NAUPANGTE NIPI SANG MANPHAT DAN HIL IN

_✍🏻 Pastor M. Thangboi Zou              

Area Pastor, Lamka East Division, MELC

Thumapui: Issue masa in, hattuom khanna thuguh khu Inn veh thumsahna ahi chin ina kikum ta ua, tunin zong, Hattuom khanna thuguh khu “Nauapang Nipi Sang manphatdan hilin” tamlou kikum khawm kia vai, chin ka hing kisah hi.

1994 kum laiin Prince Philip lamkainatoh England gam ah Thongkia (Jailer) te bang chi suh bei ding, chin kikupna anei lai un, Thonginn a Khantanhoi thugen (Prison Fellowship) ana phutkhe pa Church Calson (1931-2012) in, “Naupang zousie Nipi Sang ah pui lei, sawtlou in thonginn te ahing hawm lelding hi” chi’n agen hi.

Scotland gam a Nipi Sangsye loi khatin, Taga naupang khat nipi sang a kai dingin 3vei akungah vapei in ava chiel ua, a puonsil ding leh apoimaw bangkim apieh uhi. Tua Naupang ang pichin tah chiengin China ham a LLaisiengthou ahing letkhie hi, tuapa khu koi dang hilou in, Robert Morrison (1782-1834) ahi hi. Tami in Naupang Nipi Sang manphatdan leh a ga (result) ahidan ahing muchien sah mama hi.

Mi thupi Nipi Sang ngai khote: 

i) US President a 9verina an aching William Henry Harrison (1773-1841) in, US President ahi masang in, Ohio bank gei a Hattuom neu khat ah Nipi Sangsye nna ana sem ngai hi.

ii) Daniel Webster (1782-1`852) in, “Nipi Sang khu umdan hoi kihilna  lah a ahoipen sang (skul) ahi” achi hi.

iii)  US gam Philadelphia a  mihausa pen akigen John Wanarmaker (1838-1922) zong Washington mun ah Naupang Pini Sangsye nna ana sem ngai hi.

iv) US mipil pa George Washington Carver (1864-1943) in, “Pasian gingta sengseng ahiman in, ashitan dongin Hunlang biehinn ah Nipi Sangsye nna asem hi” akichi hi.

v) Jimmy Carter (1924- ) in, atangval akipat Nipi Sangsye nna asem in, US President ahi in zong Maranatha Baptist Church Nipi Sangsye nna asem den hi. Aman agen na ah, “Tam ka sepna in ka Ginna detsah mama hi” achi hi.

Hunlang a Nipi Sangsye Edmund Kimball in Kengkoh juo naupang khat itbawl in, Pasian thu toh hoitah nou anapui hi. A khonung in tua naupang pa khu US gam a Pasdian mizat minthang leh US gam a Halthana (revival) tuntu in ahing pang hi. Tuapa koi dang hilou in, *Evan. minthang D.L.  Moody *(1873-1899) ahi hi.

Nipi Sang zatkhel azuahuoi dan:

China gam a Nipi Sangsye nasem Mikang pawl khatin, asang naupang uh Thumna leh lasa a kilawp mama China naupang khat, Chi-le-Nam vai a asuh hase kha ua, tua naupangpa ang khanglet in Khristiante leh Sangsye tampite thatpa ang suo hi, tuapa khu koi dang hilou in, Mao Tse Tung (1893-1976) ahi hi.

Akhupsitna: Naupang Nipi Sangsye nasep pen silneu in ngaituo vawt sin, mailam hun a milawching leh mithupi (good and bad) siemkhetu na hi hi. Nasep hoi leh Pasian mizat mithupi tampi nasiemkhe dinga, nanleh thase pumpum a nasep a, nasepna na ngaisah lou leh Setan vanzat mi thupi siemkhe ding na hi man in, Tunia Naupang Nipi Sangsye te aw, nasepna uah hing hapan un, nasep khu silneu ahivawt sih a,  hinna leh shina kikal a ding naupang tampi te puikhetu a pang nahilamhing kithei unlen, Pasian toh zawhkhawm in hing hapan chiet dingin, simtu zousie Mangpa Pasian in Naupang Nipi Sang manphatdan theisiem chietdin, hing guolzawl chiet tahen, chi ka thumna ahi hi.

Share: