KHOVEL TONDAN ZUI SIN! ✍🏻 Pastor M. Thangboi Zou

Bible Tangtel: “Tam leitung hindan toh kituah in um sih unlen, hinanleh Pasian deilam hoi leh poimaw leh hoi bukim bang ahiei chi na thei chienna dingun na lungsim uh atha a um in hing lamdang zawta un” (Rom 12: 2).

Leitung in nisim in khantouna lam anot zing a, mihingte poimaw sil zousie akim suo toh akibang hi. Tam leitung khantouna in nisim in gingtute hinkhuo asuhsie zou hi. Robert Browning in, “Leitung a sil umte khu akiheng zinga, hinanleh Pasian leh na hagau aki heng ngai sih” achipen thudih ahi hi. Sawltah Paul in Rom mite kunga alaithotna ah leitung dan a umlou dingin gingtute khu hoitah in ahil ngai hi. Deithrich Bonhoeffer in, “Leitung khu a pichingta a, mihing ten nisim a i poimawte buching tah in a thei ua, Pasian lam sangsah nawnlou, a buchin nalam a zuon zing uhi” chin ana gen hi. Leitung khantouna leh a thupinate muong mai dingin Mangpa’n ei gingtute ang phal sih a, nanleh leitung dan (law) banga hing lou dingin na hinkhuo a kem tup din ang deizaw hi.

Leitung dan in Gay Marriage aphal a, thamlou in hattuom tampi’n zong apom uhi, nanleh Bible in phallou hi (Rom 1: 27). Leitung a mi minthang ten Tattoo ngai thupi nanleh gingtute chin ding hilou ahidan Bible in agen hi (Levt. 21: 5), leitung dan in Nausuhsiet (abortion) phal nanleh gingtute chin dia hoilou ahidan Bible in agen hi (Exo. 20: 13), miten ang theilou pou leh Gutat ahoi chin leitung dan in peipi nanleh Bible in hoilou ahidan agen hi (Exo. 20: 15).

I Bible tangtel in, Gingtute khu Leitung mite (piengthaloute) tawndan a tawnthei (hing thei) ihilou dan uh agen Chieng mama hi. Gingtute adin Khristian Tattoo (Cross lim, Jesu lim) umlou hi, chi avel in thei chiet vai, Gingtuten fashion dan a Tattoo bawl thei himailou ahi hi. Tua na hinkhuo zat pen leitung tawndan toh akibah zing leh, na khristian hinkhuo enpha in, dachia vaigei leh kisia in nak ap dinga, nanleh phatuom nawnlou ding hi.

                                                                            -----

Share: