Report: KWS SHILLONG FATHER'S DAY

✍️ Thanglam Manlun,

independent freelance writer

Nikho lah'a nikho hoipen Pate nikho, muthei ding leh mangthei dinga damna eipe hatchung nung Pathen thangvahna kapen ahi. Utter Pradesh gam nichang-sat in mihem somget val hinkho aval lhum nunga, kei michonse Pathen in damna eipeh'a KWS Shillonga Pate nikho mangtheiya eikoi jalla kakipana ho achom lam'in kahin tahlang nom'in ahi.

KWS SHILLONG NUNGAH GOLLHANG HO LEMNA : Jan muthim thuhtah noiya choldona a kon jing thouvin, Pate nikho jing niso emsel chu ahung sohtan ahi. Keijong kakigon Pate nikho mangdin kachetan ahi. Hou-inn mun kaga lhung'in ahile, hou-inn kotbul maiya pahcha namkim kijem banga Nungah Golhang tampi kigol hon Happy Father's day tia wish eihin bol'utoh kilhon'in father's day batch eibeh peh'u chun, eikipasah keu hilouvin Pa khat hina chaten jabolna eipeh'u chu kaki thang-atpi lheh'in ahi. Kakipa behseh jeh chun ka purse kaladoh'in ijat kapehdiu ham boi? Katin ahileh amahon hepa aman umdinga kabollu ahipoi, kipana jalla kabollu ahi, atiuvin ahileh keijong kipah tah'in hou-inn kaluttan ahi.

PRAISE AND WORSHIP TEAM : Hou-inn sung kasung lhan katoutan ahi. Pulpit langa ding Chaplin Pastor Seiminhao Haokip assistant Pastor KWS Shillong leh aloihon praise and worship alamkaiyun ahi. Lhagaova halna pum leh mitsing pum'a laa kisahon, lou-bang chulsa kalung kalung thim asuh haltoh kilhon'in, kipana thah kaneidoh kit'in ahi. Kei banga midang'in jong kipana thah anei ding kaging chan ahi.

NUTE MOPOHNA NOIY A PROGRAM CHEDAN : Praise and worship team hon phat lhandohna aneijou'uvin, minu khat ading doh'in pulpit lam jon'in achen ahi. Amachu Nu Lhingnu Haokip KWS Shillong nute secy. ahi. Nu Lhingnu in pate wish aboltoh kilhon'in hitin aseiyin ahi. Tunin mi tampin kipah le thanom'in Pate nikho imang'un ahi. Hinla tunikhon wish bolding Pa neitalou tampi umding ahin, amaho lah'a chun keijong khat kahi tia aseitoh kilhon in, tunin wish bolding Pa neitalou Meithai leh chaga hodin taona manpeh'ute tia ahoulimna chun mitin lungthim asunem jeng'in ahi. Ama jouvin Nu Kim Khongsai Chairperson KWS Shillong'in jong pate wish aboltoh kilhon'in Minu te leh chaten pate kakineppi na'u leh kamonpi na'u asange tin thuchih tampi aseiyin ahi. Chukal vallin nuten abol hoiju khat chu ahile conduct beiya program atollhah'u chu, akhang toh kitoh'a machalna khat ahitoh kilhon'in avethoi lheh'in ahi. Hitobanga hingong doh nute pachatna sangpen kahinpen ahi.

MESSAGE FROM PASTOR

Sei Min Thang CHONGLOI : Phat ahung chal'in Pate nikho tilkhouna phat ahung lhung tan ahi. Pastor Seiminthang Chongloi Pastor KWS Shillong ahung dingdoh tan ahi. Bible text. Gen. 12 : 2 "Phatthei konna bom nahi ding ahi."

 Pastor Seiminthang in thupi a alut masang'in Pate nikho thu'ah hitin aseiyin ahi. Tu masang phat phabep sung chun Pate nikho ahung lhung teng Pate kisemphan, kisemphan tin ina sei ji'uvin, hichu bolkhel ahi. Ajeh chu tunikho hi pate hilna leh phona ding nikho ahipon, pate pachatna leh choi-atna nikho'a manding joh ahi, ati. Chujouvin hitin aseiyin ahi. Pathen'in mipa tehi phatthei konna bom hidinga agon ahi. Phathei konna mipa hina dinga Pathen'in alim leh amel pu'a mipa asem ahi. 

PA kitihi Pathen lim leh mel putna ahijeh'in, nute leh chaten ajabol dinga lom ahi. Ajeh chu Houbung luchang Christa ahi banga, numei luchang chu pate ahi. Inn-sung, Houbung leh namsunga phatthei konna mipa khat hina ding hi overnight tichu jankhatkah a soh ding ahipon dalhah ding thil tampi um ahi. 

Eg. Pathen'in Abraham akou chun adalhah ding thil thum apen ahi. Hiho chu ahileh, 1) nagam leiset dalhan, 2) naphung nachang dalhan, 3) chuleh teh nunga nahin nachapa changkhat chu maicham thilto in toh'in ati. Aw.... iti hah'ah hitam? koiham ajotna ding hechenlouva hichengse dalha'a kalsong ding chu aumdem? 

Abraham'in vang tahsanna bulhing set'in, Pathen'in eipeh ahin, ama thu thu ahi tin, hichengse chu dalhan akalsong jeng'in ahileh chitin namtin leh phungtin'a din phatthei konna bom leh mipa tahbeh in asemdoh tan ahi. Tuni'a paten jong phatthei konna mipa ihina diuva dalhah ding thil ineijun ahi. Hiche dalhah dinga kisei thilho chu idalhah lou laiseuva phatthei konna mipa ihi theilou dingu ahi. 

Pathen'in gam leh leiset chuleh neile gou adeimong ahidem? ahipoi, Pathen'in adeipen chu lungthim pumpi leh tahsa pumpi'a ama'a kipehlut ding bou adeipen ahi. Hichu phatthei konna mipa hina dinga angaichatpen chu ahi. Chutima chun tuni nikhon nute leh chaten Pate nikho ahitoh kilhon'a wish neibol hou jong aphanai, chuleh kipa thilpeh neipeh houjong aphan kipa aum'in ahi. Ahin, kakipanau chamkimna ding chu leiset thilpeh ho ahipon, nalungthim pumpi neipeh'uva, thununna leh thungaina a nahung kipehlut diu chu kakipanau chamkim chu hiding ahi.

 

 Pastor Seiminthang Chongloi yin asei thupi hin kalungthim atongkhan, achen achaiyin kasei dohjoupon ahi. Hijeh chun kalekhjih simjousen Pastor Seiminthang thu-sei YouTube a ina ngai cheh diuvin kahin tem'in ahi.

Achaina a kaseinom chu, kipana jalla kagel doh kham kham kahin jih ahin, alhinglel leh bolkhel aumleh Pakai Chrirsta min'a nei ngaidam diuvin kahung taovin ahi.

Share: