GUOLNEI DIHLOUTE (False Prophets) ✍🏻 Pastor M. Thangboi Zou

Tangtel: 

“Aziehpen Khrist tahlou leh guolnei tahlou ahing pawt ding ua, tuaten chiemtenate leh sil lamdangte mite solna in a ensah ding uhi, hithei leh telte nangawn asol ding uhi” (Mak 13: 22)

Thumapui: Anai leh gamla a um ngaina tah a Gospel Tangkou simtu zousie jahna chibai hing buh ing ei. 

Tuni Gozut toh hoima a lah pot khethei tuonlou ding na hichiah ana sim in, na gintat khel ah Hagaulam ah phatuomna na mu ngei ding hi.

Na thugelte sauthei taluo, simpei huoi sih na chileh, Korean flim leh Hindi Serielte bangin ngaitua inlen sim lechin tom sa mama ding hite! Pasian thutah tampi nasim a bawn na lung akihei thei nailou leh tom noukhat a kigielten na lungsim bun mama lou ding ahi chi thei in.

I thupi tel akipat in mawltah in anuoi ah Point-2 zangin isui chien ding hi. Tuate ahileh:
1. GENCHETNA:
Mangpa Jesu hunlai a, Pasian thukhamte asesah syete toh kibangin tu hattuom hun ah zong Pasian nasemte lah ah Pasian thupieh banga gamtalou mite pilvan huoi mama hi (Mt. 24: 11, 24). Mangpa Jesu in Khristian laigel mite, syete, hattuom enkawl lamkaite, Khantanhoi thu gente leh laihilte’n Khrist ka gingta chi nan uleh zong gingtu dihtah lou zong hithei uhi, chi ahing hilkhawl masa hi. Tami toh kisai anuoi ah point-3 ensuh vaileh:

i) Tabang mite khu apolam ah “mi mai a misiengthou bangin” aum uhi (Mt. 23: 28). “Belam vun silte” ahi uhi (Mt. 7: 15). Amauten a thugenna uah Pasian kammal ma bulphuh in, dihna thu ma tangkou ding uhi. Amauten Pasian gam leh anasepna thupi sain, hagau mangthaiten hundamna amutheina dingun veina lienpi nei in, itna nei tahtah bangin umkha thei ding uhi. Hagau Siengthou sathau nu na tang bang danin patatna muin, Pasian nasem tahtahte bangin kilang khe thei ding uhi. Sillamdangte zong bawlin minphatna muin mi tampin zong a anua zuikha thei uhi (Mt. 7: 21-23 cf. 24: 11, 24, 2Kor. 11: 13-15).

ii) Hinanleh tamite khu Thuhun Lui hun a guolnei dihloute ha-le-suon ahi ua, Thuhun Tha hun a Pharisaite ahi uhi (Danp. 13: 3, 1Leengte 18: 40, Neh. 6: 12, Jer. 14: 14, Hos. 4: 15 hilchetnate zong simbe in). Amaute ahi u’leh, “Nouten Nou leh kuong pulam na silsieng ua, hinanleh asung lah lepguhna leh kidehlounain adim uhi, noute pen han kizutngou apulam kilawmtah a kilang, asunglam lah mishi hu leh silnieh chintenga dim bang na hi uhi, pulam ah mihingte mitmu in dihtat bangin na kilang ua, hinanleh na sunglam uh khu lepchiena leh gitlouna in adim hi” (Mt. 23: 25, 27-28) kichite ahi uhi. A lungsim Kot uh kikhah in lunggulna, lungtang khauna, chi-le-sa lunggulna, huoihamna leh hansanna lungsim nei uhi.

iii) Tabang a kibawl tom miten Hattuom sung thuzaw theina thuneina (power) nei uhi.

a) Zuouthei lamkaite leh thuhilte khu chitahin, thudihin, siengthou in, Khrist sungah ginna dih toh nasem kipan masa uhi. Tuajou chiengin Pasian gam akipat kihemkhie un (1Kor. 6: 9-10, Gal. 5: 19-21, Eph. 5:5-6 chite simbe in), thutah nasem banga, akinei vangun Setan vanzat asuoh uhi (2Kor. 11: 15 sim in).

b) Guolnei dihloute (zuauthei thuhilte) khu Khrist sunga gingtu dihtah hingailou ahi uhi. Amaute khu Setan in a akipatchil akipan Hattuom sung a khawi hi (Kil. 13: 24-28, 36-43). Amaute siemna leh kivana un alawchinna uh belap nalai hi. Jesu Khrist nasepna thupite athupi ngaituolouna dingun Setan in amaute min leh hina toh midangte thuzaw hi. Amaute zuauthei lamkai ahilam uh kipholkhia in kihawkhia hileh khantanhoi in man nei nonlou in Khrist minse ding hi chi Setan in athei hi.

2. ETCHETNA:
Mangpa Jesu’n tabang a guolnei dihloute etkhietna dingin Khantanhoi laibute sungah a nuazuite kungah sawm-le-li vei (14 times) ana hilkhawl hi (Mt. 7: 15, 16: 6, 11, 24: 4, 24, Mk. 4: 24, 8: 15, 12: 38-40, 13: 5, Lk. 12: 1, 17: 23, 20: 46, 21: 8 chite sim in). Mun khen khat ah Hattuom sunga laihil syete, thuhil syete, leh lamkaite zong gingtuten a etchetna dingun kihawnthawn hi. 

Tuate ahileh:
i) Amaute hinkhuo thei chien in, kukal tah in Pasian kungah chitahna lungsim toh akilatna uh akimu khie ei? amau hinkhuo ah Hagau Siengthou nasep na ga (hagau gate) akilang khie ei? (Gal. 5: 22-23), mikhielte a it (hepi) uai? (Jn. 3: 16), gitlouna mudahin dihtatna a it uai mah? (Heb. 1: 9), gitlouna (suol gal douna) ah hangsan tahin a pang uai mah? (Mt. 23: Lk. 3: 18-20) chite hoitan enchien in.

ii) Amaute gamtatdan thei khie in. A dih leh thutah a Khristian lamkaiten sil li (4 things) lunggul in asui ding uhi. Tuate ahileh:
a) Khrist a kipatawina ding (2Kor. 8: 23, Phil. 1: 20).

b) Sienthouna vanga hattuom mapui ding (Nasp. 26: 18, 1Kor. 6: 18, 2Kor. 6: 16-18).

c) Hagau mangthaiten hundamna amu theina ding (1Kor. 9: 19-22) leh

d) Khrist leh anuazuiten tam Khantanhoi ma atangkou na ding (Phil. 1: 16, Juda 1: 3).

iii) Amaute hinkhuo ah a thugente uh a ga khe eima chia etchien ding. Zuouthei lamkaite vangin ahinkhuo kikhel mi zong a um thei a, ahivangin tuate Pasian thutah laisiengthou pomkipna a hinkhuo uah umlou/ neilou uhi (Mt. 7: 16 hilchetna en vai).

Mt. 7: 16 nan “Amaute aga uah na theipai ding uhi, mi’n khaulingnei gui ah grepe ga alou ngai uh amah? Ahisihleh theimiling kungah theipi alou ngai uh amah?”.

Guolnei dihloute (Zuauthei thuhilte) a pulam uh adih toh akibat vangun, asunglam khu “Ngia gongsan abang uhi” (Mt. 7: 15) chin agen hi. Amaute a ga kithei khe thei hi. Amau nuazuite hinkhuo a kilang a hoilou gamtatziate khu Guolnei dihloute nasep ga ahi a (1Jn. 4: 5-6), tamna anuoi a chiemtena te ahing bang ding uhi:

1. Amaute Khristian akichi ding ua, Pasian thutah sangin mimalte thupisa zaw ding uhi (7: 21). Amauten Pasian sangin Pasian silsiemte abe zaw ding uhi (cf. Rom 1: 25).

2. Amauten Pasian vangletna sangin mau deina thupisa zaw ding uhi. Amaute ginna bulpi khu Pasian a kibulphu lou un amau mama uah akibulphu ding uhi (7: 21-23, 2Tim. 4: 3).

3. Akihilnate uh mihingte kihilna leh ngeinate khu Pasian thutah toh akilebul vangin, amauten pawm ding uhi (7: 24-27, 1Jn. 4: 6).

4. Amauten Pasian thutah kihilna sunga kiphungvuh sangin biehna toh kisai kiphutkhie silte leh sillangdangte suiin ahi sa ding ua, tuapen thutah thudih a kipsah na dingin athuneipen hisaw zaw ding uhi (7: 22-23).

5. Amauten ginna bulpi pen pomjou lou in, dihlouna “lampi tanzau” toh hundamna apethei thuhilte sui ding uhi (7: 13-14, 23, 2Tim. 4: 3).

iv) Laisiengthou ah akingapna uh enchien in. Tami khu akilangkhie athupipen ahi hi. A thu i man ding leh i jui ding thu khu Laisiengthou ahiman in, amauten Pasian kammal Laisiengthou sunga aum zousie Thuhun Lui leh Thuhun Tha achil akipan Hagau Siengthou huhahkhum toh kigel Pasian kammal ahina hi chi agingtah tah na uai mah enchien in (2Jn. 1: 9-11). Tabang ginna anei sih uleh agen thute uh pen Pasian akipan hilou ahi chi thei chien mai un.

v) Atawpna ah Pasian sum thu ah zatatna leh dihtahna lungsim nei uai mah chi enchien in. Amau leh amau hamphatna ding hilou in (Pasian sumpi kem khen khatten asum kep uh mau dei dandan akizat, tuate genna ahi), mopuohna leh lungsim hoina toh sumpite azang uai, Pasian nasepna alamzang na dingin Thuhun Tha sunga lamkaite hinkhuo zat ding dan toh kitua kithuhilna toh kituo in azang na uai mah? (1Tim. 3: 3, 6: 9-10) chite enchien un.
 
Akhupsitna: hichin khupsit mai vai, “mi chitah gingtuten mi zousie ahinkhu uleh a thumnate uh enchien ding hitalei, hattuom sungah Guolnei dihlou (thuhil dihlou) lamkaite um veve nalai ding hi, aziehpen Pasian in ahepkhiet hun tung nailou ahi chiengin Setan panpina toh amaute leitungah kisuh mang sieng joulou ding hi” chi thei chien mai vai. Ahin tuabang mite apat na kiven zouna dingin amasan nang leh nang kikem hoi in, Bible thutah kipui sah in, Bible thutah, thudih na theichien loute “Sial khautu in tu sinlen, tuami thei dia na gingtat Pastorte, Pasian mizatte va dong ngam in, tuamin minsietna ding hilou in, minsietna leh muolphouna akipat suotatna ahizaw ding hi”. Tulai mi khen khatte theilou kitheisahte ziehin hattuom tampi buoi, akhenval a theite ziehin zong buoi semsem nalai ahi man in Thumna toh Bible toh pang in na hinkhuo kikem sah lechin tamna igen THUHIL DIHLOUte akipan Mangpa Pasian in ahing vengbit mama ding hi.

Mangpa Pasian in bang chibangte ahoi ahi chi a, bangchite hoilou ahiei chi akhen siem thei dingin, simtu zousie pilna chimtah toh hing guolzawl chiet tahen, chi ka thumna ahi hi.

---

Share: