TUUM NIPI/PALM SUNDAY ~ Rev. S. Thangnou

(Matt. 21:1-11; Mk. 11:1-11; Lk. 19:28-40; Jn.12:12-19)

Kristian biakna sung ah theih ding ni poimoh tampi om hi. Tuate lakah Palm Sunday/Tuum Nipi i chih kumteng a ih zakden khat ahi. TUUM NIPI ni leh amai a nipi ni kikal pen, “Gimthuakna Nipi kal (Passion Week)” kichi hi. Palm Sunday ichih pen Toupa Jesu Sabiltung nou tung a tuang in gualzou a Jerusalem a alut ni ahi. Gospel 4-te sung ah a kibang lou in gen dan tuamtuam om a, tamlou en ni.

Matthai, Marka, Luka in nungjuite nih masawl thu gen a, Johan in gen lou hi. Matthai bek in Sabiltung nuta thu a gen a, Marka Luka Johan in Sabiltung nou thu bek gen hi. Matthai, Marka Luka in ‘sut unla hung kai un’ a chi hi. “A paina ding uh puan phahsak,” Matthai Marka Luka in chi a, Marka in “sawlpang phahsak” zong achi hi. Johan in “Tuum nahte tawi” achi hi. “Hosanna” a chih dan uh kibanglou hi. A muh dan leh a theih dan bang chiat a agelh uh ahi a, agen dan uh kibang kei sim leh zong, a gennop pen ‘Jesu Sabiltung nou Tung a tuang in gualzou in Jerusalem ah alut hi’, chih thu hi. Silpoimoh tuamtuam te ngaihdan tamlou i en suk ding. 

Sabiltung nou kizatna hang: Thukhun lui sung a agensa tangtunna ahi. Zekaria 9:9 “Aw Zion tanu nakpitak in nuam in, Jerusalem tanu kikou in, ngai in na kumpipa na kiang ah hung hi, a diktat a, hutdamna a nei, kingainiamtak in Sabiltungte tuanngei nailouh tung ah tuang in, I Bible in Sabiltung tuang ngei nai lou, gansa hakkol kibulhsak nailoute sa siangthou a chihte ahi a, Toupa a ding a siang ahi chi hi (Numbers 19:2). 

Lemna ni a zat:  Tanglai gal a sim chiang un sakol hatte a zang ua, kumpi khat leh khat, gam khat leh khat kilemna a bawl ding chiang un Sabiltung Lokael kichi te tung ah tuang uhi. Jesu leh Sabiltung in kilemna, kingainiamna a ensak tuak tuak uhi. 

Puanphahsak:  Thukhun lui hun in Jehu Israelte Kumpipa ahih in apuante uh asuah souhsouh ua, leilawn tung ah aphahsak uhi (2 Kumpipate 9:13). Toupa Jesu paina ding puanphah a om ua, sawlpang phah zong om uhi. Ahihtheih zahzah a, lungsim thalopna toh kiphaltak a siltuakte leh Jesu pahtawi a, a kikou uh athupi pen ahi.

Hosanna: Hebrew apan kila khia, Latin leh Greek ham in kizang hi, “tun kou hung hundam in” chihna hi. Tua hun lai in biakna leh phatna genna zong ahi. 

Tuumnah tawi in:  Tuum sing a hing gige khat ahi a, kilemna, nopna, thumanna lam ah kizang hi. Midiktatte Tuum bang a pha zeizoi leh, cedar sing bang a hing a khang huthut ding in Bible in a gen hi (Sam 92:12). 

Topa Jesu i ki-uksak leh a gilou pen leh khel pen te zong Sabiltung le mahmah bang in ki ngiamkhiakna, lemna, nopna hung om ding hi. Juda khenkhat kikhua misak pawl bang a Jesu gal-et thoh pawl te hi lou a, a lungdampih a, anung leh mai a pahtawi a kikoute hi jaw ding in Toupa'n  khalam  lungdamna hung tunta hen chih i kideihsak uhi.

Share: