LAMDANGTHEI NA E MAW, TOUPA

✍️ Pastor Thangdoulal Suantak

Pasian minte lak a khat ahihleh Lamdangpa chih ahi a, a hung lamdang tou zeel lai diing a bang hi.

I Pasian uh hung lamkaihdante, a hung etkoldante ah khoksakna taktak neilou bang in i om ua, hilezong theihsiamna i nei kholkei uh abang a, i theihsiamna diing un hun tampi a na ngaikha thei zeel hi.

Leitung ah kisuanpih diing in hauhsakna leh thupinate nei kim lehang zaw, Ama lamdanna pen i na mangngilhkha ta un zong a zia om deuh maithei diing in ka gingta hi. Ki-ngakna diing leh muan diing dang nei tuanlou mite a diing in pen, mangngilh theih diing bangte ahikei hi.

Ama'n vaan khopi ah eite a diing in mun a bawlkhinta a, hua vaan khopi a om sam diing a chitna hung pia leh neisaktu ahihleh hehpihna leh itna ahi a, hih pen tulaitak a i sil neihte uh lak a thupi leh poimawh pen ahi hi.

Mi khial leh mi buahte i hihlai ua, ei siam a hung tansakna saang a thupizaw, i simlei nunna tomkaal sung ua diing in, bangdang omtuan diing ahia, a omkei diing hi.

Eite ngaihdan ah i mailam diing uh lampi a zuih deuhdeuh a, a bing semsem hi; hitalezong Amah i Tou Jesu uh, i zuih ngeingei diing uh lampi ahihdan hichibang hun chiang in a kilang diak hi. Eite'n i neihsa uh theihna leh huak zang a i zonkhiat theihlouh leh i zonkhiat zohlouh uh sil tampite, lamdangtak in Ama'n mit khitui kawmkaal ah a hung musak zeel zaw a, a lamdang mahmah mai hi.

Leitung ah vaanlam tanchin zil leh mi pil mi siam tampi a om hi. Hichibang mite'n zong a zonkhiat zohlouh uh thu-gil, taangtawn a hinna thu, ei dai-ningkawm a teeng, kua-mah ngaisaklouhte'n i lungsung uah chiantak in i mu ua, a lamdang mahmah mai hi. "Lamdang Na E" chih pen a hehpihna vaang a i kisuanpih theih uh omsun leh neihsun a hung suakta hi.

Tualeh Mit Khitui kawmkaal a Kipahna a omdante zong lamdangtak in i lungsung uah, kichiantak in a kilang hi.

Leitung tanchin theihsiam haksa taktakte kaal a pui a i omdante uh zong, lamdang na mahmah e, i chih diing uh ahihkei ngal leh, gen diing a omkei hi. Tualeh Pasian in a mite a ngaihsak mahmah na pen, dinmun ngiamtak a kipan a i muhkhiat uh sil thupitak ahi hi.

A gam leh a diktatna pen, i zon masak diing mah uh ahi a, hua khit chiang in Ama'n ei poimawh tampi a hung piak sawm hi. Eima gam diing saang in Ama gam leh dikna zon masak in neita ni uh aw!

Zon diing pen ngak a, ngak diing pen i zon masak zeel ziak un, BUAINA in eite a hung tunkhum taang zeelzaw hi. 

Eite'n i ngaihkhokte uh leh i poimawh ngai diakte uh pen, eite a diing a poimawh penpente a na hilou thei ahihna ah, bangkim taanna/ supna mun a om zong, i poimawhte uh lak a khat ahi, chih i theihsiam mahmah uh a ngai hi.

Pasian, Lamdangpa ahihna pen mawltak leh kipaktak a muhkhiat chi a na hizeel zaw ahihna theisiam thak chiat ni aw!

Ama'n eite tanvou a ung piak sawmdante, eite'n i nan gak sawmdante uh tawh a kikhiat luat chiang in, hamphatna diing a zong hampha theilou in, i vaang neihna diing zousiah uh tawh, mi kithei ngailoute lampi a kipel bang in i kipel kha zeel ua, a poi mahmah mai hi.

Sil bangmahloute tungtawn a kiphuang Pasian ahihziak in, kiletsakna/ chapo-na, duh-amna leh mahni masialna/ eima angsung khualna chihte, eima sung a kipan a, a sih a ngai hi.

Pasian in eite a hung lamkaihna ah khitui zong a om hi chih pen deih-huai kholkei lezong, sil diktak ahihna theisiam zaw ni aw!

Hilezong, hichibang lampi ah thuakhatna miziate a hung kilangzaw a, hua mizia pen Pasian deihlam ana hizaw zeel hi.

Ei deihteelna a panglou sil tamtakte'n i Pasian uh pen Pasian, Lamdangpa ahihna a kichiansak hi.

Kinepna pen a beimangthei sil ahi a, hilezong eite hung kineppihtu lam a i manthatlouhna diing un, Pasian, Lamdangpa ahihna leh miziate tuni in zilkhiat sawm chiat hi aw!

Lam zuih haksa taktakte a pai diing a lamkaih a i om hun uh a ombang in, lamnuam a pai diing a lamkaih a i om hun uh zong a om tham hi. A haksa teng bekbek theih pen in neiden kenla, nang hung lamkaihtu kua e, chih theizaw in. Pasian in eite a hung ngakna mun pen, na gintatna mun ahi kholkei diing hi.

Na lampite leh nung lamkaihnate, Lamdangthei na mahmah e maw, Toupa!

Share: