TUNI VAAN MANNA: ‘Makedonia hung gaalkai in' ~ Rev S Kaikhanmang

“Huleh jaan laiin Paul in kilaahna amu a, Makedonia gam ah hung gaalkaai inla, hung panpih in, chia ngeenin amu hi.” (Silb.16:8)

Dr. Watkin R. Robert chu Denorvic Street Carnasven Mid W. Welsh ah September 21, 1886 in a piang hi. Evangelist minthang Reuben Torrey (@ R. Torrey) thusoina apat piang thah ahi. A poimohna mun pouh a Tanchinpha soi diingin Dr. Peter Fraser te nupa hung zuiin October 14, 1908 in Aizawl ahung zuan uhi. Mission Dispensary ah kum khat a seem a, Mizo haam zong ahung siampah hi. Tanchinhoih John Lehkhabu Mizo haam a Pu HK Dohnu, Rev. R. Dala leh Pu Suaka lehdoh lei in Mizo hausa zousiah thot ahung sawmta hi. Ni khat chu Mizoram polam apat hung zin hileh kilawm Medical Mission campus ah ahung lut uhi. Huin Watkin R. Robert in a gam tanchin uh a dong a, Manipur  a Thadou Kuki te ahi uh chih a heetin, ‘Na gam vah Tanchinpha thusoi a umtai? Hausapu in Lushei haam a sim thei ei?’ chi in a dong hi. Koimah Tanchinpha soi a um sih a, hausapu in Lushei haam a sim thei chih a heet tahin, Tanchinhoih John Lehkhabu chu Senvawn hausapu Pu (L) Kamkholun a diingin a thotta hi. 

Hi Bible kithot amu viai amu sih viai chia lungdong a a um lai in, Senvawn apat Aizawl a puankhui zil diingin mi 4 ahung va, hite tungtawnin Pu Kamkholun in Watkin R. Robert a diingin Tanchinhoih John Lehkhabu khat sunga a awng ah, “Pute aw, na hung lehkhabu piaah uh hilhtu um louin a ngaihna ka he sih uh. Nanguh hung unla, lehkhabu leh na Pathian tanchin uh hung hilh un” chih gialin a thot kiit hi. Pathian in i haamteina hung dawng chi in ‘Mekedonia Kouhna’ banga ngaiin, Aizawl a lehkhasim tangvaal Pu Thangkai leh Pu Lungpau toh January 31, 1910 (Monday) in Senvawn juan in akipandoh uhi. Huchiin February  5, 1910 (Saturday) in Senvawn khua atung uhi. Ajiing Pathianni in kikhopna anei va, Tanchinpha soina Pu Watkin R. Robert in nei in lohchingtah in hun a zang uhi.

Apostol Paul Pathian natohna i et chiangin abul apatin Hagau Siangthou mapuina atang nasa mahmah hi. “Huleh Lalpa natong a an angawl laiun, Hagau Siangthou in, ‘Barnabas leh Saul keimah nna seem diinga ka kouh chu hung khenkhiahsah un’ a chi hi.” (Silb.13:2) Amau geel chu ‘Hagau Siangthou sawldohin a chiah va,’ (Silb.13:4) Antioch kouhtuam in missionary diingin a sawldoh uhi. Paphos ahung tun un ‘dawisiam, zawlnei tahlou, Judami Bar-Jesu kichi in amahuh ana doudaal tahin Paul chu Hagau Siangthou in a dim a, amah a ensaal hi.’ (Silb.13:9) Pisidia gam a Antiok khua a thusoina ah Judate leh Jentelte tamtah a piang thah uhi. “Huleh nungjuite chu kipaahna leh Hagau Siangthou in a dimta uhi.” (Silb.13:52) Tuni in i natohna ah Hagau puina leh lamkaihna i mu in i he thei ei? Paul in Galatia kouhtuamte kawmah, “Hagau ah um un, Hagau pui in um un, Hagau ah hing un,” (Gal.5:16,18,25) a chi a, huleh Ephesite kawmah, ‘Hagau a dimin um un,’ (Eph.5:18) a chi kiit hi. 

Unau simtu deihtahte aw! Tulai gingtute’n Hagau puina, dimna poimoh hina mei hang e maw! I hinkhua a Hagau Siangthou puina, thopna, dimna a um nawn louh jiahin, eimah a Hagau um chu a lungngai a, i sumit va, i mimal hinkhua a gaw a, tahsa miitna in ahung zou a, khovel toh kilimdanna i nei nawn sih uhi. Hujiahin kouhtuam chinteng chu khing leh mialin a vaah thei nawn sih hi. Hagau Siangthou kipuisah nawn louin eimah siamna, pilna leh heetna, haatna, sum leh paai, neih leh lam, politics in kouhtuamte i puita uhi. Apostol Paul leh gingtu masate’n Hagau Siangthou kouhna aw leh puina kichiantah atan bang uh i poimoh mahmah hi. Lalpa’n simtu zousiah hi khovel mial ah Hagau aw neemin hung pui chiatta hen.

'Hi thute sim a zui mi chu a hampha hi.' (Revelation 1:3)

Share: