝘂𝗻𝗲 𝟮𝟬𝟭𝟵 𝗰𝗵𝘂𝗻 𝗡𝗥𝗖 𝘁𝗼𝗵 𝗸𝗶𝗯𝗮𝗻𝗴 𝘁𝗵𝗶𝗺 𝗥𝗲𝗴𝗶𝘀𝘁𝗿𝗮𝘁𝗶𝗼𝗻 𝗼𝗳 𝗜𝗻𝗱𝗶𝗴𝗲𝗻𝗼𝘂𝘀 𝗜𝗻𝗵𝗮𝗯𝗶𝘁𝗮𝗻𝘁𝘀 𝗼𝗳 𝗡𝗮𝗴𝗮𝗹𝗮𝗻𝗱 (𝗥𝗜𝗜𝗡) 𝗮𝗻𝗮 𝗯𝗼𝗹 𝘂𝘃𝗶𝗻 𝗮𝗵𝗶.
𝗚𝗼𝗜 𝗶𝗻 𝟮𝟬𝟮𝟭 𝗸𝘂𝗺 𝗰𝗵𝘂𝗻 𝗡𝗥𝗖 𝗵𝗶 𝗜𝗻𝗱𝗶𝗮 𝗽𝘂𝗺𝗽𝗶'𝗮 𝘂𝗽𝗱𝗮𝘁𝗲 𝗯𝗼𝗹 𝗱𝗶𝗻𝗴 𝗶𝗻 𝗮𝗻𝗮 𝗽𝗵𝘂𝗼𝗻𝗴 𝗶𝗻 𝗮𝗵𝗶. 𝗔𝗵𝗶𝗻 𝘁𝘂𝗰𝗵𝗮𝗻 𝗶𝗻 𝗮𝗰𝗵𝗲𝗹𝗵𝗮 𝗻𝗮𝗶𝗽𝗼𝗶. 𝗗𝗲𝗰𝗲𝗺𝗯𝗲𝗿 𝟮𝟬𝟭𝟵 𝗰𝗵𝘂𝗻 𝗣𝗮𝗿𝗹𝗶𝗮𝗺𝗲𝗻𝘁 𝗶𝗻 𝗖𝗶𝘁𝗶𝘇𝗲𝗻𝘀𝗵𝗶𝗽 𝗔𝗺𝗲𝗻𝗱𝗺𝗲𝗻𝘁 𝗔𝗰𝘁 𝟮𝟬𝟭𝟵 (𝗖𝗔𝗔) 𝗮𝗻𝗮 𝗽𝗮𝘀𝘀𝗲𝗱 𝗶𝗻 𝗮𝗵𝗶. 𝗕𝗮𝗻𝗴𝗹𝗮𝗱𝗲𝘀𝗵, 𝗣𝗮𝗸𝗶𝘀𝘁𝗮𝗻 𝗹𝗲𝗵 𝗔𝗳𝗴𝗵𝗮𝗻𝗶𝘀𝘁𝗮𝗻 𝗴𝗮𝗺 𝗮 𝘀𝘂𝗵𝗴𝗲𝗻𝘁𝗵𝗲𝗶 𝗮 𝘂𝗺 𝗛𝗶𝗻𝗱𝘂, 𝗖𝗵𝗿𝗶𝘀𝘁𝗶𝗮𝗻, 𝗕𝘂𝗱𝗱𝗵𝗶𝘀𝘁𝘀, 𝗣𝗮𝗿𝘀𝗶 𝗹𝗲𝗵 𝗝𝗮𝗶𝗻 𝗵𝗼 𝗜𝗻𝗱𝗶𝗮 𝗮 𝗵𝘂𝗻𝗴 𝗷𝗮𝗺𝗹𝘂𝘁 𝗵𝗼 𝗜𝗻𝗱𝗶𝗮 𝗺𝗶 (𝗰𝗶𝘁𝗶𝘇𝗲𝗻𝘀𝗵𝗶𝗽) 𝗴𝗮𝗻𝗴 𝗷𝗲𝗽'𝗮 𝗽𝗲𝗵 𝘁𝗵𝗲𝗶𝗻𝗮 𝗱𝗶𝗻𝗴 𝗮𝘁𝘂𝗽 𝗮𝗵𝗶. 𝗠𝘂𝘀𝗹𝗶𝗺 𝗵𝗼 𝗮𝗵𝘂𝗼𝗽𝘁𝗵𝗮 𝗸𝗶𝘁 𝗽𝘂𝗼𝗻 𝗮𝗵𝗶.
𝗡𝗥𝗖 𝗵𝗶 𝗠𝘂𝘀𝗹𝗶𝗺 𝗵𝗼 𝗜𝗻𝗱𝗶𝗮 𝗺𝗶 𝗵𝗶𝗻𝗮 (𝗰𝗶𝘁𝗶𝘇𝗲𝗻𝘀𝗵𝗶𝗽) 𝘀𝘂𝗵𝗺𝗮𝗻𝗴𝗻𝗮 𝗶𝗻 𝗵𝗶𝗻 𝗺𝗮𝗻𝗴𝗰𝗵𝗮 𝘂𝘃𝗶𝗻𝘁𝗲 𝘁𝗶𝗮 𝗸𝗶𝗰𝗵𝗮𝘁𝗻𝗮 𝗮𝗻𝗲𝗶 𝗷𝗶𝗲𝗵 𝘂𝘃𝗶𝗻 𝗜𝗻𝗱𝗶𝗮 𝗴𝗮𝗺 𝗺𝘂𝗻 𝗰𝗵𝘂𝗼𝗺 𝗰𝗵𝘂𝗼𝗺 𝗮𝗵 𝗖𝗔𝗔 𝟮𝟬𝟭𝟵 𝗹𝗲𝗵 𝗡𝗥𝗖 𝗱𝗲𝗶𝗹𝗼𝘂𝗻𝗮 𝗶𝗻 𝗸𝗶𝗽𝗵𝗶𝗻𝗻𝗮 𝗮𝗻𝗮 𝗰𝗵𝗲𝗹𝗵𝗮 𝗷𝗶𝗻𝗴 𝗶𝗻 𝗮𝗵𝗶. 𝗠𝗮𝗵𝗮𝗿𝗮𝘀𝗵𝘁𝗿𝗮, 𝗞𝗲𝗿𝗮𝗹𝗮, 𝗣𝘂𝗻𝗷𝗮𝗯, 𝗥𝗮𝗷𝘀𝗮𝗵𝘁𝗵𝗮𝗻, 𝗪𝗲𝘀𝘁 𝗕𝗲𝗻𝗴𝗮𝗹, 𝗕𝗶𝗵𝗮𝗿, 𝗠𝗮𝗱𝗵𝘆𝗮 𝗣𝗿𝗮𝗱𝗲𝘀𝗵, 𝗢𝗱𝗶𝘀𝗵𝗮, 𝗔𝗻𝗱𝗵𝗿𝗮 𝗣𝗿𝗮𝗱𝗲𝘀𝗵, 𝗖𝗵𝗵𝗮𝘁𝗶𝘀𝗴𝗮𝗿𝗵, 𝗝𝗵𝗮𝗿𝗸𝗵𝗮𝗻𝗱 𝗹𝗲𝗵 𝗗𝗲𝗹𝗵𝗶 𝗵𝗼'𝗻 𝗖𝗔𝗔 𝗹𝗲𝗵 𝗡𝗥𝗖 𝗮 𝗰𝗵𝗲𝗽𝗶 𝗻𝘂𝗼𝗺 𝗽𝗼𝘂𝘃𝗶𝗻 𝗮𝗵𝗶 (𝗝𝗮𝗻𝘂𝗮𝗿𝘆 𝟮𝟬𝟮𝟬). 𝗜𝗻𝗱𝗶𝗮 𝗴𝗮𝗺 𝗮𝗹𝗶𝗲𝗻𝗷𝗼/𝗮𝘁𝗮𝗺𝗷𝗼 𝗶𝗻 𝗖𝗔𝗔 𝗹𝗲𝗵 𝗡𝗥𝗖 𝘂𝗺 𝗱𝗶𝗻𝗴 𝗮𝗱𝗲𝗶𝗹𝗼𝘂 𝘁𝗶𝗻𝗮 𝗮𝗵𝗶.
𝗜𝗻𝗱𝗶𝗮 𝗮 𝗖𝗔𝗔 𝗹𝗲𝗵 𝗡𝗥𝗖 𝗵𝗶𝗻 𝗠𝘂𝘀𝗹𝗶𝗺 𝗵𝗼 𝗮𝘁𝘂𝗽 (𝘁𝗮𝗿𝗴𝗲𝘁) 𝗵𝗶𝗹𝗲𝗵 𝗮𝗸𝗶𝗹𝗼𝗺 𝗶𝗻; 𝗠𝗮𝗻𝗶𝗽𝘂𝗿 𝗮 𝗡𝗥𝗖 𝗰𝗵𝗲𝗽𝗶 𝗱𝗶𝗻𝗴 𝗱𝗲𝗶𝗵𝗼 𝗵𝗶𝗻 𝗞𝘂𝗸𝗶-𝗖𝗵𝗶𝗻, 𝗠𝘂𝘀𝗹𝗶𝗺 𝗹𝗲𝗵 𝗡𝗲𝗽𝗮𝗹𝗶 𝗵𝗼 𝗵𝗶 𝗮𝘁𝘂𝗽 𝘂𝘃𝗶𝗻 𝗮𝗸𝗶𝗹𝗮𝗻𝗴 𝗶𝗻 𝗮𝗵𝗶.
𝗠𝗮𝗻𝗶𝗽𝘂𝗿 𝗹𝗲𝗵 𝗡𝗥𝗖:
𝗠𝗲𝗶𝗹𝗵𝗲𝗶𝗵𝗼 𝘀𝗲𝗶 𝗱𝗮𝗻 𝗶𝗻 𝗠𝗮𝗻𝗶𝗽𝘂𝗿 𝗮 𝗵𝗶𝗻 𝗽𝗮𝘀𝘀 𝗮𝗵𝗶𝗹𝗼𝘂𝗹𝗲𝗵 𝗽𝗲𝗿𝗺𝗶𝘀𝘀𝗶𝗼𝗻 𝘀𝘆𝘀𝘁𝗲𝗺 𝗮𝗻𝗮 𝘂𝗺 𝗶𝗻 𝗮𝗵𝗶. 𝗛𝗶𝗰𝗵𝘂𝗻 𝗴𝗮𝗺𝗽𝗮𝗺𝗺𝗶 𝗮𝗵𝘂𝗻𝗴𝗹𝘂𝘁 𝗹𝗲𝗵 𝗮𝗰𝗵𝗲𝗻𝗻𝗮𝘂 𝗮𝗻𝗮 𝘃𝗲𝘀𝘂𝗶 𝗶𝗻 𝗮𝗵𝗶. 𝗡𝗼𝘃𝗲𝗺𝗯𝗲𝗿 𝟭𝟵𝟱𝟬 𝗸𝘂𝗺 𝗰𝗵𝘂𝗻 𝗖𝗵𝗶𝗲𝗳 𝗖𝗼𝗺𝗺𝗶𝘀𝘀𝗶𝗼𝗻𝗲𝗿 𝗛𝗶𝗺𝗺𝗮𝘁 𝗦𝗶𝗻𝗴𝗵 𝗶𝗻 𝗵𝗶𝗰𝗵𝗲 𝗽𝗲𝗿𝗺𝗶𝘀𝘀𝗶𝗼𝗻 𝘀𝘆𝘀𝘁𝗲𝗺 𝗰𝗵𝘂 𝗮𝗻𝗮 𝘀𝘂𝗯𝗲𝗶 𝗶𝗻 𝗮𝗵𝗶. 𝗛𝗶𝗰𝗵𝗲 𝗽𝗲𝗿𝗺𝗶𝘀𝘀𝗶𝗼𝗻 𝘀𝘆𝘀𝘁𝗲𝗺 𝗸𝗶𝘀𝘂𝗵𝗯𝗲𝗶 𝗮 𝗸𝘂𝗼𝗻 𝗰𝗵𝘂𝗻 𝗴𝗮𝗺𝗽𝗮𝗺 𝗺𝗶𝗵𝗼 𝗯𝗮𝗶𝘁𝗮𝗵 𝗶𝗻 𝗮𝗵𝘂𝗻𝗴 𝗰𝗵𝗲𝗻𝗴𝗹𝘂𝘁 𝘂𝘃𝗲 𝗮𝘁𝗶𝘂 𝗮𝗵𝗶. 𝗛𝗶𝗷𝗶𝗲𝗵 𝗰𝗵𝘂𝗻 𝗺𝗮𝘀𝗮𝗻𝗴'𝗮 𝗽𝗮𝘁 𝗮𝗻𝗮 𝗰𝗵𝗲𝗻𝗴𝘀𝗮 𝗮𝗴𝗮𝗺 𝗺𝗶𝗵𝗼 𝗰𝗵𝗮𝗻𝘃𝗼𝘂 𝗱𝗶𝗻𝗴 𝗮𝗽𝗮𝗺'𝗮 𝗸𝘂𝗼𝗻'𝗮 𝗵𝘂𝗻𝗴 𝗰𝗵𝗲𝗻𝗴𝗹𝘂𝘁 𝗵𝗼𝗻 𝗮𝗹𝗮𝗵 𝗽𝗲𝗵 𝗴𝗮𝗺 𝘁𝗮𝘂𝘃𝗲 𝗮𝘁𝗶𝘂 𝗮𝗵𝗶. 𝗕𝗮𝗻𝗴𝗹𝗮𝗱𝗲𝘀𝗵 𝗹𝗲𝗵 𝗠𝘆𝗮𝗻𝗺𝗮𝗿 𝗮𝗸𝘂𝗼𝗻 𝗮 𝗵𝘂𝗻𝗴 𝗠𝘂𝘀𝗹𝗶𝗺 𝗵𝗼𝗻 𝗝𝗶𝗿𝗶𝗯𝗮𝗺 𝗔𝘀𝘀𝗲𝗺𝗯𝗹𝘆 𝗖𝗼𝗻𝘀𝘁𝗶𝘁𝘂𝗲𝗻𝗰𝘆 𝗮𝗸𝗶𝗹𝗮𝗵 𝘂𝘃𝗶𝗻 𝗰𝗵𝘂𝗹𝗲𝗵 𝗠𝗮𝗻𝗶𝗽𝘂𝗿 𝗽𝗵𝗮𝗶𝗰𝗵𝗮𝗺 𝗺𝘂𝗻𝘁𝗶𝗻 𝗮𝗵 𝗮𝗰𝗵𝗲𝗻𝗴 𝘂𝘃𝗶𝗻 𝗮𝗵𝗶. 𝗔𝗯𝗮𝗻 𝗶𝗻 𝗠𝘆𝗮𝗻𝗺𝗮𝗿 𝗮𝗸𝘂𝗼𝗻'𝗮 𝗵𝘂𝗻𝗴 𝗞𝘂𝗸𝗶-𝗖𝗵𝗶𝗻 𝗵𝗼𝗻 𝗺𝘂𝗼𝗹 𝗹𝗲 𝗹𝗵𝗮𝗮𝗻𝗴 𝗹𝗶𝗲𝗻𝘁𝗮𝗵 𝗮𝘁𝗼𝘂𝗽𝗵𝗮𝘂𝘃𝗶𝗻 𝗰𝗵𝘂𝗹𝗲𝗵 𝗡𝗲𝗽𝗮𝗹𝗶 𝗵𝗼 𝗷𝗼𝗻𝗴 𝗻𝗮𝘀𝗮𝘁𝗮𝗵 𝗶𝗻 𝗮𝗽𝘂𝗻𝗴 𝘂𝘃𝗲 𝗮𝘁𝗶𝘂 𝗮𝗵𝗶.
𝗠𝗮𝗻𝗶𝗽𝘂𝗿 𝗽𝗮𝗺 𝗮 𝗸𝘂𝗼𝗻'𝗮 𝗵𝘂𝗻𝗴 𝗰𝗵𝗲𝗻𝗴𝗹𝘂𝘁 𝗵𝗼 𝘃𝗲𝗻𝗻𝗮 𝗱𝗶𝗻𝗴 𝗶𝗻 𝗗𝗲𝗰𝗲𝗺𝗯𝗲𝗿 𝟮𝟬𝟭𝟵 𝗮𝗽𝗮𝘁 𝗰𝗵𝘂𝗻 𝗠𝗮𝗻𝗶𝗽𝘂𝗿 𝗴𝗮𝗺 𝘀𝘂𝗻𝗴𝗮𝗵 𝗜𝗻𝗻𝗲𝗿 𝗟𝗶𝗻𝗲 𝗣𝗲𝗿𝗺𝗶𝘁 𝗦𝘆𝘀𝘁𝗲𝗺 (𝗜𝗟𝗣𝗦) 𝗮𝗵𝗶𝗻 𝗰𝗵𝗲𝗽𝗶𝘂𝘃𝗶𝗻 𝗮𝗵𝗶. 𝗝𝘂𝗻𝗲 𝟮𝟬𝟮𝟭 𝗰𝗵𝘂𝗻 𝗠𝗮𝗻𝗶𝗽𝘂𝗿 𝗚𝗼𝘃𝗲𝗿𝗻𝗺𝗲𝗻𝘁 𝗶𝗻 𝟭𝟵𝟲𝟭 𝗮𝗽𝗮𝘁'𝗮 𝗮𝗻𝗮 𝗰𝗵𝗲𝗻𝗴 𝗵𝗼 𝗰𝗵𝘂 𝗠𝗮𝗻𝗶𝗽𝘂𝗿 𝗺𝗶 (𝗻𝗮𝘁𝗶𝘃𝗲) 𝗮 𝘀𝗶𝗺 𝗱𝗶𝗻 𝗽𝗵𝗮 𝗮𝗻𝗮 𝘀𝗮𝘂𝘃𝗶𝗻 𝗮𝗵𝗶. 𝗡𝗥𝗖 𝗱𝗲𝗶 𝗸𝗶𝗹𝗼𝗶𝗸𝗵𝗼𝗺𝗻𝗮 𝗵𝗼𝗻 𝗜𝗟𝗣 𝗵𝗶𝗻 "𝗮𝗴𝗮𝗺𝗺𝗶" (𝗼𝗿𝗶𝗴𝗶𝗻𝗮𝗹 𝗿𝗲𝘀𝗶𝗱𝗲𝗻𝘁𝘀) 𝗮𝘀𝗲𝗶𝗰𝗵𝗲𝗻 𝘁𝗵𝗲𝗶𝗽𝗼𝗶 𝗮𝘁𝗶𝘂 𝗮𝗵𝗶. 𝗛𝗶𝗷𝗶𝗲𝗵 𝗰𝗵𝘂𝗻 𝗡𝗥𝗖 𝗵𝗶𝗻 𝗠𝗮𝗻𝗶𝗽𝘂𝗿 𝗴𝗮𝗺𝗺𝗶 𝗹𝗲𝗵 𝗴𝗮𝗺𝗺𝗶 𝗹𝗼𝘂 𝗸𝗶𝗰𝗵𝗲𝗵 𝘁𝗮𝗵 𝗮 𝗮𝗵𝗶𝗻 𝗵𝗼𝗽𝗸𝗵𝗲𝗻 𝗱𝗶𝗻𝗴 𝗮𝗵𝗶 𝗮𝘁𝗶𝘂𝘃𝗮 𝗡𝗥𝗖 𝗰𝗵𝗲𝗹𝗵𝗮𝗵𝗻𝗮 𝗱𝗶𝗻𝗴 𝗻𝗮𝘀𝗮𝘁𝗮𝗵-𝗮 𝗮𝗻𝗴𝗲𝗵 𝘂 𝗮𝗵𝗶.
𝗠𝗲𝗶𝗹𝗵𝗲𝗶 𝗹𝗲𝗵 𝗡𝗮𝗴𝗮 𝗯𝗼𝘂𝘀𝗲𝗵 𝗵𝗶 𝗠𝗮𝗻𝗶𝗽𝘂𝗿 𝗴𝗮𝗺𝗺𝗶 (𝗶𝗻𝗱𝗶𝗴𝗲𝗻𝗼𝘂𝘀) 𝗱𝗮𝗻 𝗶𝗻 𝗮𝗸𝗶𝘀𝗲𝗶 𝘂𝘃𝗶𝗻, 𝗡𝗥𝗖 𝗰𝗵𝗲𝗽𝗶 𝗱𝗶𝗻𝗴 𝗵𝗶 𝗮𝘁𝗵𝗮𝗻𝘂𝗼𝗺 𝗹𝗵𝗲𝗵 𝘂𝘃𝗶𝗻 𝗮𝗵𝗶. 𝗡𝗥𝗖 𝘁𝗵𝘂 𝗵𝗶 𝗞𝗵 𝗝𝗼𝘆 𝗞𝗶𝘀𝗵𝗮𝗻, 𝗠𝗟𝗔 𝗶𝗻 𝗠𝗮𝗻𝗶𝗽𝘂𝗿 𝗔𝘀𝘀𝗲𝗺𝗯𝗹𝘆 𝗮 𝗮𝗻𝗮 𝗽𝗼𝗱𝗼𝗵 𝗮𝗵𝗶. 𝗔𝗺𝗮 𝘀𝗲𝗶 𝗱𝗮𝗻 𝗰𝗵𝘂𝗻 𝗛𝗶𝗹𝗹 𝗮𝗿𝗲𝗮𝘀 𝗮𝗵 𝟭𝟵𝟳𝟭 𝘁𝗼𝗵 𝟮𝟬𝟬𝟭 𝗸𝘂𝗺 𝘀𝘂𝗻𝗴 𝗵𝗶𝗻 𝗺𝗶𝗵𝗶𝗲𝗺 𝟭𝟱𝟯.𝟯𝟬% 𝗶𝗻 𝗮𝗽𝘂𝗻𝗴 𝗶𝗻; 𝟮𝟬𝟬𝟭 𝘁𝗼𝗵 𝟮𝟬𝟭𝟭 𝗸𝘂𝗺 𝘀𝘂𝗻𝗴 𝗵𝗶𝗻 𝟮𝟱𝟬.𝟵𝟬% 𝗮𝗽𝘂𝗻𝗴 𝗶𝗻 𝗮𝗵𝗶. 𝗖𝗵𝘂𝗹𝗲𝗵 𝗩𝗮𝗹𝗹𝗲𝘆 𝗮𝗿𝗲𝗮𝘀 𝗮𝗵 𝟭𝟵𝟳𝟭 𝘁𝗼𝗵 𝟮𝟬𝟬𝟭 𝗸𝘂𝗺 𝘀𝘂𝗻𝗴 𝗵𝗶𝗻 𝗺𝗶𝗵𝗶𝗲𝗺 𝟵𝟰.𝟴𝟬% 𝗶𝗻 𝗮𝗽𝘂𝗻𝗴 𝗶𝗻; 𝟮𝟬𝟬𝟭 𝘁𝗼𝗵 𝟮𝟬𝟭𝟭 𝗸𝘂𝗺 𝘀𝘂𝗻𝗴 𝗵𝗶𝗻 𝟭𝟮𝟱% 𝗮𝗽𝘂𝗻𝗴 𝗶𝗻 𝗮𝗵𝗶. 𝗔𝗺𝗮𝗻 𝗮𝘀𝗲𝗶𝗻𝗮 𝗮 𝗮𝗰𝗵𝘂𝗻 𝗴𝗮𝗺𝗽𝗮𝗺'𝗮 𝗸𝘂𝗼𝗻 𝗮 𝗮𝗴𝘂𝗵'𝗮 𝗺𝗶 𝗵𝘂𝗻𝗴𝗹𝘂𝘁 𝗱𝗮𝗻 𝗶𝗻 𝗮𝘀𝗲𝗶 𝗶𝗻 𝗮𝗵𝗶.
𝗠𝗮𝗻𝗶𝗽𝘂𝗿 𝗦𝘁𝗮𝘁𝗲 𝗔𝘀𝘀𝗲𝗺𝗯𝗹𝘆 𝗶𝗻 𝟲 𝗔𝘂𝗴𝘂𝘀𝘁 𝟮𝟬𝟮𝟮 𝗻𝗶𝗸𝗵𝗼 𝗰𝗵𝘂𝗻 𝗠𝗮𝗻𝗶𝗽𝘂𝗿 𝗮 𝗡𝗥𝗖 𝗰𝗵𝗲𝗽𝗶 𝗱𝗶𝗻𝗴 𝗹𝗲𝗵 𝗣𝗼𝗽𝘂𝗹𝗮𝘁𝗶𝗼𝗻 𝗖𝗼𝗺𝗺𝗶𝘀𝘀𝗶𝗼𝗻 𝘀𝗶𝗲𝗺𝗱𝗼𝗵𝗻𝗮 𝗱𝗶𝗻𝗴 𝗶𝗻 𝗸𝗶𝗹𝘂𝗼𝗹𝗻𝗮 𝗮𝗻𝗮 𝗻𝗲𝗶 𝘂𝘃𝗶𝗻 𝗮𝗵𝗶. 𝗛𝗶𝗰𝗵𝗲 𝗵𝗶 𝗠𝗲𝗶𝗹𝗵𝗲𝗶 𝗹𝗲𝗵 𝗡𝗮𝗴𝗮 𝗖𝗦𝗢𝘀 𝗵𝗼 𝗱𝗲𝗺𝗮𝗻𝗱 𝗮𝘀𝘂𝗵 𝗯𝘂𝗹𝗵𝗶𝘁 𝗽𝗲𝗵𝗻𝗮𝘂 𝗮𝗵𝗶.
𝗡𝗥𝗖 𝗰𝗵𝗲𝗽𝗶 𝗱𝗶𝗻𝗴 𝗱𝗲𝗶𝗵𝗼 𝗵𝗶𝗻 𝗠𝗮𝗻𝗶𝗽𝘂𝗿 𝗴𝗮𝗺𝗽𝗮𝗺𝗺𝗶 𝘁𝗶𝗰𝗵𝘂 𝗕𝗮𝗻𝗴𝗹𝗮𝗱𝗲𝘀𝗵, 𝗠𝘆𝗮𝗻𝗺𝗮𝗿 𝗮𝗸𝘂𝗼𝗻 𝗠𝘂𝘀𝗹𝗶𝗺 (𝗝𝗶𝗿𝗶𝗯𝗮𝗺 𝗹𝗲𝗵 𝗽𝗵𝗮𝗶𝗴𝗮𝗺 𝗮 𝗸𝗶𝘁𝗵𝗲𝘁𝗵𝗮𝗻𝗴 𝗵𝗼) 𝗰𝗵𝘂𝗹𝗲𝗵 𝗡𝗲𝗽𝗮𝗹𝗶 (𝗚𝘂𝗿𝗸𝗵𝗮) 𝗵𝗼 𝗷𝗼𝗻𝗴 𝗵𝗼𝗹𝗱𝗼𝗵 𝗱𝗶𝗻𝗴 𝗵𝗶 𝗮𝗹𝘂𝗻𝗴𝘁𝘂𝗽 𝘂 𝗮𝗵𝗶. 𝗞𝘂𝗸𝗶-𝗖𝗵𝗶𝗻 𝗴𝗿𝗼𝘂𝗽 𝗵𝗼 𝗠𝘆𝗮𝗻𝗺𝗮𝗿 𝗴𝗮𝗺 𝗮𝗽𝗮𝘁 𝘁𝗮𝗺𝗽𝗶 𝗮𝗵𝘂𝗻𝗴 𝗹𝘂𝘁 𝘂𝘃𝗲 𝗮𝘁𝗶𝘂 𝗮𝗵𝗶. 𝗔𝗵𝗶𝗻 𝗖𝗲𝗻𝘀𝘂𝘀 𝗵𝗼 𝗶𝘃𝗲𝘁 𝗽𝗵𝗮𝘁 𝗹𝗲𝗵 𝗲𝗶𝗵𝗼 𝗺𝗶𝘀𝗶𝗺 (𝗽𝗼𝗽𝘂𝗹𝗮𝘁𝗶𝗼𝗻) 𝗵𝗶 𝗮𝗵𝗶 𝗱𝗶𝗯𝗲𝗽 𝗮 𝗽𝘂𝗻𝗴 𝗮𝗵𝗶. 𝗡𝗮𝗴𝗮 𝗵𝗼 𝗷𝗼𝗵 𝗸𝗵𝘂 𝗺𝗲𝗹𝘀𝗲 𝗹𝗲𝘂𝘃𝗮 𝗽𝘂𝗻𝗴 𝗮𝗵𝗶𝘂𝘃𝗲.
𝗙𝗲𝗯𝗿𝘂𝗮𝗿𝘆 𝟮𝟬𝟮𝟭 𝗸𝘂𝗺'𝗮 𝗠𝘆𝗮𝗻𝗺𝗮𝗿 𝗴𝗮𝗺 𝗮 𝗺𝗶𝗹𝗶𝘁𝗮𝗿𝘆 𝗰𝗼𝘂𝗽 𝘂𝗺 𝗷𝗶𝗲𝗵 𝗮 𝗠𝗮𝗻𝗶𝗽𝘂𝗿 𝗴𝗮𝗺𝘀𝘂𝗻𝗴'𝗮 𝗠𝘆𝗮𝗻𝗺𝗮𝗿 𝗺𝗶 𝗮𝗱𝗶𝗲𝗵'𝗮 𝗞𝘂𝗸𝗶-𝗖𝗵𝗶𝗻 𝗵𝗼 𝘁𝗮𝗺𝘁𝗮𝗵 𝗵𝘂𝗻𝗴 𝗷𝗮𝗺𝗹𝘂𝘁 𝗱𝗶𝗮 𝗷𝗼𝗻𝗴 𝗮𝘀𝗲𝗶 𝘂 𝗮𝗵𝗶. 𝗔𝗵𝗶𝗻 𝗠𝗮𝗻𝗶𝗽𝘂𝗿 𝗮𝗵 𝗠𝘆𝗮𝗻𝗺𝗮𝗿 𝗮𝗸𝘂𝗼𝗻 𝗴𝗮𝗹𝗷𝗮𝗺 𝗵𝗶 𝗺𝗶 𝟰𝟬𝟬𝟬 𝘃𝗮𝗹 𝗯𝗲𝗽 𝗶𝗻 𝗮𝗸𝗶𝘀𝗲𝗶 𝗶𝗻 𝗮𝗵𝗶 (𝗛𝗶𝗰𝗵𝗲 𝗹𝗮𝗵 𝗮 𝗰𝗵𝘂𝗻 𝗞𝘂𝗸𝗶-𝗖𝗵𝗶𝗻 𝗵𝗼 𝗮𝗹𝗵𝗼𝗺𝗷𝗼 𝗮𝗵𝗶). 𝗔𝘁𝗮𝗺𝗷𝗼 𝗠𝗶𝘇𝗼𝗿𝗮𝗺 𝗹𝗮𝗻𝗴'𝗮 𝗷𝗮𝗺𝗹𝘂𝘁 𝗮𝗵𝗶𝘂𝘃𝗶𝗻 𝗮𝗵𝗶.
𝗞𝘂𝗸𝗶-𝗭𝗼 𝗹𝗲𝗵 𝗡𝗥𝗖:
𝗠𝗲𝗶𝗹𝗵𝗲𝗶 𝗹𝗲𝗵 𝗡𝗮𝗴𝗮 𝗵𝗼𝗵𝗶𝗻 𝗡𝗥𝗖 𝘂𝗺 𝗵𝗲𝗻𝗹𝗮𝗻𝗴 𝗵𝗶𝗹𝗲𝗵 𝗮𝗺𝗮𝗵𝗼 𝗵𝗶 𝗸𝗵𝘂𝗼𝗹𝗻𝗮 𝘂𝗺𝗹𝗼𝘂𝘃𝗮 𝗡𝗥𝗖 𝗮 𝗷𝗮𝗼 𝗷𝗲𝗻𝗴 𝗱𝗶𝗻𝗴𝗮 𝗸𝗶𝗻𝗴𝗮𝗶𝘁𝘂𝗼𝗻𝗮 𝗮𝗻𝗲𝗶 𝘂𝘃𝗶𝗻 𝗮𝗵𝗶. 𝗔𝗺𝗮𝗵𝗼 𝗷𝗼𝗻𝗴 𝗮𝗴𝗮𝗺 𝗹𝗲𝗶𝘀𝗶𝗲𝘁 𝘁𝗼𝗵 𝗵𝘂𝗻𝗴 𝗸𝗶𝘀𝗶𝗲𝗺𝘁𝗵𝗮 𝗮𝗵𝗶 𝗱𝗶𝗲𝗵 𝗽𝗼𝘂𝘃𝗲. 𝗚𝗮𝗺 𝗰𝗵𝘂𝗼𝗺 𝗮𝗽𝗮𝘁'𝗮 𝗵𝘂𝗻𝗴 𝘂𝘃𝗮 𝗵𝗶𝗹𝗮𝗶 𝗺𝘂𝗻'𝗮 𝗵𝘂𝗻𝗴 𝗰𝗵𝗲𝗻𝗴𝗹𝘂𝘁 𝗮𝗵𝗶𝗯𝗼𝘂 𝘂𝘃𝗲. 𝗔𝗵𝗶𝗻 𝗲𝗶𝗵𝗼 𝘀𝗮𝗻𝗴𝗮 𝘁𝗵𝘂𝗻𝗲𝗶𝗷𝗼 𝗹𝗲𝗵 𝘁𝗵𝘂𝘀𝗶𝗺 𝘀𝗶𝗲𝗺𝘁𝗵𝘂 𝘁𝗵𝗶𝗲𝗺 𝗮𝗵𝗶𝗷𝗶𝗲𝗵 𝘂𝘃𝗶𝗻 𝗲𝗶𝗵𝗼 𝗵𝗶 𝘃𝗲𝘁𝘀𝗶𝗲𝘁 𝘂𝗺𝘁𝗮𝗵 𝗶𝗻 𝗶𝗸𝗼𝗶𝗱𝗼𝗵 𝘂𝘃𝗶𝗻 𝗮𝗵𝗶. 𝗜𝗽𝘂 𝗶𝗽𝗮'𝗻 𝘁𝘂𝗮 𝗶𝗰𝗵𝗲𝗻𝗻𝗮𝘂 𝗴𝗮𝗺 𝗮𝗻𝗮 𝗻𝗲𝗶𝗻𝗮𝘂 𝗵𝗶 𝗸𝘂𝗺 𝗷𝗮𝗯𝗶 𝘁𝗮𝗺𝗽𝗶 𝗮𝗻𝗮𝗰𝗵𝗲 𝗮𝗵𝗶𝘁𝗮𝗶. 𝗕𝗿𝗶𝘁𝗶𝘀𝗵 𝗵𝗼𝗻 𝗶𝘁𝗵𝘂𝘀𝗶𝗺 𝘂 𝗮𝗷𝗶𝗵 𝘂𝘃𝗮 𝟭𝟴𝟰𝟬 𝗹𝗮𝗵 𝘃𝗲𝗹 𝗮 𝗠𝗮𝗻𝗶𝗽𝘂𝗿 𝗵𝘂𝗻𝗴𝗹𝘂𝘁 𝗱𝗮𝗻'𝗮 𝗮𝘀𝘂𝘁 𝘂𝗹𝗲𝗵 𝗵𝗶𝗰𝗵𝗲 𝗽𝗵𝗮𝘁 𝘃𝗲𝗹 𝗮 𝗰𝗵𝘂 𝗵𝘂𝗻𝗴 𝗰𝗵𝗲𝗻𝗴𝗹𝘂𝘁 𝗱𝗮𝗻 𝗮 𝗠𝗲𝗶𝗹𝗵𝗲𝗶 𝗹𝗲𝗵 𝗡𝗮𝗴𝗮 𝗵𝗼𝗻 𝗶𝘀𝗲𝗶'𝘂 𝗮𝗵𝗶. 𝗝𝗶𝗵𝘁𝗵𝗼 𝘁𝗵𝘂𝘀𝗶𝗺 𝗶𝗻𝗲𝗶𝗹𝗼𝘂 𝗷𝗶𝗲𝗵 𝘂𝘃𝗶𝗻 𝗶𝘁𝗶𝗵 𝗮𝗽𝗮𝘁 𝗶𝗻𝗮 𝗰𝗵𝗲𝗻 𝘂 𝗵𝗶𝘁𝗮𝗺 𝗶𝗸𝗶𝗵𝗲𝘁 𝗽𝗼𝘂𝘃𝗶𝗻 𝗮𝗵𝗶. 𝗛𝗶𝗰𝗵𝗲 𝗽𝗵𝗮𝘁 𝗺𝗮𝘀𝗮𝗻𝗴 𝗹𝗮𝗻𝗴 𝗽𝗲𝗵 𝗮 𝗶𝗻𝗮 𝗰𝗵𝗲𝗻 𝘂 𝗮𝗵𝗶 𝘁𝗮𝗵 𝗱𝗶𝗻𝗴 𝘁𝗮𝗵𝘀𝗮𝗻 𝗮𝘂𝗺 𝗶𝗻 𝗮𝗵𝗶.
𝗠𝗲𝗶𝗹𝗵𝗲𝗶 𝗹𝗲𝗵 𝗡𝗮𝗴𝗮 𝗵𝗼𝗻 𝗮𝗷𝗼𝘂 𝗮𝘀𝗲𝗶 𝘂𝘃𝗮 𝗴𝗮𝗺𝗽𝗮𝗺𝗺𝗶 𝗻𝗮𝗵𝗶𝘂𝘃𝗲 𝗲𝗶𝘁𝗶𝘂 𝗮𝗵𝗶. 𝗗𝗮𝗻 𝗹𝗲 𝗺𝘂𝗼𝗹 𝗮𝗱𝗲𝗶 𝗱𝗮𝗻 𝘁𝗮𝗵 𝘂𝘃𝗮 𝗺𝗮𝗻𝗰𝗵𝗮𝗵 𝗮 (𝗺𝗮𝗻𝗶𝗽𝘂𝗹𝗮𝘁𝗲) 𝗜𝗻𝗱𝗶𝗮 𝗺𝗶 𝗶𝗵𝗶𝗻𝗮𝘂 𝗹𝗮𝗵 𝗽𝗲𝗵 𝗮 𝗰𝗵𝘂𝗹𝗲𝗵 𝗶𝗴𝗮𝗺 𝘂 𝗷𝗼𝗻𝗴 𝗹𝗮𝗵 𝗱𝗶𝗻𝗴 𝗵𝗶 𝗮𝗹𝘂𝗻𝗴𝘁𝘂𝗽 𝘂 𝗮𝗵𝗶. 𝗧𝘂 𝗱𝗶𝗻𝗺𝘂𝗻 𝗷𝗲𝗻𝗴 𝗶𝗻 𝗷𝗼𝗻𝗴 𝗵𝘂𝗻𝗮𝗺 𝗶𝗻 𝗶𝗴𝗮𝗺 𝘂 𝗹𝗶𝗲𝗻𝗽𝗶𝘁𝗮𝗵 𝗮𝗹𝗮𝘁𝗮𝘂𝘃𝗶𝗻 𝗮𝗵𝗶. 𝗠𝗮𝗻𝗶𝗽𝘂𝗿 𝗮 𝗶𝗴𝗮𝗺 𝗵𝗼'𝘂 𝗵𝗶 𝗸𝗶𝗹𝗮 𝗸𝗵𝗼𝗺 𝗹𝗲𝗵 𝗲𝗶𝗵𝗼 𝗴𝗮𝗺 𝗹𝗶𝗲𝗻𝗽𝗲𝗻 𝗱𝗶𝗻𝗴 𝗮𝗵𝗶. 𝗔𝗵𝗶𝗻 𝗼𝗹 𝗼𝗹 𝗶𝗻 𝗶𝗴𝗮𝗺 𝘂 𝗶𝗹𝗵𝗮𝘀𝗼 𝗷𝗶𝗻𝗴 𝘂𝘃𝗲.
𝗧𝗵𝗮𝗱𝗼𝘂 𝗦𝘁𝘂𝗱𝗲𝗻𝘁 𝗔𝘀𝘀𝗼𝗰𝗶𝗮𝘁𝗶𝗼𝗻 (𝗧𝗦𝗔) 𝗶𝗻 𝗔𝘂𝗴𝘂𝘀𝘁 𝟮𝟬𝟮𝟯 𝗰𝗵𝘂 𝗹𝗮𝗻𝗴𝗻𝗲𝗶𝗻𝗮 𝗹𝗲𝗵 𝘀𝗶𝗵𝗻𝗲𝗶𝗻𝗮 𝘂𝗺𝗹𝗼𝘂𝘃𝗮 𝗮𝗸𝗶𝗯𝗼𝗹'𝗮 𝗹𝗲𝗵 𝗡𝗥𝗖 𝗸𝗮𝗽𝗼𝗺 𝘂𝘃𝗶𝗻 𝗰𝗵𝘂𝗹𝗲𝗵 𝗱𝗼𝘂 𝗷𝗼𝗻𝗴 𝗸𝗮 𝗱𝗼𝘂𝗱𝗮𝗹 𝗽𝗼𝘂𝘃𝗲 𝗮𝗻𝗮 𝘁𝗶𝘂𝘃𝗶𝗻 𝗮𝗵𝗶. 𝗖𝗵𝘂𝗹𝗲𝗵 𝗞𝘂𝗸𝗶 𝗜𝗻𝗽𝗶 𝗠𝗮𝗻𝗶𝗽𝘂𝗿 (𝗞𝗜𝗠) 𝗶𝗻 𝗷𝗼𝗻𝗴 𝗝𝘂𝗹𝘆 𝟮𝟬𝟮𝟰 𝗰𝗵𝘂𝗻 𝗦𝘂𝗽𝗿𝗲𝗺𝗲 𝗖𝗼𝘂𝗿𝘁 𝘃𝗲𝘁𝘀𝘂𝗶𝗻𝗮 𝗻𝘂𝗼𝗶𝘆𝗮 𝗸𝗶𝗯𝗼𝗹 𝗮𝗵𝗶𝗱𝗶𝗻𝗴 𝗹𝗲𝗵 𝗡𝗥𝗖 𝘂𝗺 𝗱𝗶𝗻𝗴 𝗽𝗵𝗮 𝗮𝘀𝗮𝗵𝗻𝗮 𝘁𝗵𝘂𝘀𝘂𝗼 𝗮𝗻𝗮 𝗻𝗲𝗶𝘆𝗶𝗻 𝗮𝗵𝗶. 𝗠𝗮𝗻𝗶𝗽𝘂𝗿 𝗴𝗼𝘃𝗲𝗿𝗻𝗺𝗲𝗻𝘁 𝗷𝗮𝗼𝗹𝗼𝘂𝘃𝗮 𝗸𝗶𝗯𝗼𝗹 𝗮𝗵𝗶𝗹𝗲𝗵 𝗸𝗵𝗼𝗵 𝗸𝗮𝘀𝗮𝗽𝗼𝗶 𝗮𝘁𝗶 𝗮𝗵𝗶.
𝗘𝗶𝗵𝗼 𝗵𝗶𝗻 "𝗞𝗮𝗽𝘂-𝗸𝗮𝗽𝗮 𝗴𝗮𝗺'𝗮 𝘁𝘂𝗼𝗻 𝗮𝗽𝗮𝘁 𝗮𝗻𝗮 𝗰𝗵𝗲𝗻𝗴 𝗸𝗮𝗵𝗶𝘁𝗮𝗶. 𝗖𝘂𝘁-𝗼𝗳𝗳 𝗱𝗮𝘁𝗲 𝗰𝗵𝘂𝟭𝟵𝟱𝟭 𝗺𝗮𝘀𝗮𝗻𝗴 𝗵𝗶𝗷𝗼𝗻𝗴𝗹𝗲𝗵 𝗸𝗮 𝗱𝗲𝘂 𝗽𝗼𝘂𝘃𝗲" 𝗶𝘁𝗶𝘂 𝗮𝗵𝗶. 𝗛𝗶𝗰𝗵𝘂 𝗮𝗵𝗶𝗻𝗮𝗶. 𝗔𝗵𝗶𝗻 𝘁𝗵𝗶𝗹 𝘂𝗺𝗱𝗮𝗻 𝗵𝗼 𝗶𝘃𝗲𝘁 𝗹𝗲𝗵 𝗲𝗶𝗵𝗼 𝗴𝗼𝘁𝗻𝗮 𝗱𝗶𝗻𝗴𝗮 𝘁𝗼𝗵𝗴𝘂𝗼𝗻 𝗸𝗶𝗰𝗵𝗲𝗵 𝘀𝗲𝗹 𝗸𝗵𝗮𝘁 𝗮𝗵𝗶. 𝗛𝗶𝗷𝗶𝗲𝗵 𝗮 𝗰𝗵𝘂 𝗰𝗼𝗻𝗱𝗶𝘁𝗶𝗼𝗻 𝘂𝗺𝗹𝗼𝘂𝘃𝗮 𝗱𝗼𝘂 𝗱𝗮𝗹 𝗱𝗶𝗻𝗴 𝗮𝗵𝗶 𝗷𝗲𝗻𝗴 𝗲. 𝗔𝗷𝗶𝗲𝗵 𝗰𝗵𝘂 𝗦𝘂𝗽𝗿𝗲𝗺𝗲 𝗖𝗼𝘂𝗿𝘁 𝘃𝗲𝘁𝘀𝘂𝗶𝗻𝗮 𝗵𝗶𝗷𝗲𝗻𝗴 𝗷𝗼𝗻𝗴 𝗹𝗲𝗵 𝗮𝗺𝘂𝗻'𝗮 𝗻𝗮 𝘁𝗼𝗻𝗴 𝗱𝗶𝗻𝗴 𝗰𝗵𝘂 𝗦𝘁𝗮𝘁𝗲 𝗴𝗼𝘃𝗲𝗿𝗻𝗺𝗲𝗻𝘁 𝗲𝗺𝗽𝗹𝗼𝘆𝗲𝗲 𝗵𝗼 𝗵𝘂𝗻𝗴 𝗵𝗶𝘁𝗵𝗼𝘂 𝘁𝗵𝗼𝘂 𝗱𝗶𝗻𝗴 𝗮𝗵𝗶𝘂𝘃𝗶𝗻, 𝗮𝗹𝘂𝗻𝗴𝘁𝗵𝗶𝗺 𝘂 𝗶𝗵𝗲𝘁𝘀𝗮𝘂 𝗮𝗵𝗶. 𝗟𝗮𝗻𝗴𝗻𝗲𝗶𝗻𝗮 𝗹𝗲𝗵 𝘀𝗶𝗵𝗻𝗲𝗶𝗻𝗮 𝗱𝗶𝗺𝘀𝗲𝘁'𝗮 𝗻𝗮 𝗮𝗵𝗶𝗻 𝘁𝗼𝗵 𝗱𝗶𝘂 𝗮𝗵𝗶. 𝗠𝗲𝗶𝗹𝗵𝗲𝗶 𝗹𝗲𝗵 𝗡𝗮𝗴𝗮 𝗵𝗼 𝗰𝗵𝘂 𝗹𝗲𝗸𝗵𝗮 (𝗿𝗲𝗰𝗼𝗿𝗱/𝗱𝗼𝗰𝘂𝗺𝗲𝗻𝘁) 𝗻𝗲𝗶𝗹𝗼𝘂 𝗵𝗼 𝗷𝗼𝗻𝗴 𝗰𝗵𝘂 𝗮𝘀𝗶𝗲𝗺𝘁𝗵𝘂 𝘂𝘃𝗮 𝗡𝗥𝗖 𝗮 𝗮𝗷𝗶𝗵𝗹𝘂𝘁 𝗱𝗶𝘂 𝗮𝗵𝗶. 𝗘𝗶𝗵𝗼 𝗸𝗼𝗺 𝗮 𝗮𝗵𝘂𝗻𝗴 𝗽𝗵𝗮𝘁 𝘂𝗹𝗲𝗵 𝗜𝗻𝗱𝗶𝗮 𝗺𝗶 𝗶𝗵𝗶𝗹𝗼𝘂𝗻𝗮 𝗱𝗶𝘂 𝗮𝗵𝗼𝗹 𝗱𝗶𝘂 𝗮𝗵𝗶. 𝗟𝗲𝗸𝗵𝗮 𝗸𝗶𝗺𝘀𝗲𝗹 𝗶𝗻 𝗻𝗲𝗶 𝗷𝗼𝗻𝗴 𝗹𝗲𝘂 𝗵𝗲𝗻 𝗮𝗵𝗶𝗺𝗼𝗻𝗮 𝗱𝗶𝗻𝗴 𝗮𝗵𝗼𝗹 𝗱𝗶𝘂 𝗶𝘀𝘂𝗵𝗯𝗼𝗶 𝗱𝗶𝘂 𝗮𝗵𝗶.
𝗖𝗵𝘂𝗯𝗮𝗻 𝗹𝗲𝗵 𝗲𝗶𝗵𝗼𝗵𝗶 𝗚𝗼𝘃𝗲𝗿𝗻𝗺𝗲𝗻𝘁 𝘂𝗺 𝗹𝗮𝗺 𝗷𝗼𝗻𝗴 𝗵𝗲𝗽𝗵𝗮𝗹𝗼𝘂 𝗸𝗶𝘁𝗮𝗺 𝗮𝗵𝗶. 𝗜-𝗸𝗵𝗮𝗺𝗰𝗵𝗮 𝗯𝗲𝗽 𝘂𝘃𝗮 𝗷𝗮𝗹𝗲𝗻 𝘁𝗮𝗵-𝗮 𝘁𝗵𝗶𝗻𝗴𝗹𝗵𝗮𝗮𝗻𝗴 𝗴𝗮𝗺'𝗮 𝗸𝗵𝗼𝘀𝗮 𝗶𝗵𝗶𝘂𝘃𝗶𝗻 𝗮𝗵𝗶. 𝗖𝗲𝗻𝘀𝘂𝘀 𝗵𝗼'𝗮 𝗺𝗶𝗻 𝗷𝗶𝗵𝗹𝘂𝘁 𝗱𝗶𝗻𝗴 𝗷𝗼𝗻𝗴 𝘁𝗵𝘂𝗽𝗶'𝗮 𝗴𝗲𝗹𝗹𝗼𝘂𝘁𝗲 𝗶𝗵𝗶𝗷𝗶𝗲𝗵 𝘂𝘃𝗶𝗻 𝗹𝗮𝗺𝗸𝗮𝗶 𝗵𝗼𝗻 𝗴𝗲𝗹𝘁𝗵𝘂𝗵 𝗷𝗲𝗽 𝗮𝗻𝗴𝗮𝗶𝘆𝗲. 𝗜𝗽𝘂 𝗶𝗽𝗮'𝗻 𝗸𝘂𝗺 𝗷𝗮𝗯𝗶 𝘁𝗮𝗺𝗽𝗶 𝗮𝗻𝗮 𝘁𝗼𝘂𝗽𝗵𝗮 𝗴𝗮𝗺'𝗮 𝗰𝗵𝗲𝗻𝗴 𝗵𝗶𝗷𝗼𝗻𝗴 𝗹𝗲𝘂𝗵𝗲𝗻 𝗹𝗲𝗸𝗵𝗮 𝗶𝗻𝗲𝗶𝗹𝗼𝘂 𝘂𝗹𝗲𝗵 𝘀𝘂𝗵𝗻𝗮 𝗱𝗶𝗻𝗴 𝗵𝗲𝗹𝗼𝘂𝘃𝗮 𝗶𝗵𝗶𝗻 𝗸𝗼𝗶 𝗱𝗶𝘂 𝗮𝗵𝗶. 𝗛𝗶𝗷𝗶𝗲𝗵 𝗰𝗵𝘂𝗻 𝗮𝗵𝗶𝘁𝗵𝗲𝗶 𝗹𝗲𝗵 𝗦𝗰𝗵𝗼𝗹𝗮𝗿/𝗟𝗮𝘄𝘆𝗲𝗿 𝗵𝗼 𝗷𝗮𝗼𝗻𝗮'𝗻 𝗖𝗼𝗺𝗺𝗶𝘁𝘁𝗲𝗲 𝗸𝗶𝘀𝗶𝗲𝗺 𝗵𝗲𝗻𝗹𝗮𝗻𝗴 𝗡𝗥𝗖 𝘁𝗵𝘂 𝗹𝗲𝗵 𝗲𝗶𝗵𝗼 𝗱𝗶𝗻𝗺𝘂𝗻 𝗸𝗶𝗰𝗵𝗲𝗵𝘁𝗮𝗵 𝗶𝗻 𝗵𝗶𝗻 𝗸𝗵𝘂𝗼𝗹𝗴𝗶𝗹 𝘂 𝗵𝗲𝗻𝗹𝗮𝗻𝗴 𝗵𝗶𝗰𝗵𝗲 𝗱𝘂𝗻𝗴𝗷𝘂𝗶 𝗰𝗵𝘂𝗻 𝗱𝗶𝗻𝗺𝘂𝗻/𝗽𝗮𝗻𝗺𝘂𝗻 𝗸𝗶𝗹𝗮 𝗹𝗲𝗵 𝗽𝗵𝗮 𝗱𝗶𝗻𝗴 𝗮𝗵𝗶.
~ Zalengam News
.JPG)
No comments:
Post a Comment
Comments not related to the topic will be removed immediately.