Na Tate Ni Hanthawn Thugenna ✍️ Pastor Thangdoulal Suantak

BUKIMLOUHNA leitung a teeng leh khawsa leitung mihingte i hihziak un theihna, itna, khawtuahna, khentuam neihlouhna leh ki-huaituahna ah a bukim i om diing uh ka gingta kei hi. Zil diing leh theih diing a poimawh tampi zong a omkha diing a, hitalezong tuni’n Tate tawh kisai thute, hih a nuai a bang in i ngaihsut khawm diing uh hi.

1. Nu Gilsung a Om Nau-ngek Theihna

Nu gilsung a om nau-ngek in bangteng a theih a? chih thu pen, a theisa tampi zong i omkha diing a, hinanleh a thei ngailou zong ki-omthei ahihman in, Nu gilsung a Nau-ngek theihna chii sagihte hibang in i taklangh diing uh hi.

i). Lungkham thei

ii). A lim thei

iii). Lungdam thei

iv). Nai-awihna laate zong zathei

v). Kapthei

vi). Laa ngaithei

vii). Khutme tawpthei

Na ta in a Nu gilsung a a omlai in hibang theihna nei hi.

 

2. Nupi Hoihte Omdaan

i). Mi lak a a pawt diing chiang un, a tate uh puansilh kheeksak lou in amah ki-siam masa lou hi.

ii). Tate kihdak-huai simsim a omsak in amah kisiam lou hi.

iii). Mi lak a a tate hoihtak in keem zou hi.

iv). A kam saang in a mit-heek tawh a tate thu hilhthei zaw hi.

v). Mi lak ah a pasal zahtaak siam ahihman in minpha a ngah a, a pasal in amah a zahtaak kiik saang in mi dangte in amah zahtaak zaw uh hi.

3. Nu-le-pate’n Tate Tung ah bangchibang Lungsim Nei diing i hi ua?

i). Tate pen ki-it mahmah ahihman in ka gou, ka suaitawn (My full signature) zong kichithei a, ahihhang a taktak in a zanghthei uh hiam chih ki-enthak ni, Eph.6:1-4, in a gen thute i zuithei uh hiam? Chih eima mawhpuakna ah koih ni.

ii). Tate pen i anglum khamsak diing hi hang.

iii). Nute’n a ngah uh itna leh hoihnate tate tung ah bawl zeel uh ahihman un, Pasalte’n i tate uh muhtheih diing leh ettheih diing thu hoih khat, sil hoih banghiam khat, i zi tung a i bawl diing uh ahi.

iv). Nu-le-pate’n i tate uh om diing dan leh a khantouh diing dan uh i deihbang ua, tu hun a i om ngal diing uh ahi.

v). Na ta omdan na muh chiang in, kei omdan ahi chih mu lechin na zum diam? Or na omdante na ta in lakkhia ahihman in na ta omdan na mu-ngam diam?

4. Nu-le-pate Lungsim (Sin, Zui, Hilh).

Nu-le-pate lungsim pen chii thum in a kimuthei a, Ezra 7:10 ah, sin or zil diing, zui diing, leh hilh diing chiin nu-le-pate lungsim chii thum in a na khen hi. Eipawl a tawh kilehbulh hileh kilawm hi. Aziak pen eimite’n i sin or zil masang un i hilh ua, i zuih masang un zuih diing thute i gengen uh hi. Tuaziak in ei Nu-le-pate mahmah in sin masa in, i thu sinte uh a zui masa i hi phot diing ua, tuachiang in i tate uh i hilh diing uh hi, chiin i ki-ngen masa zaw uh hi. Tuaziak in hih anuai a thute chiamteh ni.

i). Naupangte thuhilhna leh makaihna pen ka lunglam hikei zong siamkei ingh, na chih leh na tate na mansuahkha diing hi, pan lathak in.

ii). Nu-le-pa khenkhatte in naupangte kep diingdan a kigen chiang, ka theihsa hi, ka zaaksa hi, chi in gen ua, hilezong zuilou uh hi, hibang mi nu mi pa hilou diing in kikeem in. Na tate khantouhna diing lampi dal in pang kei in.

iii). Nu-le-pa khenkhat in lah, zil ut, zui ut, in hilh ut uh ahihman un, tate maa vang a, hamphatna lampi a tate makaih asuak uh hi.

5. Tate Hoihna Diing a Nu leh Pa Mawhpuakna

Naupangte hoihna diing na deih leh, na pawtna mun khat pouhpouh a tate hoihna diing a kigen thu na zaakte, inn ah sin inla zui ngal lechin na innsung ah lamdanna na mu diing hi. Tate makaihna a theih diing a poimawhte;

i). Nu leh Pa kithutuak masa diing.

ii). Tate kiang ah thu khat pouhpouh genpai louh diing ahi.

iii). Tate zuih zawh diing ahihnak leh kimakaih diing daan bawl inla, nang a zui masa hi in.

iv). Tate’n i sawlna khat pouhpouh uh a zuih chiang ua, pahtawi diing, a kiik chiang a a sawl nopna diing ua thanuamsak diing, in thu a mankei uh leh kilamkaihna diing a na daan bawl tawh kituak a gawt diing ahi.

v). Tate a khelh uh leh, a khelhna ziak uh dong diing hi hang. A kah uh leh bangziak a kap? Chi diing hi hang, ama’un a khelhna ziak uh a theihsiam diing uh poimawh a, tua theihsiamna a neihna diing un Nu leh Pa in mawhpuakna lianpi nei hi.

vi). Tate tung a i lunghihmawhna pen, i tate tung ah kilanghsak diing hi hang. Tate’n nu-le-pate lunghihmawhna a theihkei leh thu mang theilou hi.

vii). Tate tung ah i itna kilanghsak den diing hi hang. Itna tawh kithuhilhna pen kimangthei a, hilezong itna a omkei leh haksa mahmah hi. Tate i itna uh i Tate theisak diing in, tuachiang a i gennopte gen diing hi hang.

viii). Khatveivei tate utna bang a i tate uh kimawlpih diing hi hang. Ama’uh lungsim bang leh utna zahzah a kimawlsak diing in phawk lou diing hi hang. Kimawlna hun a bei chiang, a lungdam chiang un thu kikuppih diing hi hang. Tua hileh i thu hung zuithei diing uh hi.

ix). Tate thu gente limsak diing in, i mit mahmah tawh a thu genlai limtak a en diing hi hang, hileh ama’un zong i thu gennate limtak in hung en diing uh hi. Naupang thugen chi a i thusim kei leh ama’uh a diing in lungkiatna hi a, nu-le-pate tung a a lung noplouh uh kipatna zong ahi.

x). Na gen zousiah zui zoupai lou diing uh ahihman in lungkia kenla, na gen sawm lak a khat a zuihtheih leh a lungdam-huai ahi. Ni sial in hilh-hilh diing in i deihna leh lunggulhnate theisiamsak zaw diing hi hang.

xi). Tate thuzawhna diing a tate tawh thu gen kituh louh diing ahi. Ama’uh gensak diing in, tunkei hun, chi a en zong gen diing hi hang.

xii). Thu khat pouhpouh a na hehna pen na tate mai ah kilangsak ken.

xiii). Omdan kilawm na deihbang in na tate mai ah om in, tua hileh na omdan bang in na tate zong hung om diing hi.

xiv). Tate’n i lunggimna a theihlouh man un, nu-nu hiam pa-pa hiam chi a, i gim i tawllaitak chiang a a hung bawh uh leh zong dohzoutak a, pom a, a zuihtheih diing a thuhilh zaw diing hi hang.

Tuni a i kikup uh thute tungtawn in Toupa Pasian in simtute thupha hung pia hen.

Share: