🙏💝ITNA TAWP KHAWK A NA HIZAW!💝🙏

~Pastor Thangdoulal Suantak

"Tampi sap ahi a, hinanleh tawmnou khat tel ahi uh," achi hi." (Mat. 22:14)

"Adiktak in, k'ung hilh ahi, mi kuapeuh naupang neute bang a Pasian kumpigam saanglou pen a sung ah alut kei diing hi, achi hi". (Marka 10:15).

Taangtawn hinna i khahsuahlouh na diing un taangtawn hinna manphat dan leh a mantam dante lunggiltak a i theihsiam uh a ngai a, hih leitung silte tawh kheek-louh diing a, leitung a i sil taan leh suplawhna diingte uh manphat dan theihna in eite KHA a a hung lamkaih theih a poimawh hi. 

Hua taangtawn hinna manpha leh mantam manphat dan theihna in hutkhiat ngai ka hihna a hung theisak a, tua in hundampa manphat dan a hung hilhchian zeel hi.

A omdan pen hibang ahi. Tuipi thuuktak ah ka kia a, kei-le-kei kihunkhia thei nawnkei hi. Hichibang dinmun a ka omlai in, kei hung na it zingtu Jesu Khrist in, sih huam in a hung hunkhia a, haatna mawngmawng nei nawnlou pen, a haatna a hung muangsak a, theihna mawngmawng nei nawnlou pen, a hung pomkhiata hui; hua pen ahi ITNA TAWP KHAWK, mi haatlou haat a ahung bawlna mahmah ahi.

Ka lawm deihtak aw, nang zong ngaihtuah in, naupang in silte a kipahpih bang a, Vaan-gam kipahpih a, hua mun tunkaal ngaklah mahmah mi khat na hi hut sam leh, Kha Siangthou lam-en inla, a chawimawi diing tu Jesu Khrist manphatna a na ngaihsut thak in aw!

Huchibang a lungsim zousiah a ngaihsut mi khat na hih a ahihleh, hua pen ahi "ITNA TAWP KHAWK!" tualeh hua itna in na hinkhua a khoi ngei diing ka lam-en hi. Hih omzia pen, pasal khat in numei khat a it taktak chiang a, a hinkhua kikheel a hua numei a zuih a, a hinkhua a kilamdan mah a bang diing hi. 

Na theihsa mahzaw hiveh aw maw, hilezong Khrist mantam-dan ngaihsut tam utlou leh a ngaihsut peihlou zong hikha diing in kung gingta a, hih ziaktak a na sung a om Kha (Khrist Kha) in na hinkhua thunun thei taktak lou zong ahikha diing hi.

Tuachiin "Pasian thu pen a hing a, sil a bawlthei a, temsau hiamtuah saang in ahiamzaw a, hinna leh kha, tualeh guh-le-teeng kisuktuahna leh chintuiguh khenthei khop in a sunthei a, lungtang a ngaihtuahnate leh tupte thei khenthei hi," (Heb. 4:12) chih thumal eite a diing in a hinglou mah abang kha-thei zeel hi.

Pasian thu sil bawlthei, temsau hiamtuah saang in ahiamzaw a, hinna leh kha, tualeh guh-le-teeng kisuktuahna leh chintuiguh khenthei khop in a sunthei pen, 'Itna a zong itna tawp khawk pen ahi a, hua ahihleh, Mi khialte hung itna Thu mahmah ahi hi. 

🙏KHRIST IN NANG A HUNG IT HI🙏

✝️GOSPEL MESSENGER✝️

Share: