CHRISTMAS DINNER

✍️ Pastor Thangdoulal Suantak

Christmas dinner ahihleh ann, Christmas Ni nitaklam chiang a, Saptuam mipite'n Biak-inn huangsung a, a hon a i ann nek pen uh ahi a, Kagan, Sarah in Dec. 06, 2016 lai a, a article gelhna ah, "Christmas dinner pen, Christmas tunkim-zaan a kipan a Christmas Ni zaan kikaal hunsung, a lem hunhun a hawm a nektheih ahi," achi hi.

India a Christian Pawlpite Christmas Dinner Tuamtuamte:

 Mapsofindia.com a kigelh, "Goa Christmas food" chih article ah, Goan Catholics pawlpi in, Christmas dinner in, Voksa, Bawngsa, chihte a huandan tuamtuam a huan in a ne uh, a chi hi.

"India's president praises contribution of Christian Community" chih article 08 August 2018 a kisuah pen ah zong, "Kerala Christian pawlpite'n Christmas pen, Zaankim mipi kikhopna tawh a zangh ua, ama'un zong Voksa, Bawngsa (Beef Stew) leh Mappa a chih uh Meh chikhat a common mahmah a, hiteng chihlouh zong nekna leh nekdan tuamtuam tampi a bawl uh hi, a chi hi.

Japan a Christian Pawlpite Christmas Dinner:

Whip, Lindsay in, 19/12/2010 lai a ana gelh, "All Japan wants for Christmas is, Kentucky Fried Chicken" chih article, Japan Today chih Paper a, 2012-07-23 ni a kisuah ah, Japan gam a Christian pawlpite'n Christmas dinner diing in Aksa a ngaisang mahmah uh, chih theihtheih in om hi. 

Germany gam a Christian Pawlpite Christmas Dinner:

 Germany gam a Christian pawlpite lak a Christmas dinner a common mahmah khat ahihleh ama'uh haam in, Kartoffelsalat mit Wurstchen akichi a, hih pen potato salad with sausage chihna ahi. Tualeh ama'uhte Main Course Dishes ahihleh Ngasa ahi a, hilezong amun zil a deihdan leh duhdan zong kibanglou theih ahihziak in, mun khenkhat ah, Sa-meh (Meat) Vatotsa, leh Goose kichi Vatot-liante sa a common mahmah hi.

Philipi gam a Christian Pawlpite Christmas Dinner:

Philipi gam a Christian Pawlpite lak ah Christmas Dinner in, Vok-keeng, Voksa a pum a Em-min, Bawngsa malta thak a em-min, chihte a common mahmah hi.

Austria gam a Christian Pawlpite Christmas Dinner:

Austria a Christian pawlpite ah, Christmas Dinner in, Vatot-liante Sa (Goose) leh Ham kichi Vok-keeng pan a kibawl sa chikhat a common mahmah hi.

North East India sung a om Christiante lak ah, Christmas Dinner in bang a common pen a? Hih dokna pen dawn hak maithei ahi. Mizoram ah Voksa leh Bawngsa mah ahih diing gintaat-huai pen a, ei Lamkate lak ah Bawngsal eh Voksa ahih diing gintaat-huai pen hi.

Nou innkuan or Saptuam in, Tukum Christmas ah bang na nek sawm ua?

Christmas in a hung naih mahmahta a, Christmas a Sa nek diing tawh kisai a buai zong tampi i om ngei diing uh a lam-et huai hi. Hilezong Lamka a omte a diing in Saptuam a Christmas Dinner nekkhawm zuazua pen a lem kholkei khadeh-aw, ITLF thusuah i etleh lah tukum Christmas zaklouh phot hileh chih ngaihdan ahihziak in, mi khenkhatte'n pomsiamlou ua, khenkhatte'n lah khoksa lou uh hileh kilawm hi.

NOU CHRISTMAS DINNER BANGCHIBANG IN NA ZAKH SAWM UA? INNKUAN IN MAW, SAPTUAM IN?

Share: