Gaakden hilou kilhden hizaw ~ Rev. S. Thangnou

"Amah jiakin leitung kei ding in kilhden ahita a, tualeh kei leitung a ding in a si ka hita hi (Gal.6:14)."

Nidang lai pan in huandai/gawl a kibawl chiang in gamkhau or naang toh akigak hi. Tomkhat lou in atan/kiphel pai hi. Akip deuh na dingte inkilh toh kikhen a, a muat mangtan omden hi.

Kross tung a i Toupa Jesu'n leitung mite tatna in asih dong in khau a kigak thoh hilou in, inkilh toh kilhden in om hi. Kross tung a kilhden a omte peuhmah akhutte leh a kengte uh tang thei nawn
lou in, a kihei thei kei ua, anunglam zong a en thei kei uhi. Kross tung pan kumkhia theinawnlou in a kikhai den ua, a si den uhi. Sawltak Paul in kilhden hinkhua kichian tak aneih dan in imu thei uhi. Khovel adia sita ahihman in amah akipan khovel in bang mah bawlthei a nei nawn kei hi. Taksa lam silte a ding in a hing thei nawn kei hi. Kilhdenna chiantak leh diktak a om ahihman in, leitung nnate ah asi ahi.

Tulai in Kristian hinkhua ah atamjaw kilhden hinkhua kichian tak  neilou kitam hi. Kilhden hinkhua hilou in gakden hinkhua a kinei tamjawk jiak in, agakna khaute tan paipai a, leitung siatna lam a hing kik toh ki bang a om in akilang thei jel  in om uhi.

I ginna uh toh kituak lou a khovel sil tampite sihpih lou a, tuate lam a awn jel in, kilawm lou pi a hindan, tep leh muam, nekna dawnna, hazatna ,khemna, siatna, taksa susiathei, nasak thei, tuamtuamte i sem kha jel hi. Tuate ahi khelhna i thah zohlouh ua, i hinsak jel ziak ua kilhden a om hinapi gak thoh bang a  aselam a hing a i om jel na uh. I Bible in "Eite khelhna lam a si a, diktatna lam a i hin theihna dingin Aman ama pumpi ah ikhelhna te kross dawn ah a pua...(1 Pet 2:24)" achi hi. I kelhnate sihsakna Aman hong bawl sak hi a, eite a gumtu or a neitu in pang ni. Mihing lui teng beina leh nang leh kei khelhnate kilhdenna ahi.

Hih kilhden hinkhua kichi mihing deihna leh phatuam ngaihna a kinei thei mawk hilou in, Khasiangthou thopna or pui a om khak a ngai hi. Ahang in Khasiangthou in apui gingtu in taksa deihdan silte a sihsan thei jiak in. Hibang mite in khovel in a suksiat theihlouh hinna a nei ua, lei a khosa hina pi in van lam toh kizom hinkhua amang ua, khovel lunggulhna te a nei kei uhi. Tua hi kilhden a om hinkhua i chih uleh hin dan thak a kihei lamdanna ahi.

--260323--

Share: