MNF seeks Zo People under One Administration

Mizo National Front

General Headquarters

Mizoram : Aizawl

Press Release

ZOFATE RORELNA PAKHAT HNUAIA AWM HI MNF IN CHAMPION PUI KAN TUM BER A NI

~ Tawnluia, MNF Sr. Vice President

Vawiin July ni 28, 2023 (Zirtawpni) hian Mizo Hnam Run chhung inkhawm neih a ni a. He hunah hian MNF Vice President leh Dy.Chief Minister ni bawk, Pu Tawnluia chuan Pu Harry Khiangte lawmluhna leh thusawina a nei.

Pu Tawna chuan, "MNF leh India inremna ziah anih dawn khan, Zofate rorelna pakhat hnuaia awm hi kan khel ber a ni a. Reitak kan khelho hnuah, state ramri tih danglam chungchang hi Indian constitution Article 3-ah tarlan anih tho avangin inremna ziah a ni thei ta a. Zofate rorelna pakhat hnuaia awm hi MNF constitution ah a in ziak a. Tun thlengin India sorkar hi kan la nawr reng a ni, "a ti.

MNF Sr. Vice President chuan, MNF hi Pathian leh kan ram tan titute kan nih avangin kan danglam bik a. Independent kan puan khan Zofate chenna hmun zawng zawng a huam vek a. Zohnahthlak tam tak ram leh hnam tan ke an penchhuak a, mi tam takin nunna hlu tak an chân nghe nghe a ni. Zofate hi pakhat kan nihzia a lang telh telh telh a. Pathianin thisena a phuarkhawmte kan ni. Hmun hrang hrangah awm rih mah ila, thinlungin kan inzawm tlat a. Rorelna pakhat hnuaia kan awm hi MNF chuan a beisei reng a, a dintirh atanga champion pui a tum reng a ni, a ti.

Pu Tawna chuan, party dang chuan development leh thildang chungchang thiam tak takin an sawi mai thei. MNF erawh chuan kan thupui ber chu 'Nationalism' hi a ni a. Hei hi kan danglam bikna a ni. Kan unaute tihduhdahna leh nekchepna, tawrhna hian kan mittui a titla a. Ram leh hnam chhan tur hian tumah kan tlanchhe dawn lo tih a ti lang a. Tuma tirhluih nilo a, hmannia khati zat kan pungkhawm thei khan hnam thila kan tanrual zia a tarlang chiang hle a ni, a ti bawk.

Lawmluh thar Pu Harry Khiangte pawhin MNF a zawm chhan sawiin, "MNF tih leh Mizo National tih hian min hip nghal em em a. 'Pathian leh kan ram tan' tih hi a ropui ka ti a. MNF sorkar hnuaia kawngtha leh kawngthar sial mek te, eirawngbawlna gas hnianghnar te, raltlante dawnsawn an nihdan te, ramri chungchanga hmalakna leh hun khirh tak kara sorkar hmalaknate a ropui ka ti tak zet a ni, "a ti a.

Motor khalhtu leh handy-man te intihbuai rengna motor-a chuan ve arem ka ti lo a. Thawmhnaw thar kan ti a, a hatu thar ve silo chu kan chhe tho dawn a. Mahni pawl pawh enkawl fel theilo chuan tha taka ram an enkawl a beisei awm loh a. Lapawchini ang maiin a tak eitur awm mumal lo te chu zawm ve chi a ni lo. Rahula a hul rih bawk nen, Nationalist party MNF hi lawm takin ka zawm a ni, a ti bawk.

Mizo Hnam Run chhung inkhawm hi Pu C. Lalrammawia, Adviser, MNF Gen. Hqrs./Chairman, ZOHANCO chuan kaihruaiin, Pu John Zosangliana, Secretary, MNF Gen. Hqrs. AMC Corporator ni bawk chuan hunserh a hmang bawk.

Sd/-
(PETER CHHANGTE)
Jt. Secretary
Media & Publicity Department
Mizo National Front
Memo No.MNF/Media/04/2023/810
Dt.28. 07. 2023 

Share: