NA DAMLAI NITE HOIHTAK IN SIM GIGE IN

✍️Pastor Thangdoulal Suantak

Na lampi diing Toupa tung ah nga inla; amah muang in, ama'n a hung sem diing hi. - Sam 37:5

Mihinte i hih uhleh, i damlai hinkhua ua i khosak diingdante uh tawh i buai taangpi ua, hichibang a buaite lak ah kei mahmah zong ka hikha diing hi. Hilezong hoihtak a i etchian ua ahihleh, i hinkhua ua i paidante uh leh i omdante uh pen, guatsa hiam sehsa hiam hileh kilawm a bak hun a tam mahmah a, hilezong ei hung siampa Pasian theipha leh, a om hi chih zong ngaihsut phalou khop in i lei hinkhua uh i na omkha zeel ua, a dahhuai mahmah hi. 

Tu hun a i dinmun uh leh hihnate ahihleh Ama thu a hung kipankhia ahi a, bangkim Amah lemsakna bang a pai ahizaw hi.

Haksatnate i thuak un zong, Amah a pan a hung kipan ahi veve hi. 

Pasian in eite a hung itna a thuuk in a gil mahmah a, mihingte mizia a om itna saang in, a thuukzaw a, zong a gilzaw thamtham hi.

Ei a diing in, i khelhnate uh sawpsiang ahihna diing in Ama'n a tapa tangh neihsun, Jesu Khrist a hung pia a, tualeh Jesu'n a hinna a bei dong in eite a hung itna a kilangsak a, hua pen eite'n i hamphatpih theih na diing ua, i gingtat ua, a thu i zuih mai diing uh ahi. 

Hichibang ahihziak in, i damlai nite uh Amah theizing kawm in i zak-sawm diing uh hi. 

Bangchiklai peuh in Ama'n i lei hinkhua uh a la thei hi; hichibang a lak ahih chiang, A kiang ah i tawldam sam diam ahihkeileh Gawtmun Meidil ah? Hoihtak a ki-ngaihtuah tham ching ahihna ah, a na ngaihsut sam in aw!

I damsung hun leh kumte ua, Amah theizing kawm a hinkhua i zak ua ahihleh lungkhamna diing bangmah a omkei diing a, nna leh sil zosiah saandan leh pomdan i siam diing uh hi. "Na lampi diing Toupa tung ah nga inla; amah muang in, ama'n a hung sem diing hi," chih ahihziak in i lei hinkhua uh bangchibang a zang i hi ua chih chih hoihtak a enthak diing in i ki-chial uh hi.

Khrist in eite a hung itna a saan bang in eite'n zong Amah ngaihsak deuh ni hang in, i hun leh nite uh hoihtak a zat a, Ama mitmuh a kilawmtak a om diing pen, leiba neih in neithei ma lehang a chih-huai mahmah hi.

Hih leitung a i khual-taam sung un, leitung dan leh ngainate bang in omkei ni hang in, Ama thei zing kawm leh mi dangte'n Pasian eimah tungtawn a amuh theih na diing un, i hinkhua uh zangtheita lehang a chih huai mahmah hi. Aziak pen, i bawltheih uh omsun ahi hi. I damalai nite a Amah theilou a khosa i hih khaak ua ahihleh i lei hinna lak ahih chiang in, khoi lam zuan in i pai diing ua? Chih thu ngaihsun in, hoihtak in i ki-enchian diing uh hi.

Thu-ngetna hinkhua zak theih sawm thak lehang a hoih mahmah diing hi; aziak pen hua i thu-ngetnate uh pen, Amah i naihtheih na uh leh Amah tawh kikum a hun i zakna uh ahih a, hun mantam leh manpha ahi hi. Kikhawm tamkei lehang zong, Amah i biak tam ua, i kikuppih tam ua ahihleh Ama'n a hung ompih ngeingei diing hi.

Hichibang ahihziak in, lawm deihtakte aw, hih thu ka gen nuam hi… Na damlai nite a Pasian theizing leh Ama thu a om mi khat hi diing in pan lathak in, kung chi nuam hi. Amah biaktam sawm inla, thu zousiah Amah kiang ah tut masa inla, Amah tawh kikhawltam in, tua hileh Ama'n na kalsuante a kem ngeingei diing hi. 

Share: