KHRIST, EITA KHAMUANNA AHI ~ Pastor Thangdoulal Suantak

I simlei hinkhua zang a, maa-chiang i suanna zeelna uah, hun lungsiat-huai penpen leh i ngaklah ngai mawngmawng louh uh SIHNA in, ei deihna leh hoihsakna bang hilou in, i it leh ngaihte tung a vai a hawm hun a om zeel a, khasiat huaipi bang in a kilang hi. Tualeh mihing kichi pen, Nu sung pan a piangkhia diing a, a kisiamdan a kipan in, Si kiik teitei diing a guatsa or sehsa zong a na hikhin thamta hi. Tuachiin Heb. 9:27 na a, "Tualeh mihing a diing in khatvei sih seh ahi a, tua khit chiang in vaihawmna a om diing hi," a chihbang in, leitung a pian kiik na diing hamphatna piak i hi ngai nawnkei uh hi. Hih pen i mihing hihna ahihbang in, hichih hun ah, mi zousiah i kibang chiat uh hi. Hilezong Khrist a i hing a, Khrist a dia siamthak a omte or Khrist a dia kisiamthakte chituamna pen ahihleh hamphatna ahi a, hamphatna lak a hamphat tungtuanna pen Khrist a i neihna uh ahi.

Johan 14:27 a, "Khamuanna k'ung nutsiat hi, keimah khamuanna k'ung pia hi; leitung in a piak bang in ken nou k'ung piakei, na lungtang uh mangbang sak kei unla, lau zong lausak kei un," chi a Jesu'n a genbang in, Jesu'n van khua leh tui hi diing a, a sisan a a leisate, khamuanglou leh thawmhautak a a om diing uh a lausak a or a phalkei a, tuachiin a tatsate ama'uh bek a nusia lou in, a khamuanna ama'uhte kiang ah a nusiat taktak hi.

Kil. 14:13 ah, "Tu-a pat misi, Toupa a site a hampha uh hi!... Asep gimnate uh a khawlsanta diing uh hi," chi a kigelh thu i muhbang un, Khrist a om mite a diing in, sihna pen tawldamna makaitu a na hizaw hi. Amah i Toupa a diing a hing-le-dam a i om ua, i sih taak ua ahih lezong, Amah a diing mah a si hi diingte i hihziak un, i dam un zong i si un zong Toupa a diing mah i hi uh hi, chih thu in hung khamuan leh deih-huai i sa mahmah uh hi.

Isai 57:1 & 2 i sim leh, "Mi diktat a mangthang or a si a, kuamah in a lungsim un a ngaihtuah kei uh hi; biakna ngaihsakte (zong) lakmang (si) in a om ua, kuamah in a theisiam kei hi. Aziak pen, siatna a kipan in mi diktatte lakmang in a om ua, tuachiin khamuanna ah a lut uh hi; Diktattak a gamtate a lupna tung uah a tawldam diing uh hi," chi in a na kigelh a, dik i sa mahmah uh hi. Mi khat sihna tungtaang thu pen, i mihinpihte uh saang in eite a diing a sil hoih bangkim ngaihtuahtu in a theizaw mahmah hi. Leitung a i thuak siamlouh diingte leh i puak siamlouh diing a kilang silte i thuak hun chiang ua, lupna tung a tawldamtak a ihmute bang a tawldamna hinkhua neih theih na pen i Tanpa Jesu Khrist ah ahi hi. 

Sawltak Paul in mi sisate leh hing-le-dam a na omlaite kituah kiik diingdan, Thesalonika Saptuamte tomkimtak a a na hilhna 1Thes. 4:16-17 ah, "Aziak pen Toupa mahmah kikou aw tawh, vaantungmi tungnung pen aw tawh, tualeh Pasian pengkul ging tawh vaan a kipat hung kumsuk diing ahi a, tualeh Khrist a sisate a thoumasa diing ua; Tuazoh chiang in ei hing a na omlaite huihkhua ah Toupa tuak diing in ama'uh tawh meipi lak ah laktouh in i om diing a, tuachiin tangtawn in Toupa kiang ah i omta diing hi," chi in a na gen hi. Mi sisate leh tuni a ei hing-le-dam a na omlaite pen, i Toupa Pasian ang a thupitak a kituah diing i hihna uh thu in, tuni in i unpi un hung khamuan leh i chi uh ahi.

Hichibang a Pasian vaihawmna i tung ua hung tungte theihsiam haksa i sak hunlai un, i lungsim mawltak, lungleen lungzuan in a luahdimna mun ah Khrist tanchinpha lutsak in, Khrist tanchinpha in i luahdimsak zaw diing uh hi. Aziak pen, Laate gelhpa in, "A mi siangthoute sihna pen, Toupa a diing in a manpha hi," a na chi hi. Manpha i sak mahmahte uh Toupa a diing in a manpha penpente ahi ngaikei a, naa sa a i thuaklahte leh i nin ngoihngoihte, i Toupa'n a it mahmahte a diing in manpha a sazaw hi, chi in theihna gil neizawte'n a gen uh hi. Hih pen Aman hung it zoukei na e, chih lam a hikei hi. I Pa Pasian in Jesu Khrist tungtawn eite a hung itna a tehdan leh eite'n i na tehna dan uh a kibang louh ziak ahi, chih a thak in theisiam zaw ni.

I luankhi nulna, i lungtang a nat mahmahnate leh i lungsung liamna nei bang a i om hun uh leh beidongtak a i om hun chiang un, eite a diing a a Tapa Tang Neihsun hong pia, singlamteh tung a a sih dong a thuak a, nang a diing a a hinna hong pepa ngaihsun in. I Toupa'n a mi siangthoute sihna pen, tawldamna leh haksatna leh thuakgimna hong tung diingte a kipan a a humbitna diing a, a zak a ahihleh, i it leh ngaihte bitna leh tawldamna thuguuk theihpihte hih a, ama'uhte tawldampihtute i hih sam na diing ua i lungsimte uh lemtuak diing in i Toupa'n hung deih hi. I Toupa Pasian leh a vaihawmna i zahtatdan suklatna theihna diing a lampi omsun ahihleh a lamkaihna nuai a khamuangtak a omtheihna diing a, Amah a ki-ngak zohna ahi.

I Toupa Jesu'n "Nang leitung pian masang pek in kei n'ung it hi," chi in Pa itna a na gen hi. Leitung pian masang pek a a na itsa leh a kiang a kilawmtak a na omsa, a tapa Jesu Khrist, eite damna diing a, a hung sawl bgam a ahihleh, tuni in a Kha Siangthou zong, i khamuanna diing un a Tapa Jesu Khrist tungtawn in a hung pia thamtham diing hi, chih muang ngam chiat ni, chi in i ki-ngen zaw uh hi. Pasian itna ziak a hing-le-damte'n Amah Pasian a phual a omte i muang diing uh hi. Ngaktu muanhuai leh lam-etna a hausate, i lawhsam ngaikei diing hi, chih taksanna nei ni.

1 Joh. 3:2-ah, "Ittakte aw, tu in Pasian tate i hi a; tualeh bang chibang in ahia i om diing chih akilang nai tadih kei hi. Hinanleh amah a hung kilak chiang in, amah bang in i om diing uh chih pen i thei uh hi, amah pen a om bangbang a mu diing i hihziak un," chi a, a na kigelhbang in, eite pen Pasian tate i hi ua, i tu dinmun uh theisiam kei lehang zong, Jesu Khrist a hung kilak ni chiang in i theisiam diing ua, hun paisate a i na khakkhiatsate tawh i kituak diing ua, sihna omlouhna mun ah, i Toupa Jesu bang in i om diing uh hi. Hichibang ahihziak tak in ahi, a ngaih a mi siangthoute sihna a manphat diakna…

Pasian ahihleh Misi Pasian a hikei a, Mihing Pasian ahizaw a, tualeh thohkiikna a om taktak diing hi chi a Jesu'n a na gensa pen a taktak in a hung tung diing hi. I masang chiat ua om khovel siatnate, chou in i choukei zong in, i maituah ngeingei diing ua omte i pelmang theikei hi. Hilezong eite pen khovel siatna tawh zawk a kalsuan hamsia leh samsiatnate khu diing a piang i hikei ua, siatna omlouhna gam i ngaklah thei na diing ua hamphatna piak a omte i hizaw uh hi.

Ecc. 7:1 ah, "Kizuutna sathau mantam saang in minpha a hoihzaw a, pianni saang in sihni a hoihzaw hi," a na chi hi. Tuni i thupina ni diing uh leh i zaleen uh a bukimna ni diing uh munpi leh, i hinkhua a Jesu Khrist a hung kilaakna ni diing ngaklahte leh, i sihna uh Toupa ngaih a manpha ahih theih na diing in, i hinkhua uh i puahpha chiat diing uh hi.

Eite a diing in hih thute, Toupa thupha hita hen… Amen!

KHALVONTAWI

Voice of Thangkhal 

Share: