Manipur violence: Ministry of Home Affairs toh ITLF kimu

Tuni November 09, 2023 zingkal dak 10:30 am vel in Lamka HQ veng Intelligence Bureau (IB) office ah Ministry of Home Affairs, New Delhi akipan Joint Director IB (NE) Dr. Mandeep Singh Tuli toh SoO interlocuter A.K. Mishra ITLF toh kimu uhi. Hiai hun ah Lamka district DC Dharun Kumar, Joint Director IB, Imphal Gnanasambandan leh Asst Director, IB Lamka Soiminthang Thangsing le tel uhi.

 
ITLF in misivuina toh Joint Philanthropic Organisation (JPO) khut a koih ahih man in JPO toh kimu masa uhi. Salphate vuina di toh kisai hun sawt kuamtak genkhawmna nei uhi. Thupukna a laktheihlouh ziak un zing chiang a houlimna sunzom ding uhi. 

Delhi a kipan i gam hong sik Ministry of Home Affairs a heutu tegel ITLF makai ten vaidawnna in puandum silhsak uhi. A paisa August 08 ni a New Delhi a Union Home Minister Amit Shah toh ITLF heutute kihouna etkikna nei khawm uhi. 

Singtanggam a Meitei State Force-te omsaklouh di toh kisai enkikna nei ua, ITLF in State forces te omsaklouh di chih a phut uh himahleh Amit Shah in state tung a thilteng Center in thu neilou ahih man in, na haksatna uh ka theisiam ua, huai ziak in Meitei State force-te amau thuthu in a gamtang theikei ding ua, Central force makaih leh etkaina nuai in a om ding uh ana chi hi. Hiai kithukimna pen tutung Moreh thiltung ah zuih hilou ahih dan ITLF makai ten gen uhi. Hiai toh kisai MHA lam in hihdiklouh leh poi a sak thu uh gen uhi. Maban a hiai bang thil atun nawnlouh na ding a panla uh ahih dan gen ua, Moreh mun a Kuki-Zo police officer makai khat koih sawm ahih dan Dr. Mandeep Singh in gen hi.

CBI leh NIAte gamtatna toh kisai lungkimhuailou leh khentuam nei ahih dan ITLF in genzom ua, Meitei khangnou nih a omna theihlouh sang a huaise zaw Kuki-Zo ten kituak ahih dan gen in David Thiek, Tonsingte nuta, Car Wash ate, Naked Paradete, MLA Vungzagin leh a driverte leh a dangdangte taklang ua, amaute case CBI/NIA in suizuilou ahihdan gen uhi. MHA lam in justice mi teng tung a hong tung ngeingei di ahihdan gen in, a tung hak leh baih deuh om mah leh government akipan justice om veve di ahi chi in, hiai toh kisa CBI leh NIA te nohna pe ding ahih dan gen uhi. 

Imphal jail a tangte toh kisai khakkhiakna di leh transfer di toh kisai ITLF in ngetna a piakte government in sepsuahna a neih khitte tung ah kipahthu gen in, tua Jail a omlaite khahkhiakna leh transfer dite bohzui tou ding in ngetna bawl uhi. 

Imphal valley a Meitei ten galvan tampi a gukkhiak uh toh kisai tomkikna ding in ITLF makai ten nohna nei ua, MHA heututen hiai toh kisai panla gige ahih dan uh gen uhi. Nou le Lamka a na lakte uh na piakkik ding uh chi ua, hiai toh kisai in ITLF makai ten Imphal aten a piak khit vek nini a pekik di ahih dan uh gen uhi. 

IDP te relief di toh kisai government lam a kipan panlak dan ITLF in dong ua, hiai toh kisai in Lamka DC in panlaknate leh maban a kalsuan di dante gen hi. 

AK Mishra kiang a political talks dinmun dotna ITLF in bawl a, aman a genna ah SoO toh talks 2005 akipan kinei pen kisunzom tou zel in, tu tan in SoO agreement toh kisai in Government neukha le tolh lou a, dingkip ahih dan gen hi. Tutung buaina omzoh in SoO group in government kiang ah separate administration definition genchetna bawl ua, demand le pelut khin ahih dan gen hi. Tu dinmun a Government approval ngak ahih dan gen hi. Political solution om theih na dia peaceful environment a om poimohna gen a, violent a hong om chiang a political solution lampi nawngkaisak ahih dan gen in, democratic tak a political demand ngetna bawl zaw ding in hanthawnna bawl hi. Government in Manipur a Kuki-Zo ten Separate administration a neih ding deihsak ahih dan gen kawm in, hichi bang solution om di chiang in a sukkhak om teitei a, hiaite hoihtak a velchet hi a, ngaihtuah ngitnget ngai ahihman in hun lazek ding ahih dan leng gen hi. Bang teng hileh government ah muana nga un la, ahi thei tan separate administration ngetna in violent zang zaw lou a, democratic means of protest nei zaw dia a hon deihsakthu gen hi. 

Sun singpi dawnkhawm in houlimna vantang nei in kikhen uhi. ~ ITLF Media Cell

Share: