LETTER to CEO, ADC & DC, Lamka District

Mipi deihna bang a akisai pih te kiang a dotna!

LETTER TO 

CHIEF EXECUTIVE OFFICER, ADC 

& DEPUTY COMMISSIONER, DISTRICT LAMKA

Lamka, the 22nd July, 2024

Amasa pen in chibai aw, i tenna Lamka khopi sung ah tu nai zek in mipi zuih ding policy tuamtuam tampi hong om thak a, kipah huai chih di hia, kipah huai lou, thil etthak ding tampi om ding a ka na ngaihsutte tamlou ka hon gen ding.

Indian Constitution dan dungzui in Manipur singtangmite' gamte kum 1972 apat in Hill District 6 teng Autonomous District Council nuai a kivai puak in, mipi elected  Member of District Council (MDC), ADC etkaina nuai ah i gam leh leitang teng, i Town leh Bazaar-te ADC etkaina nuai ah om hi. Manipur phaizang district dangte bel Deputy Commissioner (DC) etkaina nuai ah om nawn hi.

Ahi a, kum bang tan hiam paita apat ADC member election ahong om nawnlouh nung in  policy thakthak, policy tuamtuam khotang a zat ding hong ki implement zungzung mai a, hiaite kua ORDER om a hong ki implement hi hiam?

Hiai bang policy-te public elected omlouh lai a hih ding kul om ahih leh, apoimohna kichiantak a gen a,  implementing  agency ADC in a stakes holder tuamtuam CSO leh public leader-te toh public consultation abawl a, mipi lemsakna om leh policy abawl ding hilou ding hiam?  Banah, District a MLA-te leh MP theihpihna tel a thil bawl ding hilou adiam?

Public leaders/public lemsakpihna om masalou a, public servant CEO's ADC/DC's-ten mipi  policy ahon bawl pen uh unconstitutional hi in ka mu a, mipite bangmah a muhlouhna hi'n ka mu a, poi ka sa petmah hi.

Policy etthak tuak te:

1.  Waste collection Policy:  Nin buak man kha khat a 4 vei lel kila a, a fee dan a Rs. 200/- kila sekpen, atawm-atam pen michih adi'n a fair hia, chih etthak hoih ka sa hi.

2.  Fire extinguisher policy: Fire extinguisher buk khat  Rs. 3000/- val man ding a   dawr teng a khat chiat force a  ADC nuai a implementing  agency-te'n aleisak pen uh dik zou di hiam? Fire training lah pe masa lou, banah, adawr-te a ding contents insurance lak theihna ding kong lah hon sak a omloupi in fire policy khauh tak implement pen dik zou di adiam?

3.  Dawr License fee leh Renewal fee:  Bazaar a sumbuk bawlte dawr license nikum zek a Rs. 600/- kila pen tua Rs. 6300/- (1050% taka khang guih), Solid waste nin paihman nikum a Rs. 200/- kilasek pen tua Rs. 800/-(400% a khang guih), hichi lawmlawm a akhanna ziak teltak a mipi hon hilh ding ka hon ngen hi. (A poimoh leh RTI file ding a mansa ka hi).

Hiai bang fee-te khansak ding pen kua teng theihpihna leh public leader-te lemsak a policy hong ki bawl hiam? A order koi a om hiam? Public theih di'n hon luikhia un? 

Banah tarik ni 6/07/2024 ni a local newspaper a hong suak Tedim Road Tuibuang Bazaar leh Police Station apat a Lailam Lei tan parking fee hong ki la tading chih leng MDC lah om lou a kua policy bawl hi hiam or a ORDER koi a om? 

Hi chi bang a ADC lampi dung a parking fee alak ding leh gari amang a om leh amawh ka paw ding ua, a sum/van mah in ka leh nading uh, chih ADC ORDER public ah hon suahkhe ding in leng ka hon ngen nawn hi. 

Public a policy implement ding a om leh a ORDER toh hon suah chetchet ta ding leh kholai a thakhat thu a thupuan nei guih lou ding in ka hon ngen hi.

Banah, ama a dawr licence fee-te leh New Bazaar area a parking fee leh toilet zatman te koi a bang chi kizat hiam, chih leng teltak a public ah hon taklang ding in ka hon ngen hi.

Hiai bang a public a sum dawnna- trade license leh solid waste fee ki donna FY 2020-2023 kikal a sum kizatna diktak akim sipsip a public domain a hon theisak ding leh maban ah local news paper-te a kha 6 dan bek a mipi theih dia n'on tak lat uh ka hon ngen hi.

Hiai a tung a kigen policy-te teng akisaipih Chief Executive Officer (CEO, ADCC) leh Deputy Commissioner (DC) i chihte pen policy maker hilou in policy implement tu na hih na uah, hiai a dotnate kichiang taka order number toh ni 10 sung a public domain a hon  dawng ding in ka hon  zasak hi.

Public servants are not Policy makers. 

Mipi te deih na bang in,

Sd/-

C.T. Lian Guite, Ex MDC

Convenor, LATSEA

Share: