PATE NI (Father’s Day) ✍️ Pastor M Thangboi Zou

On 3rd Sunday of June

Thumapui: Leitung a PATE NI ahing kiman nasan khu nupi khat amin John Bruce Dudd kichinu zieh ahi, chin leitung in a chiemteh laiin, ana niel zong ana um zel hi. John Bruce Dudd kichinu patkhiat hilou midang hi, achi chipol zong aum zieh, koi pen adih adiei? chi tamna isut khom ding uhi. Amasan ngaihdan tuomtuomte i en masa dia, tuazou chia mipite (atamzawte) pompen in i zou ding hi.

Ngaidan khatna: 

Tam PATE NI kichi khangthu sutte sut khiet danin, apesa kum 1000 in ana kilom zouta hi achi uhi. Amaute mukhiat dan/sui khiatdan in apeisa kum 4000 laivel in Babylon gam a um naupang Mr Elmesu in anazat pan ahita chi uhi. Agendan uh ahi leh Mr Elmesu in Tungman (clay) in card (Clay card) khat asiem a, tuana "Pate Ni Thu (message) tamlou ana giel in, apienna pa anathot hi" chin agen uhi, Tua tungman (clay) abolpen a athugel ahileh "Apienna Pa damtheina ding leh damsot nading a deisahna thu"_agel hi, tuami zieh Mr Elmesu pen "PATE NI" pan khetu in agen uhi.

Ngaidan nina:

Laisiem (Scholar) khenkhat mukhiet kiadan ahileh America Washington aum Pi Sonaro Louise Smarts Dudd kichinu hing pat khiat dan in a suikhie uhi. Amaute muhdan ahi leh Pi Sonaro Louise Smarts Dudd kum 27 apha in "Mother of the Father's Day Festival" chia min vo (Title) in ana um hi. Tam min phatna ahing muna san ahi leh, apeisa kum 1909 in "Nute ni" kiman na a, thugen Pa thugetna pan ana gelkhiat ahi. Pi Sonoro Louise khu kum 16 ahi lai in a pienna nu'n ana mualliam san ta a, a Upa (brother) Mr. William Jackson Smart Dudd in ama unau mi6te hoitah in ana enkawl hi, tua hunlai in Ms Sanaro Louise lunggel a pa itna athupidan ahing gieldoh a, ama leh ama ki dong in "Pata Ni Pawi" kizang theilou ding ama? chin lunggel ahing nei hi. Tuchin a lunggel muolsuana ding in theitop suah in pan ahing la a "PATE NI" zatding ahi chin, Tangkou (campaign) ahing pan tahi, tam bang a pan ahing la lai in khen khat ten anuisan ua, khenkhat ten chiemnui (Joke) nan ala uhi, Hinanle zong leh Pi Sonaro Louise pen lungkia lou in pan ahing la a, a lungtup muolsuah nadin Spoken Minitrial Association leh Local Young Men's Christian Association (LYMA) te kithuapina toh Spokane khopi (Town) ah akhatvei nadin "PATE NI" (1st anniversaries of FATHER Day) thupitah leh loupitah in ahing zang panta uhi, chin asuikhie uhi.

Ngaidan thumna:

Apeisa kum 1909 May ha a Biehin kikhopna khat a "NUTE NI" kizatna pansa "PATE NI" zahding ahi dan Pi John Bruce Dudd kichinu'n ahing thei khie hi. Tam "NUTE NI" guolnop (Mother's Day Celebration) Hun a Pastor pan nute manphat na thu ahing gen lai in Pi John Bruce Dudd kichinun zong, tuana patsa a pa itna, manpha ahi dan hing gel doh hi, amau unau mi 6 a pha ua, aneulai in a nun ana sih san tahi, unau mi 6 teng apan zi dang nei somlou in, homthoh tah in atate ana kem a, piching ahingsuo dante manpha asah mama hi. Nu bei a unau mi 6 Pa khatin Khristian innsung nuam hidia apanla dante thupi asa deudeu hi. Thugen pa thugen top in mipite ja dingin a Pa panla dante ahing genkhia a, "NUTE NI" imang bang un "Pate ni" zong mangthei u'lei ka nuam hi, chin mipite kunga agen hi. Tamnia (Nute Ni) a i nute uh thupi theitop leh jahna sangpen ipieh bangun, Pate Ni i man chiengun tuabang in bawlvai achikia hi. Kikhop tawp in Pi John Bruce Dudd zong "Spokane Minitrial Association a Presidentpa va kimupi in kum teng a nute ni imang bang un alem thei ding leh Pate ni zong zang tavai"_chin ava gen hi. Tam a ngaidan pen Mission board ten lem hingsa pi'n PATE NI amasa pen dingin "Spokane Minitrial Association" te lamkai na nuai ah, amau uh biehinn a ahing pan ta uhi, tuachin pa zousie asangpen a jahna pieh in thupita in anamang in apankhia tah uhi. Tuani khu 3rd Sunday June ahi. Aziehpen Pi John Bruce Dudd pa pienni (Birth Day) ahi. Tam bang a Spokane biehinn ten Pate Ni zat thu uh Governor pan aza tah in, avaihomna sung (State) ah 3rd Sunday of June nipen PATE NI a Nit (observed) din ahi chin "National Holiday" in aphuang khie ngal hi. US gamsung a PATE Ni Spokane Biehinn akizang chi thu ahing kithang suata a, thamlou in state khen khat ah National Holiday chie phuan aum thu, mihoi leh minthang ana kigen Mr. William Jenning Bryant kichi pan US kivaihomna (Senate) a General Lamkaipa ahia, aman vaihawmna sung a "National Holiday" a nit ding (Observed) ahichin ahing pua lut hi. Khuchin kum 1924 in US gamsung a PATE NI, 3rd Sunday of June khu "National Holiday" din phuan khiat in hing um tahi. US President Calvin Coolidge kichi pan zong zatdin aphuangkhe kia hi, Presidentpu'n zong, tam Ni chiengin Pate khu athupi theitop leh asangpen a jahna (Honour) pieding ahi, chin agen hi. Tualeh 1916 kum in US President Woodrow Wilson in zong 3rd Sunday of June nipen PATE NI a zatdin aphuang khe kia a, tuazou in 1972 in US President Richard Nixon in zong aphuangkhe kia tahi. Tamna Ngaidan thumna khu mi tampi te pom leh gintatpen ahi hi. Tam nia kipat in Leitung ah tam PATE NI ahing kizang a, tami Ni chiengin "Innsung a Pa kichi zousie zatatna, patawina leh jahna sang pen Pavui a awash uhi".

Akhupsitna: Tuni'n leitung in PATE NI khu 3rd Sunday of June in akizang zingta hi. Tam Pate ni apan tukhanga Pa zousie khu a kang chouna (challenge) ahileh John R. Rice kichipa kamteng ahi, tua khu "Ka tate piengtha lou a zi/Pasal nei aka hakhiat sangin piengtha u'hen len shi uleh ka dei sazaw hi" achi khu ahi. Tualeh Gary Chapman in, "Tate etkawlna ah kangtalai lim 2 toh gente hi, tuami ahileh thuhilna leh zilsahna ahi a, atai hoi theina dingin kangtalai thau khu itna ahi. Bang chi bang zilsahna nei zong lei, na tate'n na itna atheichet lou uleh aphatuom lou asuo ding hi" achi pen ngaitua tham ching ka sah mama hi. 

Tukum 2024 a PATE NI izatna ua kipat in Pa zousie in _"innsung siemphat na Zi leh Tate Itna, hepina leh Pasian thutah toh amaute ipui huoina Kum hisah chiet ding leh, amin maimai a Pa hilou a, Hagaulam leh Tahsalam a Pa tahtah hithei chiet ngei din"_ PA (Fathers) kichi zousie hing guolzawl chiet tahen, chi ka thumna ahi hi.

Bible Sim dingte:

i) Ama nua ah atate ahampha uhi (Prov. 20: 7).

ii) Ken nangma pilna lampi ka hing hil a, lampi dih ah ka hingpui hi (Prov. 4: 11).

iii) Nou pate aw, na tate uh, sulungthah sih unlen, Mangpa thununna leh thuhilna ah entup zaw un (Eph. 6: 4).

iv) Pasal khu zi lutang ahi (Eph. 5: 23).

v) Pasalte aw, na zite uh it unlen, atung uah gihlou sih un (Kol. 3:19).

PATE'N I LUNGSIM UA IKOI CHIET DING UA ka deite ahileh:

i) Pasian thutah toh ka Innsung etkawl ding khu ka mopuoh ahi.

ii) Ka taten Pasian athei ua agintat theina ding ua alampi komutu ding khu Kei kahi.

iii) Innkuon a Vangam kai theina dia amasapen a kei a PA un Pasian ka thei masat angai hi.

iv) Hotel dunga Politic thu gen a ka hun ka zat sangin, Innsung mite toh innsung khantou nadin/ pichina dia ka hun ka pia ngai ahizaw hi, chingam chietlei, Innsung nuom kihi lel ding ahi hi.

xxx

Share: