Enok Tanchin: PASIAN TAWH ZAWKKHAWMNA ~ Thangdoulal Suantak

Pic: Rev. Thangdoulal

Genesis 5:18,21-24: “Jared in kum za leh sawmguk leh nih a chinkhit in, Enok kichi tapa khat a nei hi. Enok in kum sawmguk leh nga a chinkhit in, Methuselah kichi tapa khat a nei hi. Methuselah piankhit a kipan in kum za thum sung Enok Pasian tawh a zawkkhawm a, tapate leh tanute a neihbeh lai hi. Tuachiin Enok damsung teng kum za thum leh sawmguk leh nga hi. Enok Pasian tawh a zawkkhawm a a om laitak in, Pasian in amah a lamang a, amah a om nawnta kei hi.”

                                
Bible-in Pasian tawh zawk a hinkhua zang a agen mi nih a om a, ama’uhte ahihleh Enok leh Noa ahi. Tualeh tutung in Enok tanchin a kipan in Pasian tawh zawkkhawm a hinkhua zakh diingdan i zilkhiat sawm diing uh hi.

Enok Pianna Khanggui

Thukhun Lui hunlai in Enok kichi mi nih a na om hi. Khat pen Kaina/ Cain tapa Enok ahi. Amah tanchin gen-le-sak a tamkei a, a pian thu leh tapa Irada a nei thu chihlouh a tanchin muh diing a omkei hi. Tualeh Gen 4.17,18-na dungzui in, a Pa Kaina in khua a saat a, a kho-saat pen a tapa min tap in, a “Enok” a chi hi, chih muhtheih in a om hi. Enok dang khat ahihleh tutung a a tanchin i suut/gen sawm pen uh ahi. Amah pen Adm a kipan a a sagihna ahi a, Jered tapa hi. Tualeh a Pa Jered pen leitung mihingte lak a na damsawt penpa baan chet a damsawtpa ahi a, a damsung kum 962 ahi hi. Tualeh Enok tapa Mathusel ahi a, amah pen leitung a mihingte lak a damsawt penpenpa ahi a, a damsung kum 969 ahi hi.

Enok Min Khiatna

Enok kichi kammal pen Hebrai haam ahi a, ei haam in a khiatna chi-nih a om hi. Khatna ahihleh “Aapkhia/ laan (dedicate) chihna ahi a, a dang khat pen ahihleh, “Sila, zuitu” chihna ahi a, a min khiatna nihte ama hinkhua ah atak a muhtheih diing in a tung taktak hi, chi a muhtheih diing in zong a om hi. Aziak ahihleh amah pen, Pasian kiang a ki-aap/kilaan mi ahi a, Pasian sila leh zuitu diktak zong ahi hi. Hichibang ahihlai in Enok tanchin Bible ah muh diing a tamkei a, amah tanchin (biography) i muhtheihna uh omsun ahihleh Gen 5.18, 21-24 chiangtan ahi. Hebrai Bible a a tamthei bang pen a a kigenna ah zong, thumal 51 bek ahi hi. Tom mahmah lezong ama tanchin pen, a ngaihnop huai mahmah mai hi.

Enok Tanchin Tuam Khat

Hebrai 11:5-na dungzui in Hebrai Laikhak gelhtu in, Enok ahihleh sihna theilou diing a lakmang ahihna thu pen, Pasian a a ginna ziak a hung om ahihdan a gen hi. Tualeh Juda 14-15-na dungzui in, Juda laikhak ah Juda genkholhna thu i muthei uh hi. Tualeh Juda laikhak a Enok genkholhna thute Bible dang a a kilat louh ziak in, hih genkholhna thute khoi a hung kipan ahia, i chi maithei diing uh hi. Bible ah pomlouh laibu (canonical hilou a kikoih laibu) bangzah hiamte, Pseudepigrapha a na chih uh a om hi. Hih Pseudepigrapha laibute lak ah Enok laigelh dan a ki-ngaihsun bu nih a om hi.  A khatna ahihleh bung 108 omna laibu ahi a, a nihna pen in laibu dangte mahbang in peek 170 vel a pha hi, chi a gen in a om hi.

Enok Hun Nu-nung

Enok hun nu-nung pen, Gen 5. 24-na a i muh uh, “Enok Pasian tawh a zawkkhawm a, tuachi a Enok Pasian tawh zawkkhawm a a om laitak in, Pasian in amah a lamang a, amah a om nawnta kei hi.” Chih ahi. Hih thu Heb 11.5na bullam a Hebrai laikhak gelhtu in a gensawnna ah, “Ginna ziak in Enok sihna mulou diing in lakmang in a om” achi hi. Tualeh a kigen sawn zeelna ah, Enok pen silou a, a damlaipi a Pasian in a lakmang in i gen uh hi. Ahi’n kha-lam pumpi i neihna diing un sa-lam pumpi i nusiat uh a poimawh hi. Hichibang ahihtaak leh, Hebrai laikhak gelhtu in a gen ut pipen bang ahi deh-aw? Chih i ngaihsutna uah a hong kilang hi. Laigelhtu khenkhat in, “Sihna theilou a lakmang” chih in a gen ut pen ahihleh, sih-kuan natna theilou leh thuaklou a Pasian in a suklamdang chihna ahi,” a chi uh hi. Eden khelhna a kipan a mihingte a diing a lungkham-huai pen leh lungdon huai pen ahihleh SIHNA ahi. Hichibang ahihlai in, Enok pen, Pasian tawh zawkkhawm a hinkhua zangh mi khat ahihziak in, mihingte huphulh SIH haksatna pen thuaklou in Pasian in a lamangta chihna zong a hikha thei diing hi. Enok a si mawngmawng kei, i chihmawk ua ahihleh, Bible taang dangte tawh genlem a ngaihna diing tampi a omkha diing hi.

Tuachiang in Gen. 5:24 a Enok hun nu-nung kigenna mah ah, “Amah a om nawnta kei hi,” chih kammal pen, thakhat a mangthang, muh diing om nawnlou genna ahi. Hih pen Hebrai ah, ‘Si’ chih mawk saang a pumpelhna kammal ahizaw hi. Eite’n zong i innkuante, i U i naute hiam in a hong sihsan chiang ua, ‘Ka nau or ittak a om nawn takei, chih leh Pasian in a lata,’ chihte i na zakh uh tawh kibang ahi, chi a gen zong mi a om hi. Tualeh Enok tanchin ah gen diing tampi om mahleh ‘Pasian tawh a zawkkhawm’ chih pen a thupi pen a suak hi. Enok tanchian a theihtuak leh chiamteh tham chiang mahmah khat ahihleh, a tapa Mathusel a pian nung kum 300 sung viveng Pasian tawh zawkkhawmna hun a zangh hi, chih Bible tungtawn in i muthei uh hi. Hih pen a damsung kum 365 pan a suut in 82% vel ahi diing hi. Hichibang a mi lamdangtak ahihziak in Pasian mi taangpite thuak zeel, SIHNA haksatna leh thuakgimnate thuak lou in Pasian in thupina ah a lalutta hi, chi in theihna gil neizawte’n a gen uh hi.

Pasian tawh Zawkkhawmna Hinkhua Omdan

“Enok Pasian tawh a zawkkhawm a” chih kammal in a gen ut taktak pen ahihleh “Paikhawm/ vaakkhawm/ zawkkhawm chihna ahi hi. Taanglai in Eden huan ah, nitaaklam ni neem hun chiang in, Adam leh Evi tawh vaakhawm a kithuahkhawm diing in Pasian vahawh zeel hih tuak hi. Hichiang ahihlai in Adam leh Evi pen, Eden huan sung a vaak, Pasian in amuh khak diing laau in a na kibu uh hi, chih Gen. 3:8 na ah i muthei uh hi. Hichibang a Pasian in Adam leh Evi a vaakkhawmpih/ a zawkkhawmpih diing a lunggulhna pen, a hihtheih takei hi. Hitalezong Pasian in Enok a vaakkhawmpih/ a zawkkhawmpih thei hi. Tualeh a khaw-nung in Noa zong Pasian tawh zawkkhawm/ paikhawm hi, chih thu Gen. 6:9-na ah i muthei ua, hilezong bangtanvei e, chih pen i theithei kei uh hi. Tualeh Noa hun nu-nunglam a a zukhamdante i et leh, Pasian tawh sawtpi a zawkkhawm tuakkei uh, chih Gen. 9:20-na tungtawn in i muthei uh hi.

Israel nam pate (Abraham, Isak leh Jakob) tanchin i et leh, Pasian mai a om diing a chihte ahi taangpi uh, chih Gen. 17:1; 24:40; 48:15 nate tungtawn in a muhtheuh hi. Tualeh Kamsaangte zong, KJV Bible in ‘Walked with me in peace’ chi a Malaki 2:6-na a na kigelh dungzui in, khamuangtak a Pasian tawh kalsuankhawm diing a lam-ette ahi uh hi.

Pasian tawh Zawkkhawmna Sung a Sil Omte

Pasian tawh zawkkhawmna diing pen, Pasian kiang a i hihna leh hinkhua zousiah ki-aapkhiatna ahi, chi lehang i genkhial diing un a gintaak huaikei hi. Enok min khiatna i na gensa mahbang un, amin khiatna khat ahihleh aapkhia or kilaan hiam laankhia chihna a na hihbang in, Enok in Pasian kiang ah a hinkhua pumpi a aapkhia or a laankhia a, hih pen Pasian lunggulh leh deihlam zong ahi hi. Pasian tawh i zawkkhawmna diing un Pasian kiang a i hinkhua pumpi uh i piakkhiat/ aapkhiat (surrender) uh a ngai hi. Tualeh Pasian tawh zawkkhawmna diing in Amah tawh hoihtak a i ki-lep uh a ngai hi, chih a kichian mahmah hi. Tualeh Amos 3:3 ah “Kithukimna om masalou in mi nih kituaktak in a zawkkhawm thei diing uh ama?” chih i muhna ua kipan in, Enok leh Pasian kikaal pen a kilem hoih mahmah chih a kichian hi. Adam leh Evi in Pasian a na kibuksantaak ziak un, Pasian in a vaakkhawmpih theikei chih zong i thei chiat uh hi.

Pasian tawh zawkkhawmna diing leh vaakkhawmna diing in khovel dan a hinna tawh kikhen zong a poimawh mahmah hi. Leitung nopsakna a kibual kawmkawm in Pasian tawh a zawkkhawm theihkei hi. Lev. 19:2 1Pet 1:16-nate’n a genbang in, Pasian in “Na siangthou diing uh ahi, Kei Toupa na Pasian uh ka siangthou hi,” a hong chi hi. Sawltaak Paul in zong, “Tunglam a sil omte ah na lungsim uh nga unla, leitung a sil omte ah hilou in,” chi in Kol. 3:2 na ah a na gen hi.

Jesu Khrist sinsakna i et leh, Pasian tawh zawkkhawmna diing in thuak zek a ngai hi. Luke 9:23 na a Jesu’n a hung thuhilhna ah, “Mi khatpeuh in ka nung a zuih nuam leh amah kimangngilh in nisial a akross pua in hung zui hen,” a chi a, Mt. 5:11 ah “Mi'n Kei ziak a a hung housiat ua, a hung gawt ua zuau a gilou chiteng a a hung heek hun chiang un na hampha uh hi,” a chihnate tungtawn in Pasian tawh zawkkhawmna diing in thuak zek a ngai hi chih a kichian mahmah hi. Hichibang ahihziak in Pasian tawh zawkkhawmna ah haksatna zong om chih a kichian sem hi.

Pasian tawh Zawkkhawm Diingdan

Pasian tawh zawkkhawmna pen ginna a kalsuanna ahi. Gal. 3:26 na ah Paul in, “Jesu Khrist a i ginna ziak ua Pasian tate i hi uh,” a chi a, tualeh Eph 2:8-9 ah “Hehpihna ziak a ginna tungtawn a hutdam na hi ua, na sil bawlte uh ziak a hikei hi; Pasian sil thawnpiak ahi. 9 Nasep ziak ahikei, a tuachih keileh mi'n a kisaktheihpih khadiing uh hi,” chi in zong a hung hilh hi. Tuachiang in Hebrei laikhak gelhtu in zong, Heb. 11:6 ah: “Ginna lou in amah kipak-saktheih gual ahikei hi, aziak kuahileh Pasian kiang a hung pai in amah a om chih leh, amah guntuhtak a zong mite kiang a nuamman piatu ahi chih a gintat diing ahi,” chi in ginna poimawhdan a na gen hi.

Pasian tawh zawkkhawmna hinkhua ahihleh thutak kalsuanpihna hinkhua ahi. I Toupa Jesu’n “Keimah lampi leh, thutak leh, hinna ka hi; keimah a pailou kuamah Pa kiang a tungthei kei hi,” chi in Johan 14:6-na ah a na gen a, tualeh Johan 3-na taang 4 ah zong, “Ka tate thutak ah a om chih ka zaak kan a kipahna lianzaw ka neikei hi,” a na chihnate tungtawn in Pasian tawhkhawmna hinkhua pen Thutak a hinna hinkhua ahi chih a kichian mahmah hi.

Pasian tawh zawkkhawmna hinkhua pen Kha a kalsuanna hinkhua ahi. Sawltak Paul in Gal. 5:16 ah “Kha ah om un, tuahileh taksa utna na tangtungsak kei diing uh hi,” chi in a hung hilh hi. Tualeh hisung a Kha a om chih in a gen ut pen ahihleh Kha a kalsuanna ahi hi.

Pasian tawh zawkkhawmna diing in THU-MAN a poimawh mahmah hi. Thu-mangloute Pasian tawh a zawkkhawm theikei diing hi. Ngaihsun in, Enok min khiatna dasng khat pen ahihleh ‘Sila, Zuitu’ chihna ahi. Sila leh Zuitu hihna ah thumanna a poimawh mahmah hi. Pasian thu-mangloute Pasian tawh a zawkkhawm thei ngaikei diing hi.

Ettontaak Enok

Enok tanchin a kilang diak pen ahihleh Pasian tawh a zawkkhawmna ahi. Tualeh Enok pian masang pek a kipan in Set tapa Enosh pian hunlai a kipan in TOUPA min a na louta uh chih Gen. 4:26 tungtawn in i muthei uh hi. Hilezong Pasian tawh zawkkhawm masa pen ahihleh Enok ahi hi. Bible a i muhdan un, Enok in a tapa Mathusel a neih nung kum 300 sung Pasian tawh a zawkkhawm achi a, tualeh hih in a hung ngauhtuahsak khat ahihleh, Enok in kum 65 ahih tan leh tapa Mathusel a neih masang sungteng, Pasian tawh zawkkhawm lou ahi deh-aw? Tapa a neih masang a bangbang bawl a khosa a deh-aw? chihte Bible in a genkei hi. Hilezong thanghuaitak a hinkhua a zak diing a gintat huai kei a, tualeh a tapa neih a kipan in Pasian tawh a kizopna a detsak semsem zaw a hikha diing hi.

Enok Tanchin Pan a Zil Diing Poimawhte

1.      Enok in Tapa a neih a kipan in Pasian tawh a kizopna a kipsak deuhdeuh hi.

2.      Naupanlai a kipan a i hinkhua pumpi uh Pasian pia a, Amah a diing a hinkhua zang diingte i hi uh hi. Hilezong hih pen mi tamtakte’n i zuitheikei ua, a dahhuaipi a suak hi.

3.      Innkuan dinkhia a, ta-le-nau i neih ua kipan beek in Pasian tawh i kizopna i khauhsak deuh theita sam diam?

4.      Enok hinkhua i et leh, a ta neih a kipan in kum 300 sung Pasian tawh a zawkkhawm hi. Hih pen a damsung kum 365 pan a suut in 82% vel ahi diing hi chi in zong i na genkhinta uh hi. Eite’n i damlai hun zakna uah, zaa zel a suut in percent bangzah Pasian tawh i zangkhawm ua le?

5.      Pasian tawh zawkkhawm mi khat hihna diing in i damlai hun zakna uah za a 82% pen Pasian tawh zakkhawm ngai ahi chih Enok pan in i muthei uh hi. Hichibang ahihtaak leh, Pasian tawh zawkkhawm mi khat hih sam diing tupna leh lunggulhna na neih leh neihlouhna ah na Khristian hihna kichiantak in a kilangkhia diing hi.

A tawpna ah, Enok Pasian tawh a zawkkhawm a a om laitak in, Pasian in amah a lamang a, amah a om nawnta kei hi, chi a Bible a i muhbang un, Pasian tawh zawkkhawm a, Pasian in Amah a diing a alakte hisam diing in, i Toupa Pasian in a thupha tawh hong ompihta hen. Amen

-:(o):-

 

Share: