LST 2 Samuel 12:23 na a na kigelh, “Hilezong tu'n amah a sita hi; Bang diing a an ka ngawl diing la? Amah ka hingsak kiik thei diing ama? Amah a hin kiik leh malak in, kei a kiang ah ka pai zawsawp khadiing hi,” a chi hi, chih ahihziak in, hih Bible taang pansiik in i nei diing uh hi.
Nupi khat in a tapa sihna ziak in Pasian a mawhpaih tawntung a, tuachiang in, a tapa pia kiik diing in Pasian ah a phuut a, a thuum tawntung hi. Tuachiang in Pasian in, “Awle, hichibang na hihleh na deih pen k’ung pia diing hi. Hilezong k’ung piak masang a na bawl diing sil khat, na bawl teitei diing a om hi. Tua ahihleh inn zousiah ah pai inla, “Nou innkuan in sihna na tuak-kha samta uai? Thuak mahmah sam in na ki-thei uai? Va-chi kawikawi inla, sihna tuak-kha lou a, thuaklou a om innkuan na muh leh, na ngetna k’ung pia diing hi,” a chi hi.
Tuachiang in hih Nupi nu zong a kipan a, inn zousiah a pai in, a va-dong kawikawi-ta hi. Tuachiin sihna tuak-kha lou leh thuak lou innkuan khat zong a mu zouta kei hi. Hichibang ahihtak in, beidongtak in a hung kilehta a, tuachiin hua hun a kipan in Pasian kiang ah a nguui in a phun nawnkei hi.
Na Nu leh na Pa hiam, na u-le-naute hiam, na khopihte hiam, na ta-le-naute hiam a sih chiang un, ama’uhte suun in na nguui sam hiam? Na it leh ngaite na vuiliam khit chiang in, Vangam leh Hanmual, khoi pen in na lung a leengsak zaw a?
Hih leitung pen, i taangtawn mun diing a hikei chi in i gen i genta ua, tualeh i Permanent Address diing uh ahihleh Vangam ahi chi in zong i na gen mun mahmahta uh hi. Mi innsung a sihna a tun chiang in khamuan thugen bang i siam thei mahmah uh hi.
Hilezong eima innsung a sihna a hong tun taktak chiang in zaw, khamuan thu mawngmawng i gen thei ngaikei ua or i khamuan thugen siamna tengteng a beita, chih diing bangtak in a ki-om hi. Hichibang a mite innsung a khamuan thugen siam a, mahni innsung a khamuanna thu genthei lou gingtu i hih khak uhleh zaw, ki-ngaihtuah vungvung na diing a om in ka thei hi.
Kumpi David bang a gingtu hoihtak leh ginna a dingkip, a tapa a sih nung a, a pai na diing kichiantak a theipa bang gingtu i hi sam deh-aw? A chih huai mahmah mai hi. Vangam kai teitei diing a i taksan mite a sih chiang un, i lungsim lungguuktak ah i na lungdampih sam theita sam deh-aw? Chihbang ngaihsut kham ching mahmah khat ahi.
Vangam i chih uh, ei Khristiante’n i taangtawn mun diing ua i targetna munpi uh a hihleh, hua Vangam a pai kal i ngaklah theih mahmah uh a ngai in ka thei hi, i ngaklah diing mah uh hilou ama?
Hua mun a i paitheihna diing un, SIH a ngai hi. Vangam paina diing a sih a ngaih bang in, Vangam paina diing in SIH a ngai hi. Hichibang ahihziak in leitung mite i si ua, tuni a ei hing-le-dam a omlaite zong i sis am diing uh hi.
Unau Mizote khat thugen, dik ka sak mahmah khat a om hi. Ama’n hibang in a gen hi, “Ka U leh ka Nu an thi ve tawh a. Ka u leh ka nu an thih avangin chunglam khi ka ngailo. Lal Isua Krista ka rin avangin, chu ram chuan ka lung min len È›hin zawk a ni,” a chi hi. Hih pen ei haam a gen diing hile hang hichibang ahi diing; Ka U leh ka Nu a sita uh hi. Ka U leh ka Nu a sih ziak un tunglam ka ngaituam kei hi. Tou Jesu ka ginna ziak in, hua gam in ka lung a leengsakzaw hi; chih diing hi in ka thei hi.
Tualeh aman a gen zomna ah, “Ka ittak Jesu Khrist tenna khua, Vangam in a hung hip hi. Hua gam ah ka hinkhua a nunnuamta diing hi. Kei hung it mahmahtu in, a hong na angpom diing a, huasung ah ka lei kahnate a beita diing hi,” a chi a, a dik mahmah hi.
Aw nang gingtu, nang a diing in sihna kichi bangmahlou ahi. Na ittak Jesu Khrist tawh na kimuh theihna diing ua Pasian sil guat leh lem-gel ahizaw hi. Vangam na kai sam na diing a, na zui ngeingei diing lamlian, Toupa bawlsa ahi.
Sihna a sukbuai Khristian na hi hiam or Sihna in a zoh theihlouh Khristian? Chih pen i ki-dokna uh tawpna hi leh i chi ahi. Toupa’n a thuphate tawh hong ompihta hen. Amen.
.JPG)
No comments:
Post a Comment
Comments not related to the topic will be removed immediately.