INN VEH THUMSAHNA (House Visit)

_✍🏻 Pastor M. Thangboi Zou              
Area Pastor, Lamka East Division, MELC

Thumapui:  Hattuom khanna thuguh khat ahileh tunia mawltah a ikikup ding uh khu ahi hi. A khente adin thupilou mai thei nanleh khente adin thupi mama hi. A thupi dan ken zong Pasian jalin ka thei hi, Pastor nna kasep apat ka Mission lah ah athupi pen khat in ka koi zinga, zong ka tawpsan ngamlou khat ahi hi.

Mangpa Jesu khu ni simin Jerusalem biehinnpi sungah atou zing sih a, avakhie a, Peter inn ah vahawh in Peter sungnu damlou vasuh dam hi (Mt. 8: 14). Jairus inn ah vahawh in, atanu shina pat akaithou hi (Mt. 9: 18). Syedong Zekai inn ah vahawh in, zantam in, tua innsung miten hundamna atang/ amu uhi (Lk. 19: 5).

Mangpa Jesu’n, “Inn khat poupou ah hawh chiengun tam inn ah guolzawlna tung tahen, chi un” (Lk. 10: 5) achi hi. Tamin agetnuom ahileh, “Inn vehna nei unlen, thumsah un” ahing china ahi hi.

Nuazuite zong biehinn sung bou ah umlou un, Inn a aban ban a vehna neiin, Techi (Witness) a pangin, thumsahna zong nei uhi. Tuami ziehin, nuazui kibelap (piengtha pung) in, hattuom zong khang semsem hi (Nasp. 3: 4-5).

England gam a halthana (revival) ahing tunnasan asui u’leh, John Wesley (1703-1791) zieh ahi, aziehpen “John Wesley inn veh thumsahna vang ahi hi” akichi hi.

Nigeria gam a Benin khopi a um Miracle Center Hattuom te khu Kum 10 sungin 28400% tah in khang akichi hi. Leitung a hattuom khangpen in akichiemte hi. Tami khu a Pastorpa uh Benson Idahsa (1938-1998) kungah bang zieh a hichi lawmlawm a na hattuom uh khang ahiei? chie adoh uleh, Pastor Benson in, “Hattuom sungah Hagau Siengthou mun ka pieh uhi, Khantanhoi ka tangkou ua, Pastote ‘n inn veh thumsahna ka nei den uhi, tuami zieh ahi” chin adawng hi.

Akhupsitna: Hattuom khangtou ichipen, “Belampute’n a belamte uh hoitah nou a kemzoute zieh ahi. Biehna lamkaite’n a hattuom memberte uh kungah ah a thum utte biehinn ah hing pei un”  achi uhi. Hattuom khantouna thuguh khu, “Pastorte’n inn veh thumsahna vang ahi” chilei kichi khiel lawmlawm lou ding hi.

Ngetna leh thiding: Pastor ten na inn uh hing veh a ahing thumsah ding uh hattuom miten na ngaikho ding uh ahi, tami a theiding  khat ahileh, “Pastor Inn veh thumsahna ding vanga, nethei, dawnthei, leh silpieh (gift) maitam khu a No 1 hilou zaw in, a No 1 khu na innsung a thum ding khu ahi, tamte neilou man a na Pastorpa na hat ngamlou leh avangse pen khu nang nahi ding hi , ahin na neizaw leh tuate na bawl thei dinga, a teitei vang hilou ahi” chi thei chiet vai. 

Inn veh thumsahna tungtawn in Pasian nasemte leh Hattuom memberte kikal a kizawpmatna adetsah a, tami’n kipum khatna leh khantouna ahing tun hi. Tuami ziehin Na inn ua Pastor hing hawh a ahing thumsah ding khu ngaikho in, tualeh Pastor ten zong tami ingaikho chiet ding uh ahi, tami ithupi bawl ua ihahbawl mun u’leh Hattuom in khantouna leh pichinna amu, atang ding hi.

Inn veh thumsahna ngai khothei hattuom member hithei chiet ding leh, abawl mun Pastor hi ngei dingin simtu zousie Mangpa Pasian in hing guolzawl chiet tahen.

Aban ah, Naupang Nipi Sang manphatdan kikum kia vai maw….?

Share: