Rev Dr GK Samte toh houlimna

Zogam Today Exclusive Interview

Rev Dr GK Samte toh houlimna

PASIAN nasem a kidiang kawi kawi, Meitei gam, Kawl gam-Vai gam, leh mun tuom tuom banah Delhi tuolpi a Pasian nasem, ham-le-paau tasam lou, singtang khuo a khanglian, laphuo siam Pastor Ginkhothang Samte (GK Samte) khu’n Kumlui December in Honorary Doctorate Degree ana saang hi. Tam toh kisai in Zogam Today Joint Editor & Khalvontawi Online Editor Bruce K. Thangkhal (BD-II student, United Theological College, Bangalore) leh Rev Dr GK Samte kihoulimna tam a nuoi a bang in a hing kitahlang hi.

 ZT: Pastor-pu interview theidia hun nang pieh manin lungdam ung.

GS: Kei zong tambang ka mipi kasapite hing ngaisahna leh deithaw homthaw ka tanna ziehin tunia keitoh tongkup houlung kup ding vai hing guon sah Zogam Today lamkaite tung ah ka kipah mama hi. 

ZT: December 2022 in lukhuneelkai (honorary degree) na khukna lim khat kana mu a, tua Doctorate Degree toh kisai themkhat nung kum thei diai?

GS: Ah, tami Doctorate Degree nga ding keizong ka ngaisun kha ngaisih, kisam leh deihuoi in zong kana geel kha sih hi. Nikhat (ka tapa) Pa Tuanzakap Samte @Benjamin Samte, a Bible sim ban zop dinga Apostolic Biblical Theological College & Seminary, New Delhi a kava haw uleh Rev Dr P Mangte, Founder & Principal in ahing houpi in; nang na hiei mah ka u, tu-le-tu a ZCF Delhi a senior pastor asem Rev JK Mangte in na tungtang Pasian gam nna nasep dante ahing gen kha hi. Tuachi'n ka na geelgeela, Pasian gam nna nasepna toh kisai in zatatna theipina kang bawl nuam uhi, nasan theiding leh chi'n ang na houlimpi hi. Hun sawt kuom tah ka kingaisun nua in, amaute hing offer dungzui in Doctorate Degree in Ministry saan ding ka thukimpi hi. Tam Degree hing kipie pen amaute hing genpi dan in “Pilna siemna leh koitunga guoltung tuonna zieh hilou in Pasian gam nasepna theipina leh kipahpina etsahna zaw ahi” achi uhi. Pasian lungsietna toh tam Honorary Doctorate Degree khu December 15, 2022 ni’a Apostolic Biblical Theological College & Seminary, New Delhi te Graduation Service anei na ua ahing lat uh ahi. 

ZT: Hih Honorary Doctorate Degree na mu, Zogam Today editorial board in zong ikipakpih mahmah hi.

GS: Tambang ka kipahna uh hing kipahpi ding ka mipi ka sapite leh na tungah ka kipahna uh alien mama hi.

ZT: Na tanchin thei ut huai hive aw, them khat nung gen thei diei?

GS: Kei ka min tah kapu kapapa Selgin kitap Ginkhothang ahi a, kapa Vungtuan Samte, kanu min ahileh Goniang kapu Khamkap Phiamphu unumei thumte laha amilai ahi. Ka pianna khua Mata-Mualtam ahi a, kapa Vungtuan zong Mualtam khosatpi khat anahi hi. Mualtam ah kazi neih kata masa neihtan ka teng ua, kum 1976 in Dam hing kichin ding ziehin louma ding khuolna'n kapa upa hausatna khuo Kuvan (BPO Sangaikot, Ccpur) ah ka pemsan uhi. Kazi Lunkhannuam Samte (Nuomnu) ahileh Saiboh khuo tuolkuon ahi a, kum 1974 January 24 in (L) Rev Khupdoukham khutah Pasian dansiengthou in kitenna ka nei uhi. Pasian guolzawlna toh ta pasal 2 leh numei 3 ka nei ua, tuu 15 leh tusawn khat ka mu ta uhi. 

ZT: Na neulai in bang school a kaai? Pawl bangzat tan na zaw?

GS: Class Beginner apat Class VIII (1967) tan Convention Mission School, Gelzang ah kana sim a, kum 1969-70 sung Sielmat Christian High School ah Class IX leh X kana sim hi. Kum 1970 in Mata Vungzagen High School apat Gauhati University nuai ah Class X ka zou a, kum 1971 in PUC (Pre-University Course) ahileh CCPUR College ah kana zou hi. Tualeh kum 1972-74 sung BA kana sim a, innsung hasatna ziehin BA final exam kana pethei tasih hi. 

ZT: Na neulai in banglam nana tup pen aa?

GK: Ka neulai in Doctor hiding leh Engineer hiding kana tup pen ahi. Hinanleh Class X Maths leh Science ah ka mark atawm ziehin ka tupna ka peipi thei tasih hi. Hinanleh, kum 1969 August 28 a kang pientha chieng, Pasian nasep ding utpen in kang neizaw ta hi. 

ZT: Bang a chileh Bible lam lunglut?

GK: Kum 1969 kuma kang pientha apat Pasian thugen ding ka ut paia, Kawlgam tanpha ah Khantanhoi gen in kal kava suon hi. Damsung nnasep ding ahi chi ahizieh in Pasianthu Bible zilding ka hing lunglutta mama mai a, tuachi'n North East India Baptist Bible College (NEIBBC), Silchar Assam ah 1983-86 sung Bachelor of Theology (BTh) ka zil hi. Tam ka kaina NEIBBC ahileh 1976 kum a kiphut ahi. 

ZT: Bang saptuam a khanglian?

GK: Ka khothei apat kum 15 ka phah tan Convention hattuom (tulaia EBCC) ah kana khang khie hi. Mualtam a MGP ang kiphu chieng Presbyterian ah um in, ka khan khiehna hattuom ang suo hi.

 ZT: Bible na zilzaw in bang nasem masapen?

GK: Ka Bible zilzaw in, kum 1987-96 sung Fellowship of Evangelical Baptist Churches (FEBC) ah ka sem hi. Kum 1988 in FEBC in Ordination ang pie ua, 1990-96 sung Meitei Gam ah missionary in Kakching Khunou, Thoubal District ah ka sem hi. 1997-2000 sung Manipur Eastern Presbytery (MEP) sungah Pro-Pastor in ka sem a, 2002-2005 sung Shillong ZWS ah Pastor in kasem hi. Kum 2005-2010 sung Zomi Christian Fellowship (ZCF) Delhi ah Pastor ka sem hi. Kum 2011 apat tuni tan Zogam Revival Crusaders ministry ka buoipi hi. 

ZT: Pastor nasep sung in bang na vei deuh pen ei?

GK: Hagau a pienthana dihtah ka miten anei ding uh ka vei pen hi. 

ZT: Pastor adi'a sil haksa nasak na tuoh a umleh nang kum thei diei?

GK: Pasian gam nna ka sep chillai in Saiboh Mission JB School (MEP) ah Headmaster in kum 1970-76 sung hasum (monthly salary) Rs 150 (one fifty) law in ka sem hi. Hinanleh law khu a hun a hing pieh theilou chieng un, kumtawp khawmpi a pieh ding in ahing chiem uhi. Khawmpi a hing tun in, voh khat kithat in semtute ahing nesah ua, a kinezaw in "tu'a sa kine pen semtute law kipe zoulou teng, na law uh na phumna (maimang, piak nawnlou ding) uh ahi" ang chi khum uhi. Tua lai a semtu ka theikhak sunte ahileh Evan Khamchinhang (S. Munhoih) a sepna mun Gangpimuol, Pastor Kamkhozam (phamta) asepna mun Tuining, ban ah Evangelist-teacher Khaizakap (phamta) asepna mun Chandel. Pastor in 1996-2000 sung Rs 2000 (two thousand) law ding in ka sem a, law a hunhun a ang kipieh theilou ziehin naupang (ka tate) school kaite ahun taha admission kibawl theilou, exam ding chieng a admit card zong a hun a kila theilou chieng in school principal-te kunga lawsaan chieng a pieh di'n kava chiem hi. Hinanleh a kichiem hun a ka pieh zawlou chieng in pastor zuou gen akisuo zel hi. Tamte khu a hunlai adia ka siltuo a nuam khollou khenkhat ahi. Hinanleh, koima tungah ka khasie sih.

 ZT: Zogam Revival Crusaders bangkum a kiphut, bang lam a tup?

GK: Pastor pension umlou a ka retired kum 2010 Manipur South District Pasianthu hing lut kum 100 chinna Gospel Centenary Delhi ah Pastor Fellowship lamkaina toh nasatah in kilawm hi. Khum ni mama in Zogam ah hagaua Halthana dihtah nidanglaia Sapgam lama Gambup huopa chi-le-sa ha-le-pau kikhenloua natung zel pen tuni tan in natung nailou hi. Khumbang gambup mibup huop halthana, Revivalist halthana thugentu Zogam in apoimaw dan Pasian in hing musah in ka thei hi. Khum ahing musah thute ka gelhkhie a midang te'n zong asimthei athei thei nading un English in unaupa Robert Sualian Guite in ahing lehkhiet sah hi. Zogam Revival Crusaders (ZRC) in kum 2011 apat thumna leh thugenna toh Pasian in hatna ahingpieh bang bangin tuni tanin Zogam ah kal kisuon in Pasian akipat halthana kinemtahin kingah hi. Tup-le-ngimte visionte mite simthei di'n ZRC One Year Calendar zattuom khat kisun in kihawm khe zel hi. Flyers zong lamka khopi sung va kithedal zel hi. ZRC in Motto ah "For God and the Community (1 Chronicles 19:13), tualeh Theme ah "Fight the Good Fight of Faith" (1 Timothy 6:12), tuaban ah ZRC in doudal dinga atup te ahileh -- False Teaching, Alcoholism, Poverty, Immorality leh The Works of the Devil. Tamteng banah ZRC Ministry in Revival, Evangelism, Mission, Revival Music Band, leh Training & Equiping lam zong kibuoipi hi. Tamte ban ah ZRC in Commission (bawl dia thupieh) aneite ahileh Preaching the Gospel (khantanhoi phuangzah), Making Disciples (nuazui ding bawlna), Releasing the Captives (saltangte suohtatna) leh Casting out the devil (dawi hawlkhietna) chi te ahi. 

ZT: Zomi Bible Insitute bang ngimna toh kiphut? Zil thei bang um?

GK: ZBI in tuni tan chieng in degree course ziltheina ding Bible School/College neizou nailou in Vocational Bible Training School na kibawl zel hi. I gam a Pasianthu theigilna akhan semna ding tupna leh ngimna ahi pen hi. 

ZT: Pasian thu gen in Manipur sung khoisung teng nana tuon kha ei?

GK: Manipur a thugen a ka pei khahnate Zotang, Thanlon tang, Kana Area, Tengnoupal, Moreh, Leisann, Meitei gam Thoubal, Kakching, Tonsen Chandel, Yairipok, Imphal chite ahi. 

ZT: Na laphuokte khat leh ni ana kimu zeuhzeuh a, bang hun vel apat laa lung lut? Solfa na zil kha ama?

GK: Ka neulai Class 6 ka sim lai kum 1966 laivel apat Solfa ka lung lut a, Sankey's Sacred Songs and Solos kichi Solfa bu ka lei a, alakai ka theisate a solfa mal a ka sah sah leh kapu Khamkap kanu naupa Kristian lamkai ana hi ngai khat in ahing sahpi a, zong ahing hil thei hi. Tuachi'n keima ading khop Solfa ka hing thei ta hi. Khum hunlai a Convention hattuom a ka lapute uh Solfa siem Mission Evangelist teacher nahi ngai ahi ua, David Kala chite bang ahing zilpi ua, ken zong a Alto chite bang ka hilpi thei ta hi. Keipen in Tenor ka pui hi. 

ZT: Na la phuok masah pen min bang?

GK: Ka laphuo masah pen ahileh SHI NUO THU chi ahi a, 1969 August 28 ni'a ka hing pientha na LST Heb 9:27: “Mihinga dingin khatvei shi guotsa ahi a, tuazou chiengin thukhenna um ding ahi” chi pansan a ka bawl khiet ahi.

 ZT: Tutan in la dawng bangzah na phuok ta diei?

GK: Ka la phuo mawngmawng tutan in dawng 30 pha ta sam. 

ZT: Pasian thu gelh lam lah bangchi na kisai?

GK: Keima leh keima kithei dan in laigelh siemmi hilou in ka kithei hi. Article thugelh dinga hing kingente bangzat ahiei khat kana gelh sam hi. Sermon outline ahileh 2018 apat ka gelh pan a, tunitan in Sermon 400 val ka gelhzou ta hi. Apoimaw leh abu a bawlkhiet ding lunggeel ka nei hi. 

ZT: ZCF Delhi ah Pastor in kum bangzat nasema, tua masang in bang bang na sem kha ei?

GK: Zomi Christian Fellowship Delhi ah kum 5 (2005-2010) sung ka sem hi. Ka sep pat dan ahileh Zou Worship Service (ZWS) Shillong a kum 4 ka sepzou in Voluntary Missionary di'n ka sepna apat ki-awng sut in Binaguri (Siliguri) ah hattuom khat kava zom a, Visiting Pastor sem kawm in akim vela sepaite lah leh singpi huona semte lah ah Khantanhoi kava taangkou hi. Sikkim khopi Gangtok ah zong Pasianthu kava gen ngai hi. Hunkhat zou in, Mr. T. Lalpu (Zomi Fins singer, tua MELC a pastor a sem) gamdang paidia kiguong khu a lem theilou chieng in, innlam ah hing kileh in, Shillong a ka inn uah a hing kibaang hi. Pathang, ZCF Delhi te'n Pastor suina nei uh a, adeibang uh mu nailou uhi. Nang zong apply bawl di'n kang deisah hi bawl mawngmawng in ang chi hi. Pasian a ki-aap pum a kingetna Chairman tungtawn a ka bawlleh, na kingetna leh na bio-data ka et khawm nua un ZCF Delhi pastor a semdi'n kum nih contract adi'n appoinment ka hing bawl ta uhi. Lemna sahleh November 2005 beima ngei a hing join di'n theisahna ka hing bawl uhi, chi letter dawnna kamu a Pasian lungsietna toh kava join thei hi. 

ZT: ZCFD Pastor na hilai a na siltuok na manghilh theilou a umleh, khat leh nih nung gen thei diei?

GK: ZCF Delhi khu hattuom hilou a Fellowship ahi mabang in daan mumal kinei theilou in, nu-le-pa kitenna ding toh kisai nawsuo leh lahlut chi umlou ahiziehin nungah tangval living-together te dan siengthou a ahing kiten sawm chieng un amau sie-le-pha theina toh a utna bangbang uh kiteelsah hi. Tambang kaal ah Pastor khutzah ding dan hasah sim ka sa hi. Tu'n zong tam khu bawldih chidan zong umthei tuomlou in ka thei hi. 

ZT: Delhi ah Pastor nasep sung in bang haksa nasa pen?

GK: Kei ZCF Delhi ka sep lai in Prayer Cell te vena toh kisai in Gurgaon Prayer Cell (Haryana State) te leh Noida Prayer Cell (UP State) te Delhi NCR ahi uleh, atamzaw private company a sem Kiginni leh Pasianni suty mulou, kalkhat sunga atamzawte suty muni Sepkiani (Tuesday) ahilouleh Pasianni nitah zaan dah 11 ah kikhopna hun kipan in zinglam dah 1amah kitawp zel pen, program va manpi zel ngai a hasa mama khat ahi. Delhi huikhuo asat chia lah saval adap hun chienga lah dapval. 4-wheeler lah kineilou, scooter secondhand phinphen khat toh National Highway a kazi toh dahkal a sim ka kikhaw khu chieichuai uh chu himai. Secondhand gari ahichieng a hun tamzawte NH ah gari hing buoi kha zel in, workshop umlou khatbeh muh ding umlou, khawpi tan ahilouleh zaansawt nua workshop kihong nawnlou, inntan meel 10-15 bang kisawn tung mun hi. Khat vevei inn zinglam dah 2/3 ah kitung zel hi. Tua te khu a hun lai in hasiet bang huoi sim, ahi'n akhonung in a ngaihuoi suoh ta hi.  

ZT: Delhi tuolpi sunga eimi Zosuan khanglaite bangchi'n na mu ei?

GK: Delhi Zosuan khanglaite group nih a pha ua - Pasian ngaisah leh Pasian ngaisahlou khanglaite ahi uhi. Student hi'n private company a semte (working group) ahilouleh sepna sui hitaleuh zong Pasian ngaisah khanglaite in self-discipline neithei ua, hindan ding zong hil ngailou in kithei uhi. Amabou Pasian ngaisahlou khanglaite pen silbangkim ah akiman thei ding zah un kimang theilou uhi. I kihanthawn utna umsun ahileh Paul in khangnoulai Timothy ahanthawnna mabang in i hanthawn nuom hi. “Hinanleh Pasian zatatlouna thu leh pitehte tangthu bulbal neiloute dei sinlen, Pasian ngaisahna lam ah kithunun zaw in. Tahsa lam kithununna in phattuomna themkhat anei a, hinanleh Pasian ngaisahna pen silbangkim ah aphatuom a, tu hun a hinna um leh ahing tung ding hun a hinna ding thuchiem anei hi (I Timothy 4:7-9).” 

ZT: Bang kum in Pasian sapna na mu, camp ah maw ahilouleh mi thugenna ah?

GK: Kum 1969 August 28 ni'n tangtawn a di'n Pasian in ka hinkhuo ahing kheel lamdang sah hi. Khumni khu ka pientha ni ahi. Ka pientha dan pen koima thugen ngaikheh zieh hilou. Camp/Crusade a telkhah zieh zong hilou, Revival hutdamna Chielpi kikhopna zong hilou in Pasian in a LST Hebriu 9:27 na tungtawn in ahing hundam zaw hi. Full-time a Pasian nasem dinga hatna 1983 in ka tang a, kum 1983 ma in Kumpina ka sepna Zogal Memorial Jr High School (Govt Aidded), Behiang ah Asstistant Head Master Undergraduate Post apat kitawp (resign) in Bible zil in ka kuon hi. 

ZT: Bang Bible taang in na lungsim a khoi pen eile?

GK: Ka Bible tang dei leh ka hinnpi khu 2 Korin 5:15 "Ama mi zousie taanga ashina ziehpen, ahingte zong amau a dinga hing nawn lou a, ashi taang ua shi a thoukiapa adinga ahin zohna dingun, Ama mi zousie a dingin ashi hi." 

ZT: Na pianna nanu leh napa'n Pasian thu ana awi man uai? Koi kunga apat Pasian thu ana zaak uh?

GK: Ka pianna kanu'n a hing beisan (1953) lai in nawi nehlai ka hia, kanu khu Pasian thu-awi Kristian suoh lou in a shi hi. Ka pianna kapa ahileh Kanu nawn athumna Khupkhoching (Chingkang) itheih thei nading un kapu T. Thongpau (T. Taithul) laphuo siem govt teacher retired Lamka Zoveng U (sangngamnu) ahi. Kanu pen Pasian thei, Pasian zau anungah laia Pasian adinga na kimang mama khat ahia, kapa toh ahing kiten chieng un hattuoma kimang kawmkawm in kapa ading zu ahuonsah zel hi. Pasian lungsietna toh 1969 August ha a keika hing pientha chiengin kikhopnate neipi'n Counselling te neipi'n December hasung in anunlui hindan teng nuasie'n Pasianthu zui dingin ahing kipekhe thei ta hi. Ei ham Bible sangin Meitei Bible asim siemzaw a Meitei Bible (NT) a sim sim a, 1990 kum in sin natna neia shi ding lupna ngaha aum lai in ama kivehna sum kipete Meitei gam ka pawlpi (FEBC) uh tu a SBC kichi mission field Kakching Khunou adingin apie hi. Kapa lungtang umna mission field a sem zawm dingin inn-le-lou khuo-le-tui nuasie in Meitei gam ah 1990 kumtawp lam in ka innkuon un ka kuondoh ta uhi. Kum nga sung ka sep nua un gambuoi (Kuki-Naga) buoina ziehin 1996 Sugnu ah kang pawtdoh ta uhi. Kapa tanchin tam tan ah a bei ta hi. 

ZT: Ham bangzah ah Pasian thu na gen thei ei? Ham dang in Pasain thu na gen ngai ei?

GK: Pasian gualzawlna toh ham 11 in Pasian thu kagen thei sam hi. Zou, Paite, Thadou Vaiphei, Hmar, Mizo, Manipuri, Hindi, Teddim, Simte leh English. 

ZT: Kolham (Hindi) na bangchi thei?

GK: Kanu'n kum 3 ka phah lai sang/nau neilou, ka nawitep lai in ahing beisan hi. Hing ke’m ding umlou in kapi kanunu mit khomu hoilou toh ka kikem tuo in kapute inn apat ka khang khie hi. Ka pute lawi ching kawmin Skul kai in lai ka sim hi. Beginner apat Class 6 tan kapute inn ah ka um hi. Kapu pen Lamka a khumi hunlaia Mahajon minthang Jesera leh Champalal kichite toh kizom in ka khuo uh Mualtam leh akimvel khote ah Vaimim/Annkam lain Agent in a panga, kolhaam (Hindi) ka thei law hi. Aham kangthei chieng kollai simdan geldan kalung hing lutin keima private in ka kizil tawm vevaw in, kang siemkhie hi. Gelzang Mission School a Class 6/7 kasim lai in Hindi teacher kitup aneilou zien un Hindi class ang lasah zel uhi. 1977 kuma Sugnu English Standard High School a kasep lai in Serou Hindi School apat Hindi Class X ahing neisah uhi. 

ZT: Kolham in Kitennna leh Baptisma na bawl kha ngai ei?

GK: Zomi Christian Fellowship (ZCF) Delhi Pastor kasep lai in Pastor Sompal in Evangelist ahilai in hattuom a nei a member te Pasian dansiengthou a kitengsah ding in ahing chiel a, Kolham in kava gawm hi. ZCF a eimi nungah khat in Kristian hilou khat a kitenpi a, Pasian dansiengthou a kitenpi a ut ziehin Pasian thua houlimpi in Kristian a hing suoh nuom bep in Kolham in Baptis ka tangsah a, ka kiteng sah hi.

ZT: Rev Dr LT Lianzaw khu na student ana hikha ngai dan in kana za a, nang genbeh thei diei?

GK: Kum 1972-75 sung Saiboh Mission JB School (MEP) a Headmaster ka sep lai in, tulai taha New Beginning Gospel Ministry International (NBGMI) CEO & Founder President sem lel Rev Dr Langkhanthang Lianzaw Geltui tuolkuon in Class 2 leh 3 hing sim hi. Khatvei ka kung ah nang teacher na nuoia lai kasim apat Maths leh Hindi Basic ka theilaw hi chi'n kipahthu ahing gen kha ngai hi. America return nua kum 2019 kuma akitenna uh Anniversary ni'n ka nupa un Delhi Restaurant khat ah sa ka du penpen uh hing teelsah in gil be'mse'l in ahing vah hi. 

ZT: Na Ministry ah Healing leh Miracle lam toh kisai them khat nung kup theih diei?

GK: Manipur a ka kho gaal ua Mualcham Chialpi 1999 laia Gospel lasa zel nungah Hebul khu Chielpi zaw in haamtheilou in hakhat sung a um hi. Thumsah ding in ahing theisah ua, Maitam bawla akithumsah hakhat nua in ahing haamthei kia ta hi. Delhi a pastor kasep lai member te lahah eimi pasal khat (SSB retired) dawi in asawisah khu Pasian mintoh dawi nawdohna kava nei hi. Kum 2015 lai in Lamka Apollo Veng a inn khat dawi in asawisah atengte kantha, ehbuh leh anntang tin dawi in ahalsah thu, dawihawl dohna nei di'n ZRC team theisahna leh chielna ahing bawl ua, Pasian hing pieh thuneina toh dawite nawdohna kinei hi. Kum 1978 kumlai in Singngat kho kunga Zabellei Bieh inn ah Missionary Board (MGP, MEP) a Secretary a kapan lai in, Tuining khuo a pat Committee tel ding Lamka to Singngat bus zing bus umsun 9am akipan khe ding ka cycle a ka delleh ka cycle lamkal ah ahing puncture a, workshop umna Saikot khotan sawn ang ngaita hi. 9:30 am in Saikot apat ka kipan tha pan hi. Bus laplou ding theisa ahita hi. Lamka lut ding kuon Rengkai leibul ah Joshua thumna bangin Singngat bus kalap theina ding ginna toh thu ka ngen hi. Lamka New Bazar a Singngat bus kingah ginna toh ka zot lai in bus nuolam ka gaal muta hi. Gari ki-start theilou zieh in hunsawt kuomtahpi ana buoi uhi. Kei katun nua minute tamlou in ahing start thei ua ka kipan khepai ta uhi. Pasian sil lamdang nasep khat ahi.

ZT: Tutan in Bible pumpi bangzah vei na simsuoh ta diei?

GK: 11 vei. 

ZT: Na tangval lai in Pasian kungah zi ding taa ding na ngen ngai ei?

GK: Hi ka ngen tham hi. Taa deih zah zong ka ngen a, Mangpa'n a hingpie hi. Numei 3, Pasal 2. Pasian tungah ka lungdamna lien mama hi. 

ZT: Pastor or Evangelist (Pasian thugen) khat adia poimoh pen, bang hidin na ngaihsun a?

GK: Bible sim leh thungetna toh Pasian biaha phata hun atam thei pen Pasian toh kipawlna nei ding. Pasian mizat mithupite thumthum mi, Bible simsima hinpite leh Pasian toh kithuo tamte ma ana hi uhi.

ZT: Khristian innsung bangchi kipuihuai di'n hoih nasa?

GK: Kou innkuon in innkuon kipuihuoina etteh (model innkuon) dingin Korneliate innkuon ka nei uhi. LST Nasepte 10:2-3 "Pasian ngaisahmi ahia, a innkuonpite zousie toh Pasian giing mi ahi ua, mite kungah kiphal tahin hepina silpieh ape leeng hi, tualeh Pasian kungah zong thu angen ngitnget hi."

 

ZT: Gospel Camp / Crusade chivel nana bawl ngai ei?

GK: Pasian lungsiatna toh Camp Speaker in 50 vei bang ka na pang a, Chialpi Crusade/revival 200 vel ah thugenna zong kana nei ngai hi.

ZT: I gam ua Khristian te taksap lianpen bang hidin na ngaihsun a?

GK: I gam in Bible dungzuia pienthana dihtah leh Pasian hagau a halthana dihtah i tasam pen un hi'n ka mu hi. 

ZT: Na hun zahdan taangpi them khat nung gen thei diei?

GK: Pasian a ka piantha apat khantanhoi gen dinga hutdam leh hatna tang hi'n ka kitheia, tua Pasian hing hatna leh hutdamna nasepna nna sepzaw na di'n nichina ka zuiding ka bawl ding dan principles (regiment) ka kisiem a. Tua khu Bible sim leh thungetna toh nichin ka hun masapena Pasian toh kithuo khawm ding ahi thei tan in minute 30 apat dahkal 1 sung ka damsung nnapi pen dingin ka namded a, tunitan in ka sunzom zel hi. Fasting ahileh Pasianni zingmawng. Tuami louin akulleh poimaw dungzui in ni 15 half-fasting ahilou leh ni thum full-fasting leh ni khat total-fasting chite bang ka bawl hi.

 

Rev Dr GK Samte & family

ZT: Khristian khanglaite bangchileh Pasian thu ah tuina nei thei sem di'n na mu ei?

GK: Pasian sawl leh thaunilh thutah gen Pasian thugen apat thu a ngaikhieh ngei ngei ding uh a poimaw hi. Tuhun nukhie hun a Pasian Hattuom kichite leh thugentu dinga a chielte uh themkhat hing tahlang vang. "Amauten thuhilna dih angaikhiet ngaplou hun uh hing tung ding ahi, hinanleh thu ngainuom a bildaw ahizieh un, amauh deilam gen dingin thuhilmi akhawm ding uhi. Tualeh thutah akipat abilte uh aheimang ding ua, tangthu bulbal neiloute lam ah abildaw zawta ding uhi (2 Timthy 4:3-4). Pasian sawlte bouin Pasian thutah agen uhi (Johan 3:34)". Pasian sawl hiloua nehmuhna dinga thugentu ten Pasian tangthu (the story of God) gen ahi bep uhi: David leh Goliath kisuolna, Samson tha hatdan chite gen ahizaw uhi. Kaneu lai in kapi'n Neinou tangthu, Khupching leh Ngambawm ki-itna tangthu ngainuom huoitah in ang gen zel a, lungsie'n mittui bang aluong hiel hi. Ihmut bang a tuisah mama hi. Ama vang zingkal kathaw chieng kilamdanna kei ah kikheelna muthei ding a um sih hi. A nitah chieng ka gensah zel a ka ngai chieng nuom kasa mama mai hi. Bangdia kikheelna kei a umtheilou adiei Pasianthu hilou in tangthu maimai ahizieh ahi. Pasian in a thugen dinga asawlte athu akam ah akoipieh hi. A silbawltheina toh zong athuom hi. 

ZT: Zudawnte khu Khristian ten i gensie ua, i muhdah ua, Bible toh zudawn kikalh ama?

GK: Kristiante LST in hun khensiem ding leh mangsiem di'n ahing hil hi. I gentahsa mabang un tuhun khu hun nukhie penpena hinkhuo mang ihi mabang un zukham buoi leh Pasian deilou tahsa utna hoilou deidana hing loua hun lemtang nga zaza ua Pasian deilam sem di'n ahing hil hi. Tualeh Jesu hing peina ding ni anai mama tah ziehin Krist vahthuoma kithuomzaw dingin hilin ium uhi (Rom 13:11-14, Ephesa 5:15-16). Ephesa 5:18-na thu simvai: “Tualeh zukham in um sih unlen, tuanah kidehzou louna aum hi, hinanleh Hagau a dimin um zaw un.”

 ZT: Khristian khat dia tep-le-muom ah bang ngaihdan na nei a?

GK: Pasian khu a siengthou Pasian ahia, aman atate siengthou di'n adei hi. 2 Korith 6:17-18-na thu simvai, “Tuaziehin, alah ua kipat in hing pawtdoh unlen, atuom in um un, Mangpa’n achi hi. Asienglou mawngmawng khoi sih un, tuachi’n noute ka hing pom ding a; noute a dingin na Pa uh ka hi dinga, noute zong ka tapa leh ka tanute na hi ding uhi. Mangpa bangkim bawlthei in” achi hi. Bung 7-na dawng 1-na zong simvai, "Tuaziehin unaute aw eiten tambang thuchiemte inei ziehun Pasan giinna a, siengthouna bukimin tahsa leh hagaua buote apat iki susiengthou ding uhi.” 

ZT: I gam uah numei ten pulpit (thugenna) a tang kholsih ua, tam khu bang'e na ngaihdan?

GK: Hattuom ah numei ten zong lamkai panmun ah Khantanhoi nasepna thugenna a nei tham uhi (Phil 4:2-3). 

ZT: Tulai gamdang (foreign) a um, ei Zomi numei ordained pastor (Rev title) zong a um ta a, bang'e na ngaihdan?

GK: Reverend pen Pasian nasem dinga ahintan (damsung) ua dinga Pasian a kipete pawlpi khatin a zahtatpina atheipina kipia ahi. Tua ziehmain numei hi'n pasal hitaleh tambang mite Pasian pawlpi khat in zatatna atheipina uh apieh uh ahi. 

ZT: Zosuan - Chin-Kuki-Mizo-Zomi -te lakah numei Bible zil (theology lam a lut) a kivaang mahmah a, unau Nagate numei Bible zil atam thei zel ua, ei toh teh in. Bangzieh pen a eimi numei Bible zil um senglou adiei le?

GK: Eimi hattuom kivaipuohna ah atamzaw pawlpi te'n Pasianna sem ding hi'n office a sem ding hi'n missionary ding hitaleh numeite quota i bawlsah senglou zieh uleh numeite Pasian thugen dinga i koithei senglou zieh uh hipenva chi ing. Chiemnui thutah khat gentalei i gama Pasianthu ahing lut chillai in nungah khat in evangelist-pa thugen angaingai leh Pasian thu awi Kristian ang suoh nuam ta hi. Apa kunga Pa keizong Pasianthu awi kahi nuom, zing apat biehinn kang kaita ding a chileh apa'n numei maimai hing kingai sihva chi'n adawng hi. Khumbang i ZO Kristian lungsim paidoh hun ta hi.

ZT: Tulai i gamsung uah Kani bawlte a kimaw sah mahmah mai a, amaute sawm-a-khat khu hattuom adi'a sieng'e sienglou?

GK: Tulai War on Drugs a hing kithang mama hi. Kristiante galdouna pen sa leh sisan singkung loupate hilou in vaihawmnate thuneinate tulai huna tam leitunga vaihawmtute leh vanmun a hagau gilou umte ahizaw hi. Kaisar lim tuonna sumte Pasian adinga ahing kipieh chiengin Pasian sum asuoh hi.

ZT: Trinity (Pa-Tapa-Khasiangthou) leh Baptisma thu ah saptuam in gindan tuomtuom nei a, bang'e na ngaihdan?

GK: LST a imu bang in Pa Tapa leh Hagau Pasian khu pumkhat ahiziehin hagau ahiei Tapa Jesu ahiei Judate banga Pa Pasian va tuom bieh a, Pasian thum pumkhat hina ei khen thei guol ahisih hi. Jesu mina baptist i bawl inzong Pa Pasian Hagau Pasian amin valou sih nanlei amau akikhen theilou pumkhat ahi mabang un a tel veve uhi. Singpi hum i dawn chieng in, tui chini bawngnawi singpiteh amin valou sih nanlei atel khawm veh uhi. Pa Tapa leh Hagau kigawm khu Pasian (khat) ahimai hi. Jesu'n Pa mu khu kei mu ahi achi mabang in.

ZT: Khanglai beidong lawhsam kisahte bangchi'a hanthawn a hoih diei?

GK: Khanglaite leh leitunga mizousie i pien ua pat hinna neilou, Pasian neilou lametna neilou, beidong chimaw ihi chiet uhi. Hinanleh Pasian in Krist toh ahing hingkhawm sah a atate in ahing bawla lametna hing mimanpha mimantam ahing suo hi. Jesu'n nouma semgim leh puoh gih pozousiete aw keima kungah hing pei un kei man khawldamna ka hing peding chi'n ahing han hi. Jesu'n kei khu hinna aneina ding uleh hinna kiningching tah anei theina ding ua hing pei ka hi achi hi (Johan 10:10). Jesu'n kei lampi thutah leh hinna ka hi achi hi (Johan14:6).

ZT: Mi a bang chite piangthak kichi sese?

GK: Pianthana khu Pasian nasep ahi. Ezekiel 36:25-29 sung ah Pasian in mikhat a pienthasah dan imu thei hi. Tuisieng atheh khum hi. Pasianthu azasah hi alungtang sung banga tahsa banga nem in a hen pieh hi. Lungtang tha abawl pieh hi. Hagau tha apie a ama hagau Pasian hagau asungah akhumpieh a athupiehte zuithei zuisiem di'n Pasian in a hagau a pie hi. Silpha bawl dingin Krist Jesu ah asiemtha hi (Ephesa 2:10). Dihtatna nasep eiten ina bawlte zieh hilou in, Ama khotuona dungzui in eite ahing hundamta hi, tua hundamna pen Hagau Siengthou zieh a pienthana a silsiengna leh siemtha kiana zieh ahi (Tita 3:5).

ZT: Hattuom belampu (lamkai) te theidia hoih nasak a um kha ei?

GK: Zogam Pastorte leh hattuom lamkaite tami LST Nasepte 20:25-35 LST pansan in ka hanthawn nuam hi. "Tualeh tuin Ngai un, noute zousie lah a, Pasian leenggam thu gen a ka vah kawinate’n ka mel na mu nawn sih ding uh, chi ka thei hi. Tuaziehin mi zousie sisan ah ka sieng ahi chi tuni’n ka hing theisah hi. Aziehpen Pasian thuguot zousie noute kunga phuondoh lou a im ka nei sih hi. Tuaziehin noute pilvang unlen, belamhonte zousie vengun, Pasian Hattuom Ama sisan a aleisate vah dingin, Hagau Siengthouin amaute lah a belampu hi dingin noute ahing guot ahi. Aziehpen ka pei nua chiengin, ngia giloute na lah uah ahing lut dinga, belamhon akhawi sih ding uh, chi ka thei hi. Nouma lah mama ah zong nuazuite amauh lam a kaimang dingin, thu alelam a gen ahing um ding uhi. Tuaziehin kivengun, kum thum vingveng, asun azan a hitui luong kawma, michin phawhhil ka tawp lou dan thei ngitnget un. Tuin unaute, noute hing lamtou a, hing khangsah thei a, mi suhsiengthousate lah a goutan pe thei Pasian leh akhotuona thu ah noute ka hing kemsah hi. Koima sana, dangka leh sil leh ten, ka eng ngai sih hi. Tam khutte’n keima leh ka kunga umte tahsap awng hu in ka sem zel chi noute mamain na thei uhi. Bangkim ka bawl zousie nouten zong tambanga semgim leh Mangpa Jesu thu thei ngitnget kawmin mi hatloute na panpi ding dan uh hing ensah ka hi. Mangpa Jesu mama in lah sangin pieh hi guolzawlna sangzaw a hi, achi khu thei ngitnget un." 

ZT: Simtute bang thu vaikhak (advice) nuom na nei ei?

GK: Khovela kum bangza ahiei khat dama kiakia nawn mai ding hinkhuo pieh ihi lai un, mihing tate in asiempa asuia aneia ama deidana ahina akisiemna san Pasian zaua thupiehte nit a alampi zui ding khu hinna mannei pian man um ahi pen hi (Thugenpa 12:13). Leitung tomkhat damsunga milawching minuomsa mihampha ihi nuomleh Job thugen ngaikhe vai: Tuin Pasian toh kilem inlen, hamuong tahin um in, tuachi’n silhoi in nang ahing zuon ding hi. Ama kam a kipat thuhilna sang inlen, na lungtang ah athute kholkhawm in. Bangkim bawltheipa kunga na kinuale leh, Aman ahing siemtha dinga, na puon innte apat in thulimlouna, na koimang ding hi (Job 22:21-23). Pasian sui kipan vai aziehpen Pasian suite'n silhoi bangma taasap neilou uhi (Psalm 34:10). 

ZT: Pastor-pu, interview a hun manpha nang zatpihna tungah lungdam ung. Pasian gam keklet semna di'n Pasian in thupha toh iphungvuh tou zel ta hen.

GK: Kei zong Zogam Today editorial board tungah ka kipah mama hi. Azieh koima kunga kigen theilou, kigen zoulou lungsim puohnat vei leh lunggulte imi isa i innkuonpite kunga gendoh theina phuondoh theina kot na hing honsah ua, ka gen suohta ziehin noute tung leh i Pasian tung ah kipahthu ka tut hi. Genkhiel gen chinglou a umleh zong kitheisiem leh kingaidam chiet di'n kang ngen hi. Tami a simkha zousie I Pasian in hing guolzawl pieh ta hen. Zogam Today Damsawt hen! Masawn zel ta hen!

Courtesy: Zogam Today  | 08-11 Feb 2023]

 ---:o(O)o:---

Share: