NA HAOSAT PET IN AVAICHA DIN KIGONGIN ✍️ Pr. Thangkhomang Suantak

 NA HAOSAT PET IN AVAICHA DIN KIGONGIN, 
NA VAICHAT PET IN A HAOSA DIN KIGONG IN

~ Pr. Thangkhomang Suantak
L. Semol | 13-06-2024

IPU ipa thuchih in, “Nikhat le sim thing pah in tin nikhat le jou thing pah tei nan ta,” ana tiuvin ahi. Hiche hi mi haosa ho jong nikhat le vaicha teiding,mi vaicha ho jong nikhat le haosa tei ding …” tina tobang ahi. Hiche hi lhangpi thuchih khat chu ahi. Hinlah mivaicha chu nikhat le haosa tei tei ding chuleh mi haosa chu nikhat vaichat tei teiding tina ahideh poi. Hao je helou ho vaicha ji ahin vaichat je helou ho jong haosa kit deh lou ahi.

Thinglhang kho khat ah pasal phabep khat hi gam che ding akisauvin, a lamkai pauvin, “ I hung nilhum diu ahijeh in buchun (sun an) kipoh cheh ute,” atin ahi. Mi khat pa chun same akihon jeh u chun anehva set leh agil kel kit ding chu atahsan thei tapon, “Ken vang buchun kipohda jeng ing e tu toh kabah le kagil kel taponte,” akiti nop sel e. Gam a acheuleh sunkim jong hilou laichun agilkel masapen in apang in, sun an neh kal chu angahlel pen in apang e akiti. Hiche hi Ipu ipan, “Buchun polou buchun lhapkal angah lel e,” atiu chu ahi. Hiche hi tulai mihaosa/mi nomsa kimkhat lunggel ahi.

1. Nahaosat pet in avaichadin kigong in:

(1) Vaicha kit dia kigotna neilou:  OT khang a vannoi leiset a leng hat pen le loupi pen chu Babylon lengpa Nebuchadnezzar ahi. Daniel in ama lenggam hi Sana toh ana tekah e (Dan.2:38). Aloupi behseh jeh chun athaneina khesuh theidin ana kigel phah tapon hijehchun kiletsah tah in, “Veuvin Babylon khopi loupidan! Ka thahat ka thuneina, kaleng loupina phondoh theina dia kasahdoh khopi len hi…” ahin titai. Thu seichai nailouvin Pathen in adeng in mihem lah a kon in akino mang in chubang leng loupi chu kum sagi sung in bongchal bang in hampa anen ahi (Dan.430-33).

Eiho lah a mivaicha kimkhat hi phat khat a chu mihaosa hiya kimanchah je helou Pathen ginglou ahijeh uva vaichat nan ahinphah jong tamtah ki um ahi. Tun jong inam sung uva mihaosa kimkhat hi avai cha thei din akigel pouvin, houin lam jot nom lou, vaicha genthei ho musit, chule adu du nea nopchon tamtah aum e. Itobang official thupi hiuhen lang sumle pai ning lhing jong leu Pathen in mihem aloilhuh teng het man lou kah ahiji bouve.

Leiset a haosatna chihna chule lolhinna iha chan chan a Pathen ang a kineosah ding joh ahi. Ajehchu Pathen in van a kon a eivet lhih jing u ahi ti suhmillou hel ding ahi. HIjeh a chu Psalms 14:2-3, “Van a kon in Pakaiyin Chingtheiya Pakai hol um’am, tin mihem chate ahinvei…” ati ahi.HIjeh a chu Jesun hou ngolpa koma, “Mingol-tujan teng nahinkho kisubei ding ahitai, hichea kholsa thiljouse hi koi chang ding hitam?”(Lk.12:20) ati ahi.

Vaicha kit dia kigotna nei: OT khang ah Israelte leng loupi tah khat ana um e. Ama hi David akiti, chubang lengloupi ahivang in Pathen ang ah kiphalam khen in aum jing e. Hijehchun,“Ka lup a ka ihmut teng Pakaiyin ei hoidam jeh in kathou kit ji e,”(Ps.3:5) tin alup kon athokon in Pathen athang vah jing in chuleh, “Kahin laisen Pakai choi-at la sang ting, Hinlai damsung in ka- Pathen vahchoila sang e,”(Ps.104:33) tin chubang leng loupi chun kineosah tah in semjang saiyin Pathen avah choi ji e. Hijeh hin David hi adam sung in aleng gam aboi pon ama leng gam hi akhantou dan leh anop dan hi Israelte thusim ah vangam toh ana kitekah in ahi.

Tupet Kuki- Zo chate lah a Offical ijat hamkhat le mihaosa, miching ijat hamkhat vang hi ahung lhuvah ding aum e. Ajehchu avaicha kit ding leh akemsuh thei dia akigel lou jeh un adu du aneovin akiletah un Pathen umnalam ahepouve. Avaicha kitdia akigellou jeh uva kigotna aneilou u ahi.

2. Navaichat pet in ahaosa din kigong in:

(1) Vaichat pet a kigotna neilou : Na vaichat jeh chun phat khat le haosa din kinem jeng hih in, ahaosa dia nakigot masat ngai ahi. Tulai mivaicha kimkhat hi ahinkhoa haosa lou ding jong aum e. Hiche ho chu; vaichat toh kitah lou toh, houin lam jot nom lou, Pathen hou nah sah kit lou, vaichat le kiletsah tho kit, vaichat le jule saneh kop kit... hitobang mihohi I tobang in genthei henlang vaicha jongleh Pathen lungset chang thei louva avaichat jong kile theilou din aum e. HIjeh a chu Jesun, "…aneiya chu kipeh be a aneiletset ding anei lou vang aneisun jong kilah peh ding ahi,”(Matt.25:29)  ati ahi. Hiche hi vaicha kitah lou ho aseina hiteiyinte. 

Hijehchun ahaosa dia nakigot masat loule itih hijong leh haosa chom pon nate. 

(2) Vaichat pet a haosa dia kigotna neiho: Vaichat kisuhdong laitah a kitah ding, Pathen heng a taojing ding, Houin lam jot jing ding, Pathen a thilto (Hopsom) hoa kitah ding kiti hi thilbai ahipoi. Chule vaichat genthei lai hi mi noise le musit chan lai ahin, kitah tah le lung lentah a Pathen bel jing ding ti hohi thilbai ahipoi. Hinlah hitobang phat laiya Pathen a kitah hohi Pathen in amelchih jing in donlouvin akoi jipoi. HItobang miho phatthei chan ding dan hi, Ps.121:1 , “Kadah in hoiya kon a eipanpi hung ham tin keiman thinglhang lam kavei, vanle leiset sempa Pakaiya kon…” tia datmo hel a Pathen athang vah jiu ahi. Tua jong inam sung uva Official, mihaosa Pathen ging tah tah hohi phatkhat a agenthei vaichat laiya Pathen a kitah ho ahijiuve. Hitobang hohi haosa cheh cheh diu ahi. Ajehchu Pathen in, “Neive patep un, van a bangkot cheng se hong doh ing ting thilpha jouse neng jeng jung a kasunlhah peh ding nahiuve,”(Malachi 3:10) tia phatthei boh dia kigosa um ahi. 

Thugeilhe:

Suhmillou ding chu; Lhagao sochat na ding thu hi tahsan na a kingam ahi. Hinlah,phatthei channa ding vang mihem hinkho a kingam ahi. 

Hijehchun

1. Navaichat nom louleh nahaosat pet chun kineosah in Pathen ging in,

2. Vaichat jing ding nanop lou leh navai chat pet chun kitah in Pathen ging in.

-------------

Share: