HAUSA NAPI A GENTHEI VEVE ~ Rev. S. Thangnou

Jesu'n a kiang ah, “Hoih bukim a om na ut leh, pai inla na neih juak inla mijawngte kiang ah pia in, tuachiin van ah gou na nei ding; tuakhit chiang in hung pai inla hung jui in” achi hi. Hinanleh tangval pa'n hua thu a zak tak in, lungkham takin a pai mangta hi, sil tampi nei ahihjiak in (Matt.19:21 & 22).

Leitung ah sil zousiah akibang lou tampen ahih dungzui in hauhsak dan, gentheih dan, nopsak dan, lungkim dan alam tuam chiat om jel hi. Khantawn hinna a zong tangval hausa Jesu kiang hung pai pa'n biakna dan zousiah a zuikim a, hinanleh a khamuang thei kei hi. Jesu kiang hung pai a, Jesu'n hoih bukim na ut leh na neihsa teng juak inla mizawngte kiang ah pia in, a chi hi. Himahleh amahpa in a neihsa teng tua bang ding in phallou a hihman in lunggim takin a pai mangta hi.

Khantawn hinna leh a hauhsakna a tehkak a, khovel hauhsakna leh nopsakna ten a lungsim zou zaw tham ahihman in, tuate van gou sa’ng in a teel zawta hi. Taksa lam a mihausa hinapi in, kha lam ah mi genthei pen a suakta mai hi. Tangval hausa in Khantawn hinna neihna ding leh hoih bukim suak na ding a, Jesu kiang a dok hang in a thu mang tuamlou in a deihna bang in om veve hi. Hauhsakna in lungmuang sak theilou ahihman in a gen theipen, leh vangsia pen suakta mai hi.

Bible in a hinna ding ngaihsut mite mipil a chi a, amah mimaw asuak himawk hi. Mihausa tamzawte amah bang kitam mahmah lai ding in gintat huai hi. Tuajiak in suakta hinapi a koltang hi veve ding in Jesu'n hong phal lou hi, khovel pan suahtak i sawm ding uhi. Genthei lou a hoih bukim leh asuakta hi ding in, Toupa thu mah tel zaw ni. I khantawn hinna ding uh thupi a koih in sildang teng sang in i tel zaw ding uhi. Toupa'n telsiamna hung pia ta hen.

***19032023***

 

 

Share: