LUIGUAM LUIDUNG KEP SIANGTHOU DING KISINSAK

ZSF Saina In Luiguam Leh Luidung Kep Siangthou Dingdan Kisinsak

Headlines Today | 11-07-2024

Zomi Students Federation (ZSF) Ghq saina in tuni sun dak 12 in Rayburn College, Gangpimual ah i gamsung a luiguam leh luidung omte kepsiang thou dingdan leh humbit dingdan tawh kisai in awareness program poimawhtak om hi. Hiai hunzatna bel ZSF Ghq in Rural Women Upliftment Society (RWUS) nungthuapna tawh a sai uh hi a, thupi ding in *Awareness on cleanliness & waste management and River Protection" chih zang uhi.

Hunzatna Khenthang, Asst Secy Education Dept, ZSF Ghq in makaih a, Th Thonglunthang Simte, Vice President (external) ZSF Ghq in keynote address gen in, Resource person in JC Zolientluong, Ph.D Scholar, School of Environmental Sciences JNU pang hi. Hunzat sung in group discussion leng nei uh a, huntawp ah Samuel Taithul, General Secy ZSF Ghq in kipahthu gen in hunzatna zou ua, hunzat sung in ZSF Ghq makaite leh Rayburn college a kai student-te kihel uhi.

Resource person a pang JC Zolientluong in a gendan in, Environment pollution kichi tampi om in, huaite lakah Water Pollution leng chikhat ahi chi a, Lamka khawpi sung a lui tampi luang mahleh siangthouna lam ah i deihlouh uh botlawh tamtak paihna mun dia zat ahihziak un, Biodiversity tanpha kisia in, Eco System om theihna ding a paidan khek ahihkei leh mangthang petmah ding dinmun ah om uh chi hi. Luiguam khatpeuh a ding in piauneel pen poimawh mahmah a, lui a tuiluangte Piauneel in hoihtak a luangsak ahihman in, tulel dinmun tawh kibang a Lanva lui a Piauneel lak i khawlsan keileh tui kholtu om nawnlou ding a, leinuai a tui omte hiptu ding omlou in, tui filter tu ding leng omlou ding a, tui hong luangte leng leikawm ah tumsuk in hong keu deuhdeuh lai ding a, luipang hong chim sia in, luikiang a leihoih chihte himhim om nawnlou ding chi hi.

Luiguam sung ah suang leh piauneel lakbei ahih phial ziak in River Biodiversity om thei nawnlou ding dinmun ah omlel hi'n gen a kintak a panlak thak ahihkei leh Lamka khawpi sung a luiguam omte mangthang thei petmah ding dinmun ah omlel chi hi. I gamsung a luiguam omte ah gan sisa ahihkei leh dailenbuk lawng zawllut chihte i thansak ziak in, luitui omte mihing ading in dawn ngam huailou a, huai luitui dawnkha huangvulh gantate tungtawn in leng eite lakah sungkhawh leh natna tuamtuam tampi hong punbeh ahihdan gen hi.

Huchibang ahihman in, luidung pen gou bang a koihngai ahihdan gen a, Tuitha lui leh luidung tuamtuam i gam a omte i kepbit keileh campaign bawlbawl lengle a phattuamna omlou ding ahihman in, a neitu tuam omlou a, eite a hivek ahihman in, kepbit ding ahi chi hi.

©𝐙𝐨𝐠𝐚𝐦 𝐈𝐧𝐒𝐢𝐠𝐡𝐭

Share: